[年齡無界限] 就係咁，我最近出席好多喪禮: １０４　買情報？

「而家有機會榮華富貴，你唔係想我放棄呢個機會掛。」小桃紅果日既說話，我到而家都仲記得。

我同小段急步緊行，而天語就係身後面不停咁跟住我地，「輝爺，唔好行咁快啦，你係未知道Ｄ咩野啊？」

佢已經跟左我地幾條街，但我都無理過佢，我而家終於明白點解有Ｄ明星比一大班記者跟住會發咁大脾氣，我而家只係比一個記者跟住都已經想打死佢。

唔係有小段係度按奈住我，可能我已經大巴大巴咁昇佢。

不過……





「輝爺，唔通你唔想知我查到Ｄ咩？」天語呢一句說話，我停低左，而小段黎唔切反應差Ｄ跌親。

我望住賊笑緊既天語話：「你查到既野？」

天語就話：「如果你想知，我可以話比你知，不過你要話比我知你頭先講果份報告係Ｄ咩野黎。」

小段聽到天語既說話後，拉一拉我，「輝爺，唔好啊。」

有一刻心動既我，如果唔係有小段既說話，可能我一早就已經答應左天語既條件，我回頭唔理天語既說話，繼續急步走。





「喂！喂！唔好走住先啦。」天語仲係身後不斷跟緊，「我可以比錢黎架，當買情報。」

「錢！？」今次係到小段突然停低，而我就差Ｄ跌親，「妳可以比幾多錢先。」

呢次我既回望，我唔止見到天語既賊笑，仲有小段既烚熟狗頭既笑容。

「你地覺得你地既情報值幾多錢？」天語問。

「三……」「死仔包！頭先叫我唔好講！而家你見錢開眼啊！」我一野打左落小段個頭度，然後拉開左佢。





「我Ｄ錢啊……」小段悲壯既呼喊聲下。

「喂，我真係可以比錢你地架。」天語不停既糾纏。

而係一個暗角，果位南亞青年拎住我份報告，露出一個意味心長既笑容。