[純愛]將星夜還給你: 8.

8.
 
        「其實呢，我有同佢地講過…我地嘅事。」某間快餐店裡，坐在我旁邊的雨殷如此說道。
 
        「哦？係咩？」我冷淡帶過，繼續算著那煩人的數式。
 
        「但佢地反應好似唔係咁好…」雨殷語氣帶著失落。
 
        我知道我終究要解開她的心結，無法逃避。
 


        我輕嘆一聲，放下了手頭上的事，再道：「咁佢地點講呀？講嚟聽下。」
 
        「首先係呀Venus，佢聽完就好反對，話你係壞男人，叫我小心你。」
 
        「仲有Janet講你之前手多多嘅野呀，佢地仲有講少少…」
 
        我望了她一眼，讓她說下去。
 
        「你同董以媛之前嘅事…」她望著我突然變嚴肅的神情，欲言又止。
 


        然後又說了別的話題，「其實我真正認識你之前都有啲驚你，好似一調位嗰陣海祈就叫我小心啲…係坐耐咗附近，先覺得你其實冇乜野。」
 
        聽畢，其實就不過是她朋友們道聽塗說，一番誤解和偏見的結果，但女朋友難得對自己坦白，自然心裡甜絲絲的，因而沒有計較她們的話。
 
        我把手伸長搭在她的手臂上，放軟了聲線，輕鬆地道：「我反而好想知佢地有咩實例喎，我喺學校摺咗咁耐。」
 
        「er…」她彷彿在回想。
 
        我打斷了她，直接給出答案：「其實依啲都係佢地聽聽埋埋產生出嚟嘅壞印象嚟㗎姐，如果佢地熟我，可能就唔會咁諗。」
 


        「好喇，就算真係要咁諗我，咁又點？佢地點諗對我一啲都唔重要，對我重要嘅只係你信唔信我。」
 
        「董以媛單野，冇錯我係有做錯，但都只係限於我散咗之後唔識放手，先至煩住佢姐，一齊嗰陣我又冇對佢做過啲咩。」
 
        「同埋講真，人係會變嘅，同董以媛都算陳年舊事，都過咗三、四年，我都已經唔係以前嗰個傻仔。」
 
        「你啱啱都話咯，你一開始有啲怕我，但同我熟絡咗之後就覺得我其實冇野，同一個道理都可以應用喺佢地身上。」
 
        我看著雨殷鬆一口氣的表情，想著回答得應該還算可以。
 
        「係呀，仲有一樣呀，佢地好過份囉，宜家叫我地做LV。」我心念一轉，想著應該就是取我們英文別名的第一字母而成。
 
        「咁我地去買野係咪會平啲？」我笑道，化解了氣氛。
 
        「你就想呀～」說罷她依偎在我身上。


 
        「好喇，繼續溫書喇。」我提醒此行主要目的。
 
        「我唔制～」她撒嬌。
 
        「冇得唔制喎。」我將一份份練習題放在她面前。
 
        「咁我地一個月去邊呀～」她轉移了話題。
 
        「下下，咩一個月呀？唔得閒喎～」我逗她。
 
        「喂呀，我唔理呀，你要約我㗎。」
 
        「哇你咁都得嘅，咁你十二號有冇考試呀？」我跟她在五月十一號開始，相隔一月的，自然是每個中小學生都不想面對的考試時間。
 


        「冇喎，十一號啱啱考哂主科，第一個選修科十六號。」
 
        「ok，咁我約定你十一號晚先。」我對雨殷沒轍。
 
        「好野～嗱你記得你約咗我㗎～」她笑著說，笑得很燦爛。
 
        「係喇係喇，宜家快啲同我溫書！」我不想這段感情太過於影響她的學業，因此只好當著嚴師的身分。
 
        「Yes Sir～」