其實,係呢個時侯見到佢地,都幾尷尬,不過,有珍妮呢個咁心直口快嘅人係度,尷尬好快被打破。

「阿伯,果個就係你個仔啊?咁大個人都無咩責任呢嘅?」佢一開口就咁問,小段聽到就輕輕推一推佢,但佢就無理到,繼續佢嘅肆無忌憚,「咁係嘛,頭先阿伯都有話果個男人成四十歲人,但做野都咁吊兒郎當咁。」

珍妮講嘅野,都岩嘅。

「唔好意思啊輝爺,因為頭先我地坐附近,所以聽到少少。」小段唔好意思咁對我講。

「邊至少少啊,聽晒咁滯啦。」珍妮呢個人真係毫不客氣,本身企係度嘅佢坐低左,然後話:「我比左果幾份工都係好適合佢,佢竟然話一份都唔岩,浪費我嘅時間。」





「可能……佢覺得唔適合呢。」點解,點解我會為龍仔搵借口……因為佢係我個仔,就係咁簡單。

不過,珍妮嘅心直口快,「阿伯,你仲為左你個仔搵借口,佢唔幫得架,再幫嘅話唔會改架。」

呢一句,正中我心處。

「喂!妳唔好咁八掛好唔好啊。」本來企係度嘅小段,都坐左落嚟對珍妮話:「呢D係人地嘅家事,妳就未理啦。」

「唔得WO,咁我而家知道左,點都要發表下我自己嘅意見啦,而且阿伯叫我搵工比佢個仔,如果佢個仔係個咁吊兒郎當嘅人,我仲點搵工比佢啊。」





「妳第一次見人,妳又知晒人地嘅野嘅。」

「睇人,第一眼就睇得出性格架啦。」

「妳有無咁勁啊,咁妳第一眼睇我係個咩野人?」

「係一個見錢眼開嘅人囉。」

我聽到珍妮講呢句後,笑左出嚟:「係啊,我第一眼見到小段,都覺得佢係一個見錢眼開嘅人。」





珍妮見我都咁講,一副理直氣壯咁話:「你睇,連阿伯都咁講你啊。」

「小姐,其實你可以叫我輝爺,唔駛下下都阿伯咁叫我。」我同珍妮講。

「咁你係阿伯WO。」佢嘅回應,我真係唔知點答好。

用左當個鐘,小段先令到珍妮改口叫我做輝爺,見到佢地兩個,就好似見到一對識左好耐嘅朋友一樣,打鬧講笑,不過我睇得出,係小段嘅眼神入面,唔止咁簡單。
已有 0 人追稿