簡介

一個男校撚殺入情場,然後被女神們弄至傷痕滿身的故事。 直至今天,我依然在想﹕「發生這種事,究竟是錯在我?還是錯在她們?又或者是社會的錯?」 但是想到腦震盪也想不出答案。有待你們看完後,替我判斷。



後生嗰時,我讀過五年男校 。

呢個地方可以話係培育室,養咗班出類拔萃嘅男人,師兄弟個個有特殊技能,有啲識吹蕭 ,有啲練氣功練到識出波動拳 ,不過唔知係咪練得太勁谷精上腦,佢哋好多都係毒撚 。

曾經有個師兄同我講﹕「你知唔知呀?星仔,呢間嘢畀人詛咒咗 。資質高嘅學生做硬毒撚 ;資質低嘅先有機會媾到女架。 」

聽完佢咁講,我有啲替血肉相連嘅細佬擔心 。

因為我由細到大都畀老師讚到天上有地下無,有啲仲話我係「社會棟樑」 。



仆街啦,會唔會冇飯開架?

結果離開咗毒撚培育中心,我就發覺師兄冇老點。

由我識鍾意女仔嗰刻開始計,我嘅戰績係20戰20負 。

呢20場戰役入面,頭10場係龜速進行,技巧亦好柒 。

好友西門見我咁戅尻,忍唔住介紹我睇《把妹達人》 。



我好乖,一口氣睇晒套書,結果極速輸埋之後10戰 。

真係屌你個把妹達人   。

早幾日,我約咗個成日睇《100毛》心理7驗嘅女性朋友食飯,由於佢好熟悉我嘅情史,所以好大膽咁分析我 。

佢話﹕「根據佛洛伊德嘅講法,嗰個著衫懶係潮 ,成日懶串嘴 ,又喺人哋面前扮羅嘉良嘅你 ,其實只係SUPER EGO,唔係你嘅真面目 。你唔肯做番你自己,係因為你好憎自己。」

我真係有啲憎自己賣埋佢張單 。 (利申﹕佢唔係我女神)



其實,我唔肯做番自己,唔係因為憎自己 ,而係想變到世紀大情聖卡薩諾瓦咁勁 。

所以,我先決定學佢寫回憶錄。

可惜,佢嗰本係《世紀大情聖回憶錄》,而我嗰本就係《世紀大毒撚情場膠史》 。

呢本書,將會講我呢個男校撚離開毒撚培育中心之後,喺感情戰場上做嘅戇尻嘢 。

P.S.先至聲明,為咗保護某啲媾唔到之後變咗朋友嘅女神,我唔會講晒20戰,我唔想影響佢哋,我唔想佢哋唔開心,雖然我知佢哋唔會 。
 
已有 0 人追稿