簡介

相信大家有睇過葉念深作品嘅,都聽過一句說話 「呢個世界咩都係掩眼法,你睇到既野未必係真,真既野你又未必睇到 。」呢句說話係現實其實真係好應景。點解我咁講?我體驗到。



小女子二十中旬,做左好多年單身狗,拍拖既時間加加埋埋都吾夠一年半,原因就後話啦。我化左妝都算呃到下人,未化妝就吾好提啦。其實一直都有追求者,最多既,就係已經有女朋友既追求者。可能正正常常又一直冇拖拍,令到好多人以為有好機會。不同既故事就係到開始講起,為免被人認出或揭發,引起家變,我會稍作刪改。

第一章

John係我一個臉書三吾識七既朋友,由我舊臉書賬號開始,就不斷發交友邀請,發到去我新賬號,又發訊息,我就求其加左佢。佢之後亦係不停發hihihihi。咁我當然冇理過佢,三吾識七都要應我咪好忙?

好耐之後,我同人合夥諗住搞網上生意,咁岩佢又hi我,我就把心一橫想搵佢幫手。佢當然係好踴躍啦,又話一定幫又話幫我問人之類。最尾我冇搞到,但都記得個時呢個人支持過我,咁心入面都有小小多謝佢。

個時差吾多臨近我生日,佢就借啲意話要幫我慶祝,約我出黎食飯。其實我真係吾想架,見網友好老土架ma! 但吾出又好似哨完鬆咁。



咁求其出黎食餐飯啦。佢一見到我就係咁讚我真人好有氣質靚過上鏡,又問我搭地鐵有冇好多人望住我之之之類......都幾誇張。席間我地都傾得埋既,有講但冇笑,一般傾計。咁佢就都有提自己有女朋友,我有啲驚訝,有女朋友咁得閒約女仔食飯??

然後佢又主動講埋女朋友係點識,係係WeChat 個搖一搖搖出黎。第一次出黎食完飯,佢拖住個女仔隻手,咁就一齊左,都幾簡單。我仲睇左個女仔張相,同佢一個餅印,好有夫妻相。

後來,佢就開始話覺得個女仔吾夠靚,想搵個再好啲既。

食完飯行緊出去既時候,我feel到佢手有少少掂到我手,我馬上就縮開左!!竟然想用同一招.....?
已有 0 人追稿