[年齡無界限] 就係咁，我最近出席好多喪禮: １２８　然後……（補返更新）

如果真係有果種不祥之兆，我好希望係發生係我身上，但估唔到係到最後，真係應驗左。

送完小桃姐同龍仔上小巴走之後，我見到一架ＶＡＮ仔跟住佢地架小巴，咁其實有車跟係小巴尾唔係一件好奇怪嘅事。

只不過，我望入ＶＡＮ仔入面，見到阿里坐係司機位旁邊。

佢手上面拎住一Ｄ野……

一開始我睇唔清……





佢將手上果舊野拎一拎起，我見到係一把曲尺……唔係一把曲左嘅尺，而係一支別名叫「曲尺」嘅槍，而阿里呢個時候好似傾緊電話，佢表情唔多好咁。

見到佢拎住把曲尺，我諗起細路祥同我講過嘅野。

……唔係你果單，應該係佢果班人接左單買兇殺人……

再望一望真，見到阿里指一指龍仔佢地坐緊嘅小巴，向司機位嘅人講左幾句，點左幾下頭。

危險！！！！！





我腦入面只有呢兩個字！！！

我即刻截左架的士，「跟住前面架車！」我無諗過只會出現係電影嘅對白竟然係我把口講出黎。

如果真係買兇，都唔好傷害到龍仔啊。

如果真係買兇，究就點解架ＶＡＮ仔要跟住小巴……等等！？唔通個有錢佬想買兇嘅人係龍仔！？

佢可能係佢親生架ＷＯ！點解要咁做！？





一大堆問題伴隨住我嘅緊張，我而家只可以望住眼前嘅ＶＡＮ仔，只希望唔好出事先好，但係，上天好似將一切都控制住一樣。

自古小巴司機都唔妥的士司佬，有一架的士ＣＵＴ線爬左龍仔坐緊嘅小巴嘅頭，就一係個咁簡單嘅動作，小巴司機無順氣反爬頭，釀成今次嘅交通意外……而且係四車連環相撞。

果四架車有一開始爬頭嘅車、龍仔同小桃紅坐緊嘅小巴、有阿里嘅ＶＡＮ仔、以及我坐緊嘅的士。

撞車果一刻，天翻地覆，到我有少少意識果陣，只見到係我眼前阿里架ＶＡＮ仔反左，佢同佢Ｄ朋友爬左出車後，因為ＶＡＮ仔漏油著晒火，而我就被個的士司機拉緊出車……

然後……眼皮好重……

然後……好似有人抱起左我……

然後……聽到一聲震耳欲聾嘅爆炸聲……

然後……然後……