[年齡無界限] 就係咁，我最近出席好多喪禮: ２　紅色的按扭

同剛剛講嘅一樣，我係一個果頭近嘅阿伯，自不然身邊嘅朋友都有返咁上下年紀。講真，人真係好化學，有時我見有Ｄ朋友老當益壯咁款，都可以無啦啦唔見左幾日，然後係另一個朋友口中得知原來果位朋友已經去左。

第一次發生咁嘅事會有少少激動，果陣諗住只要發生過好多次之後就會麻木，但人心肉做，點可以話麻木先得架。

每次聽到呢Ｄ消息，都會好感慨點解一個人，尋日仲可以坐係你旁邊有講有笑，甚至嗌交，但第二日，旁邊個座位就留空左先得架。

我記得係我朋友圈入面，第一個走嘅朋友並唔係咁熟，但係果種心情都係好忐忑。果位朋友係選擇左火化後將自己嘅骨灰撤落環保花園度。

佢算接受度高架拿，好多我呢一輩嘅人都唔想火化，但係佢就話唔想煩咁多，生前已經為佢家人帶左好多煩惱，唔想死後都要再煩到Ｄ仔仔女女。





我好記得係火化果一刻，當個禮儀師叫佢Ｄ親人行去一條放左佢副棺木嘅輸送帶上面，係一個機器旁邊企好，然後按照個禮儀師嘅指導下按下果粒紅色制。

輸送帶郁動，棺木慢慢咁運入去，我望住按制果Ｄ親人，佢地都好唔忍心咁按下果粒制，甚至佢地都唔係好想望住果副棺木入去。

唔知，到我訓係入面果陣，會係邊個幫我按下呢一粒制呢？