我每星期都會去摩星嶺同佢啪啪啪: 二十八

【上文提及】
我唔小心跌左部電話入廢堡，於是諗住入去執返。當我喺廢堡踎低搵緊部電話嘅時候，突然好似發生地震咁，好彩震完之後我總算搵返部電話。開著電筒一照之下，我發現周圍多左一排排木櫃，入面仲擺左好多支紅色嘅嘢⋯⋯

【我每星期都會去摩星嶺同佢啪啪啪 - 二十八】
一瞓醒睜大雙眼--咦？呢度⋯⋯究竟係邊度？乜我啱啱唔係喺屋企瞓緊㗎咩？點解會嚟左呢個咁黑嘅地方嘅？呀！我個頭⋯⋯好痛⋯⋯但係個屎忽⋯⋯仲痛！
文：「咩料呀？我明明記得啱啱係同Kenson同傻仔西去左摩星嶺飲酒之後就返左屋企瞓㗎！點解一瞓醒就會喺度？唔通係我飲大左？」
呢度真係黑到乜L嘢都睇唔到，我喺褲袋入面拎部電話出嚟照下先見到周圍係一排排嘅木櫃。

「阿文！估唔到⋯⋯我只係分心睇下Aurona點姐，咁就出事啦！諗住靠你攞返佢地嘅血種，點知你就連自己嘅都送埋俾人。」一把似曾相識嘅聲音喺我腦入面響起。
文：「你係邊個？點解我會嚟左呢度㗎？」


「邊個？你連我都唔記得？我係Alex呀⋯⋯」
之後，Alex就同我講左個故事--由我同Kenson、傻仔西誤闖Dream Zone，到Aurona俾DNC攞左血種，成件事佢都講左俾我知。
文：「聽完你咁講，又好似真係發生過咁嘅事。」
「冇錯！你仲話一定要攞返Aurona嘅血種出嚟救返佢㗎！不過啱啱你入Dream Zone嘅時候Aurona好似有啲反應，我顧住望實佢就忽略左你，之後就連你都⋯⋯」
文：「哦⋯⋯聽你咁講，我要攞返Aurona嘅血種俾你？」
「冇錯，除左佢地三個嘅血種，你仲要搵埋自己嘅。」
我企起身，照一照眼前嘅木櫃，隨手攞左支裝住紅色液體嘅test tube。
文：「Alex，你講嘅血種喺咪就係呢啲？」
「係呀！不過要搵返屬於自己嘅血種先有用，所以你對清楚label上面嘅名先好攞。」
我打開test tube個塞等入面嘅血腥味可以飄出嚟。


文：「呢度上面寫住Po Cung Hin Alvin，你望唔望到呀？」
「我見到，所以呢支唔啱，你放返低佢啦！同埋你放心啦，我會睇住你㗎啦，唔想你再出事。」
文：「哈，你望住就得啦！」
我一放手，支test tube就即係跌左落地，我再用力踩落去，木底皮鞋撞擊地板嘅聲音同清洈嘅玻璃碎裂聲交錯響起。
Alex即刻問我：「你做乜L野呀？」
文：「你話呢支唔啱呀嘛！放心，我而家即刻去搵Aurona嗰支！」
我一路行就隨意拎起啲test tube，望一望之後再用力掟落地，無論Alex點樣叫停，我都冇理佢，直到我攞起Aurona嗰支--
文：「Alex，呢支嘢入面裝住嘅就係你想要嘅血種，如果我唔小心放手，哈哈--」
⋯⋯