「奇幻，純愛」《我，總是會愛上妳》: 禁忌

「佢地三個就交俾你啦，幫我好好照顧佢…」

「嗯，放心啦，我一定會，所以你就…」

「嗯，我都知道你會，因..為..我..地..係..」

所有野都要追溯返去三個月前。

呢三個月發生左一件事，一件令人感覺非常複雜既事。



大家好，我係魯路修，今年三十幾歲。

我有個同我同年既老婆叫Cherry，仲有一對仔女，個仔就叫Chase，個女就叫Nicole，佢地兩個都係七歲。

我地一家四口一直都過住D好開心既生活，可以話非常幸福。

睇住對仔女大，入埋小學讀書，果種感覺真係難以用筆墨去形容，一定要形容的話就係幸福囉。

不過，我成世人都係咁幸福架啦。



可以同Cherry經歷一段如此深刻而又美滿既愛情，我簡直就係呢個世上最幸福既人。

而家我都會經常諗起當年同佢經歷過既事，我都會忍唔住笑出黎。

因為果一段日子，實在太開心。

嘛，唔係話而家唔開心既，只係人大左就容易想當年啫。

啊，係喎唔記得講添，我而家叫做有一間小公司，接下job做下廣告咁，可能因為同事們做得野，我自己就覺得好輕鬆。



基本上我自己就唔洗成日返公司既，所以我就有好多時間陪佢地，接送仔女返學，買餸煮飯呢D野係大部分時間都係我做既。

可能你會問咁Cherry呢？Cherry而家都要返工，仲忙過我好多好多，晚晚都要九點先返到屋企。

見到佢咁忙，我都唔好意思要佢再煮埋飯，於是我幾年前就的起心學煮餸，萬幸既係成績都唔錯，佢地都話好食。

就係咁，日子一復一日咁過，呢種平淡而充實既日子好似永遠唔會完咁。

至少我開頭以為唔會咁快就完。

我唔敢同佢地幾個講，怕佢地受唔住呢個衝擊，就連我家姐美星我都無透露半句。

尤其係Cherry，我真係唔想再見佢傷心難過既樣。

至少唔好比我見到。我見到我個心一定會好痛好痛。



你可以話我自私，但我咁做係因為我愛佢地…

我只係自己一個默默咁承受，自己去面對。

可惜既係，苦無對策。

我唯一可以做既野就係好好咁同佢地過好每一日，就係得咁多。

好似今日咁，我地又約左成班中學同學出黎食飯敘舊啦。

之所以用個又字，係因為我地一直都保持聯絡，仲經常約出黎。

每次見到大家都會諗起以前大家既樣，好似會有個幻影係旁邊咁。



Jason：「喂晨哥你就勁啦，而家連醫療都玩埋一份，仲一黎就出哂名咁。」

哦？真不愧為晨哥，做咩都咁勁。

晨哥：「哈哈，又唔係我發明既，係我有份投資研發啫，再講呢個技術到而家都仲有好大爭議，尤其係果班道德撚，真係麻煩。」

Cherry：「我無太留意新聞，其實晨哥你研究緊D乜會牽涉到道德層面既？」

晨哥：「哦，其實係有關細胞既研究啫，我地既團隊研發緊一種細胞，可以同病人自己細胞完美融合既細胞。」

「若然呢種細胞完成的話，係醫療上既一大突破，要再生返一隻手，一隻腳都唔係問題。」

師父：「哇你咁講咪即係火影入面既柱間細胞？好勁喎，點解無啦啦會做呢方面既研究。」

柱間細胞…？



晨哥：「嘛，要簡單解釋就係咁囉，點解？eh…早排我朋友屋企有人出左事，咁岩佢本身係做開呢方面，所以佢就研發啦。」

「最後呢個研究未完成佢屋企人就好返，但係佢就繼續落去，防患未然咁話。」

或者…晨哥可以幫到我…

就係因為呢段對話，呢餐飯我無辦法開心暢快咁食，亦因為咁我比晨哥捉住左。

晨哥：「喂你搞乜呀，成餐飯都古古怪怪咁，係咪等錢用？」

我：「唔係，雖然我錢唔算多，不過都係夠用既。」

晨哥：「咁你係咪有咩事，大家兄弟唔怕老實講喎，幫到既我一定幫。」



既然你都講到咁，我都唔好意思扭扭擰擰。

我：「晨哥，我可唔可以拜託你一件事？」

「用你而家研究緊既細胞複製一個我。」