[純愛]將星夜還給你: 12.
12.
暑假仍舊過著，c市的夜裡依舊炎熱。
電玩伴著我的夜，鈴聲這時悄然響起。
「呀，BB，弊啦弊啦，我手機好似唔見咗！」我接通電話，另一側的雨殷如是說。
「下，咁大獲，你今日去過邊呀有冇返去搵過？」
「今日，唔，返工嗰陣行咗好多地方，我都唔係好肯定…」雨殷有在打暑期工。
「咁袋呀嗰啲呢？」
「我覺得都係可能喺個紙袋度，今日一路都係我keep住，到收工先比返呀頭。」
「咁有冇試過打電話過去呀？」
「打過但係冇人聽，可能因為我一直都較震機…」雨殷這樣說，然後又道：「死啦，聽日仲要開工…」
聽到這我突然有點擔心，因為她打工的地點不是固定，又沒有辦法聯絡到她，如果有個萬一…
頭腦一熱的我說：「咁，洗唔洗聽日我送你返工？我驚…」
「下下，唔洗啦，應該冇事嘅…聽日見到呀頭應該就拎得返嘅…」
「真係ok？」
「嗯。」
「咁，唔，咁如果部電話真係唔見咗咁點算？」
「um…」
「咁啦，如果你聽日未拎得返電話，你借你呀頭電話搵我，我嚟接你收工啦。」
「唔…咁好啦。」
「乖，咁早啲訓啦～」
「唔～我要～」每次要結束對話時，雨殷總是會這樣向我撒嬌。
「BB想要啲咩呀～」然後我也總是這樣逗她。
「BB你知嘅～」
「我唔知喎～講嚟聽下～」
「衰人～」
「好啦唔玩啦夜啦，啜～」我用嘴唇開合，發出親嘴的聲音。
「啜～BB早抖～」雨殷也回敬我一個吻，然後結束。
……
隔天下午。
我同樣過著電玩的人生，電話也同樣在途中響起了鈴聲。
「喂？」一個不熟知的號碼打來，我思忖一下，然後接下。
「喂，係我呀～」雨殷的聲音從另一頭傳來。
「點呀？搵到電話未？」我問道。
「搵到喇，真係喺呀頭嗰袋野度！」興奮地道。
「咁咪好囉。」我將電話夾在耳邊，敷衍道。
「但係呢…」興奮的小孩又突然變得失落，「呀頭聽日先返工囉。」
「哦？係咩？唔緊要喇，最緊要搵得返。」
「咁…BB…」
「吓？」有話為甚麼不好好說？到底在哪邊遲疑些甚麼？
「琴晚咪話過嘅？」雨殷試探道。
「唉。」這時，遊戲中的隊友全死清光，我才把心回到雨殷那邊上。
「唔，琴晚，哦！你想我接你收工？」
「Yeah！嗱，唔係我想㗎，係你話接我㗎～」是嗎？誰說誰想的真的有那麼重要嗎？
罷了，我也懶得跟她爭論甚麼，只道：「係喇係喇。」
「係喎，啱啱我同事送咗張甜筒券比我呀！一陣一定要去買～」說到甜食，女孩子又再度興奮起來。
「得喇得喇，你仲唔快啲還返電話比人，一陣傾晒人地啲分鐘。」
「咁一陣5點喺地鐵站等喇～」
「嗯。」約好時間地點後，我們便掛了線。
……
4時45分，我預早到達鐵路站。
等了30分鐘，卻仍然未見雨殷的蹤影。
沒道理，她明明說放工時間是4:45，走過來鐵路站也不過幾分鐘。
我下意識拿起手機，卻又忽地想起，對了，她現在沒有手機。
該怎麼辦才好？
當人一焦急的時候，就會懷疑自己認為對的事是錯。
就好像，會不會是聽錯了哪個出口，甚至是連站名都記錯。
我多等了5分鐘，終究忍不住，繞著整個鐵路站走了一圈。
回到原處時，雨殷卻站在我剛才等候的位置。
「哦！BB你遲到！」雨殷一手拿著甜筒，一手指著我道。
「你啱啱到底去咗邊！」一直處於焦急狀態的我，終究蓋不住自己的聲音。
「我？我去咗買甜筒囉～啱啱電話咪講過嘅？真係好抵呀！」她仍然維持著一貫的天真笑臉。
讓等待了她半個多小時的我，突然感到，原來我所緊張的，都只是一個笑話。
我忍不住自己的憤怒，抓著她的雙膊，說道：「你知唔知，我有幾擔心你呀？吓？我仲周圍走去搵你！你竟然同我講走去買雪糕…」
「啜」雨殷在我臉上親了一下，然後說道：「嗱，咁宜家當無數啦，見BB咁擔心我，獎你食甜筒，啊～」雨殷把甜筒伸了過來，我看著她的這副模樣，笑也不是，怒也不是，只好將憤怒發洩在甜筒身上。
我把甜筒搶了過來，大口大口地把甜筒吞進口裡，雨殷立時緊張地道：「喂，BB，唔好呀，留返啲比我呀～」
可是我無視她的請求，三兩下子甜筒就消失不見了。
「嗚～我支雲尼拿味呀～嗚嗚～我唔理～BB要買過支比我！」雨殷兩手撐著腰，撒嬌道。
我一手摟著雨殷的腰，把口貼上雨殷的嘴唇。
「唔…」她一時沒有反應過來，漏出了奇怪的聲音。
我輕咬她的雙唇，再慢慢用舌頭探索彼此，就在這個人潮擠擁的鐵路站裡，我跟雨殷，如入無人之境、彷如在另一個無人的平行宇宙裡，親著永遠的一吻。
當我跟雨殷再度分開，我已經弄不清時間。
這個長吻，使我和雨殷都不禁喘息著，補充消耗的氧氣。
「喂呀…依度咁多人…好過份囉…」雨殷發現周圍的視線後，向我抱怨道。
「宜家咁就真真正正無數喇。」
「哼！我唔理！BB仲爭我一枝甜筒！」
「傻瓜。」我摸摸雨殷的頭，拖起她，就這樣開始奔走。
然後就此奔往無人認識我倆的世界。