School－呢間並唔係一間普通嘅學校(不定期更新): 第一回、歡迎
已經唔記得我點解會身處喺呢個地方。
呢到係一個冇開燈嘅班房。
呢個班房平常不過，就係普通嘅中學班房，但玻璃窗被一層黑色膠紙封住，無法見到出面嘅環境。
唯一嘅光源就係戶外透過黑色膠紙透入嚟嘅陽光，雖然唔算光猛，但都勉強睇得清周圍。
呢到除咗我之外，仲有二十幾個陌生的少男少女。
佢哋同我一樣都係一臉迷惘，唔知道自己點解身在此處。
我走到班房房門後面，想由門上嘅玻璃偷望出面係咩環境。
只係見到外面係一條陰暗嘅走廊，唯一光源就係戶外透入去嘅光。
「呢到應該係一間平常不過的學校。」我低聲安慰自己。
正當我打算開門離去嘅時候，有一個少女阻止咗我。
「你想去邊?」她毫不客氣道。
「我只係想離開呢個地方。」
「等等，你唔覺呢到好唔妥咩?」一個高瘦的眼鏡少年亦走過嚟。
眼鏡少年主動自我介紹:「我叫Ray，你哋記唔記得自己係點嚟呢到?」
剛才嘅少女搖頭回答:「唔記得，只係記得我放學番屋企，然後喺巴士瞓著咗，醒番之後就喺呢到啦。咦，呢件係咩衫嚟?」
少女指住自己身上的服裝。
班房上所有人都係穿住一式一樣的衫，就好似係…
「校服。」我同Ray同時講出呢個名詞。
Ray見我終於有反應，就問我同一個問題:「你又記唔記得自己發生咩事?」
我同樣搖頭。
其實我唔單只係冇晒記憶，實際上我連自己係咩人都唔記得咗。
唔通呢個就係所謂嘅失憶?
奇怪嘅係我連少少不安嘅不安都冇，可能因為咩都唔記得晒，所以冇咩值得擔心?
「我叫Luna。」少女向Ray主動提出自己嘅名。
Ray點點頭，然後望向我沉聲道:「你唔會係想隱瞞自己嘅名啩?」
隱瞞?我梗係不會咁諗，但係我真係乜都唔記得。
但係我可以照直講咩?咁唔會令佢哋覺得我好可疑咩?
所以我只好隨便作一個名字出嚟敷衍住佢哋。
「我個名叫燈。」
「燈?呢個係咩名黎?」Luna語氣冰冷，完全唔相信我嘅大話。
Ray又點頭道:「Luna，可能佢真係叫燈呢?」
「等等，番埋位先，有人嚟緊。」我再偷偷望出走廊，發現遠處有一個人影向住我哋班房呢邊走過嚟。
我哋三個即刻走番埋位。
我坐喺最近門口嗰行嘅第三個位，而Luna就坐喺我左手邊。
「你真係叫燈?」佢狐疑地再問多一次。
我只可以以傻笑嚟回應。
呢個時候，班房房門悄悄打開。
所有人屏息靜氣，大家都想知道到底係咩人將佢哋帶嚟呢到。
一個身材矮小嘅西裝男人慢慢走入班房，樣貌平平無奇嘅佢，唯一令人注目的就係西裝上面嘅黑白間條。
「大家好，相信大家都仲未意識到自己嘅處境，啱唔啱?」西裝男人咧嘴一笑。「不過唔緊要，先自我介紹，我係你哋嘅班主任，大家可叫我做Mr. T。」
「Mr. T？點會有咁奇怪嘅名？」我低聲自言自語。
隔離嘅Luna聽到我咁講，即刻就吐槽:「你有咩資格話人個名奇怪。」
班房裡面嘅其他「同學」都紛紛起哄起嚟，討論眼前呢個奇怪嘅人，又或者分享自己嘅情報。
只有一人舉手發問，他正是Ray。
Mr. T微笑，然後伸手示意接受提問。
Ray冷靜提問:「你話你係我哋嘅班主任，但係印象中我哋應該唔係呢間學校嘅學生喎，究竟係咩一回事?」
Mr. T保持微笑回答:「呢個問題同之後嘅所有問題都會有答案，但唔係而家。」
Ray冷靜道:「既然你係冇心解釋清楚，咁都無謂講落去，我哋走啦。」
Mr. T依然保持笑容，但係唔知點解，佢溫和嘅笑容慢慢令人覺得心寒。
「如果你哋係打算離開，我唔會阻止你哋，但後果自負。」
Mr. T以近乎恐嚇嘅語氣回答Ray，尤其係「後果自負」呢四個字，真係令人不寒而慄，搞到成個班房嘅人都靜晒。
Mr. T依然保持一貫微笑繼續講落去：「正如周文浩同學所說，呢到係一間學校。」
周文浩應該就係Ray的全名，而佢而家好似因為對方知道自己嘅名而覺得驚訝。
「而你哋就係呢間學校嘅學生。」Mr. T補充一句。
「我哋幾時做咗你學生?」
「快啲放我哋走，如果唔係我會報警!」
「同學」們再次起哄，但係Mr. T仍然以一笑置之。
「各位同學，請你哋搞清楚，我從來冇話過唔比你哋走，只不過後果自負。」
Mr. T冷笑一下。
「哼，我先唔會比你拋窒，有邊個想跟我走。」一個高壯的男學生企咗起身，然後行到Mr. T身邊鼓勵班上其他同學一齊離開。
各人面面相覷，猶豫不決。
最後只有兩男一女行出自己位，打算一齊離開。
Mr. T保持微笑再次提醒:「鍾兆龍同學，如果你帶佢哋走，我唔保證你哋嘅安全。」
即使咁樣，高壯男同學依然堅持打開了班房大門，步出門外。
「再見。」Mr. T目送四人離開嘅時候，揮手告別。
「剩低二十人，歡迎你哋願意留低。」佢向我哋鞠躬。
「不過好遺憾，你哋啱啱錯過左一次離開呢到嘅機會。」
不懷好意的笑容，就好似獵人成功捕獲獵物之後會露出嘅表情。
心寒、不安等等唔舒服嘅氣氛喺呢個課室漫延。
呢個時候，又有一個男人打開左班房房門。
所有人都凝視住呢個男人，因為佢真係非常古怪。
佢比起矮小嘅Mr. T更加矮，身高大概只有一米四左右。
四肢非常幼細而且異常扭曲。
最令人吃驚嘅係佢臉上異常亢奮嘅表情，通紅嘅雙眼盯得老大，抿緊的嘴角流出一絲口水。
「好恐怖…」Luna拉住我嘅衫角。
「歡迎我哋嘅校長。」Mr. T對那人鞠躬，然後向我哋作介紹。「馬景攸先生。」
掛住一副驚人嘅樣，但係個名反而咁正常。
我不期然笑咗出嚟。
「你喺到笑乜嘢。」Mr. T收起笑容，紅都面晒咁指住我。
馬景攸亦都行到我嘅側邊，用憤怒嘅眼神怒盯住我。
不過，我竟然唔覺得不安，反而覺得相當親切。
到而家我依然好似個局外人咁，完全唔知發生緊咩事。