[年齡無界限] 就係咁，我最近出席好多喪禮: １３１　報告的後果

佢地三個走左之後，得返我同一個同室嘅病人，我訓係床上面回想返成件事，由發生到而家，所有事都係天語口中果位富豪搞出黎嘅？

但我唔明點解果個富豪要搞咁多事。

仲有嘅係，細路祥口中所講嘅買兇殺人，究竟佢嘅目標係邊個？

雖然我得知龍仔係我親生仔我好開心，但今晚我帶住一切嘅疑問入睡，究竟呢件事幾時先會完。

可能上天知道我呢個想法，第二日一大早，我一張開眼就見到好多差人企左係我面前，當中仲有銅ＳＩＲ係度。





「輝爺，我地捉到果班人，但係想你幫手協助調查。」銅ＳＩＲ話，而我心中有一種忐忑嘅心情。

我點解會忐忑？我唔知，我只知道我著好晒衫，連屋企都未返就去左警署認人。

係玻璃窗前面，好幾個南亞人但係我面前，個個都拎住個號碼牌，而其中一個人，就係阿里。

……輝爺你可唔可以幫下阿里手，如果佢比差人拉左，落口供果陣幫佢講一兩句好話啊……

我腦海入面不停出現細路祥講過嘅說話。





……仲有，阿里救我嘅畫面……

「輝爺，如果有認到邊個似搶你份報告嘅人，直接講出黎就得。」銅ＳＩＲ話，而我呢一刻係企係阿里嘅前面。

我同銅ＳＩＲ對望左一眼，由佢嘅眼神中，我知道佢一早已經知道阿里就係搶報告果個人，呢一次認人只係一個程序。

「輝爺，點啊？」佢再問我一次。

而我……「認唔到。」答左佢呢三個字。





銅ＳＩＲ微笑左一下後低下頭，「咁好啦，多謝你合作。」佢行到我身邊，搭一搭我膀頭係我耳邊話：「呢個青年……」佢所講嘅係阿里，「之前搶過你嘅野屈你錢，今次搶左你份報告，但係佢到最後救返你，可能係一種緣。」

係，可能係一種緣。

「仲有……」銅ＳＩＲ又話：「我地係出事嘅車上面，搵到一份報告，經過驗證係你被搶嘅果一份，但係，報告嘅結果已經比火燒到睇唔到。」

可能，一切都係緣，上天唔想比我知道份報告嘅結果，但係就用左另一個方法比我知道個答案。

臨離開前，我問銅ＳＩＲ，「你地跟住落黎會點做？」

銅ＳＩＲ深呼吸一口氣，「呢單野，背後仲有好多事情連住，接落黎就交比我地慢慢查。」