[年齡無界限] 就係咁，我最近出席好多喪禮: １６１　第二個家

但有時，唔係你自己想唔理一件事，果件事就真係比你唔理。

同小段分開走後，我不停諗緊佢問我嘅問題，諗諗下好快就已經返到自己屋企樓下，但一到樓下，我就發見到阿里爺爺好慌張咁走到我面前話：「輝爺，頭先我見到你屋企前面有幾個人行黎行去。」

「阿里爺爺，日日走廊都有人行出行入架啦。」我話。

「唔係啊，係你門口來回行左好多轉，好似搵緊野咁架。」阿里爺爺話。

見到神色咁慌張，講到好嚴重咁，整到我都有小小驚驚地，「……果Ｄ人係點架？」





「著晒西裝，戴晒黑超，耳仔上面仲有部機，成日口ＵＰ　ＵＰ又聽唔到佢地講咩……就好似有套捉外星人嘅電影咁架！唔通輝爺你屋企有外星人！？」阿里爺爺話。

我真係好佩服阿里爺爺嘅想像力，不過聽到佢咁講，我都覺得係我屋企門口前面行黎行去嘅人一定唔會係善男信女。

雖然，我覺得呢Ｄ人做到咁出面係好白痴，但係如果係特登做比我睇嘅話，睇黎我今日都返唔到呢個屋企。

咁……點算好？

「輝爺，不如你去我度住先啦。」阿里爺爺話，其實我聽到佢講我好感動，因為識佢唔係幾耐，但係我又諗起其實佢同我住同一層，咁我去佢到住同返我屋企其實都係一樣……





「咁如果你唔去我度，仲可以去邊ＷＯ。」阿里爺爺話，而我呢一刻掃過好多個人名，直到其中一個，我先醒起，其實我仲有第二個家。

「我會去我個女度。」我話。