Cherry:「點呀你?有無事呀?洗唔洗同你去睇醫生?」

我:「無事呀我,只係個頭突然有D痛啫,唔洗去睇醫生咁麻煩。」

Cherry:「um…係咪真係無事架,等我睇下你有無發燒先。 」

佢講完就將一隻手放係我額頭,另一隻手放係佢自己額頭上面,仲擺出一個相當困惑既樣。

Cherry:「好似有燒但又好似無…點好呢… 」



哈哈,見到佢咁困惑既樣就好想笑。佢咁既樣真係好得意好可愛,一個已經三十歲既女人居然仲好似一個十幾歲既學生妹咁。

我輕輕咁捉住佢放係我額頭既手,慢慢咁移開佢。

我:「真係無事呢,而家再陪你繼續行都仲得啊! 」

Cherry:「係咪啊!咁…算啦唔好啦!我地返屋企啦!順手去買埋餸!」

我:「真係唔行?咁你今晚想食乜? 」



Cherry:「唔行喇唔行喇,今晚我煮!所以唔洗你買餸。」

佢一邊講一邊拉我走,好似好趕時間,想儘快離開呢度咁。

其實我係知道,佢係擔心緊我,佢怕我仲係唔舒服,所以先話走。

魯路修,你真係好幸福,有個咁錫你既老婆。

如果佢知道左我唔係你,佢會點呢。



算喇呢個真係一個相當危險既諗法,都係唔好再諗。

咦,個D係…?

我:「個兩個人係…? 」

Cherry:「唔?哦!係我地既師弟妹喎!估唔到套校服仲係十年如一日,都唔會轉款既。 」

呢對著住校服既小情侶令我諗起我…唔係,係魯路修以前同Cherry係中學個陣拍拖既事。

如果我都可以親自經歷一下咁就好喇。

我硬係覺得而家既我咩都唔係。

只係一具裝有人地記憶既容器。



陪佢買完餸,返到屋企,我被佢勒令咩都唔準做,好好咁坐係梳化休息。

咁都好,我可以趁呢個機會好好整理一下經常出現混亂既思緒。

我開始係度問自己一個問題,其實我係咪妒忌緊魯路修?

有佢既記憶,用佢既身份去扮演佢陪伴Cherry令我開始有咁既諗法。

佢真係幸福到不得了,佢身邊既所有人都對佢好好,屋企人,朋友,就連仔女同學既家長都係。

唔知我日後,唔再用魯路修既身份生活既時候會唔會遇上肯咁對自己好既人呢。

Nicole:「Daddy我返黎啦!~~ 」



哦?兩個細路返左黎了,我又要開始扮演一個好爸爸了。

我:「乖~去洗手先啦。」

Nicole:「知道,今日美星姑媽帶左我地去好多地方玩啊,我一陣話你知我地去左邊度玩吖。 」

我:「好好,我等你。」

呢個細路女認真可愛。

Nicole已經動身去廁所,但Chase仍然企係原地,用對令人好熟悉既死魚眼望住我。

我:「Chase 」

Chase:「你,到底係邊個。」



死啦…唔通我既身份已經比佢識穿左?

唔係吖應該無乜可能架,如果係的話都唔應該係呢個𡃁仔發現,應該係Cherry佢地發現先架。

呢個𡃁仔會唔會只係係度同我玩d咩遊戲咋?

我:「Chase,我唔係咁舒服啊,下次先同你玩啦,俾我自己一個抖下啦。」

Chase並無答我,而係一下咁坐係我旁邊既位置,用只有我同佢先聽到既音量講野。

Chase:「邊個同你玩,答我既問題。」

佢既眼神非常認真,甚至有少少晨哥認真mode既feel。



佢真係知道左?點解既?

我:「我咪你老豆…」

Chase:「無人可以係我面前講大話,放心,我無同任何人講呢件事。」

呢個細路,明明只要一個小學生,竟然成個大人咁既款。

不過睇佢咁既款應該真係唔似開玩笑。

到底佢係點樣發現架呢…

我沉思左大概一分鐘,最後做左個決定。

我:「你同我入黎書房,我同你講哂成件事。」

已經瞞唔到呢個細路啦。

入到書房,閂埋鎖埋門確保無人可以入黎之後我就同佢坦白承認。

當然,有D野無講啦,話哂佢都只係一個細路,有D野怕佢接受唔到。

我講左另一個較為容易接受既版本比佢知,大概就係話魯路修有D事暫時需要離開香港,但又唔想佢地擔心,所以叫我黎照顧住佢地先咁。

佢聽完之後點左兩下頭,正當我以為佢已經接受左呢個講法個陣,佢突然爆左一句野出黎。

Chase:「你而家係咪覺得我好好呃? 」

屌你吖…

對住呢個細路真係好想發脾氣,佢個種摟屌既語氣真係幾好脾氣既人都會嬲。

Chase:「老豆佢..應該係病左?」

我聽到咁即係打左個突,佢連呢樣都知道?

我:「喂你到底知道幾多…」

Chase:「果然係咁..我其實係早排已經注意到。」

「老豆佢周不時會咳得好厲害,好似想連個肺都咳埋出黎咁。」

「仲要有時會用一種好奇怪既眼神去望我地,好似電視劇入面D就死既人咁。」

喂大佬,聽講你只係七歲咋?你居然有咁既觀察力同分析力?

不過就算佢知道魯路修有病都好,應該唔會聯想到我唔係魯路修架?

我:「咁你係點樣發現我…」

Chase:「因為你扮得唔夠似佢囉,同埋因為我見到今日美星姑媽既反應好怪所以就得出呢個結論啦。」

美星?我扮得唔夠似?哇屌一時間好多問題添。

Chase:「我老豆佢呢,其實唔鐘意食拿破崙意粉,所以一定唔會煮,但你之前煮左。」

SHIT。

佢唔講我真係唔知。

Chase:「同埋你對我阿媽既態度好怪,好似大家係陌生人咁。」

唉呢樣野我都知,我自己都覺得好辛苦,唔知點好。

Chase:「最後就係美星姑媽,佢今日都好古怪,心神恍惚咁,仲要一聽到家姐提起老豆就好大反應,我就知道有事。」

「啊,其實我果日聽到你同美星姑媽講既野架,只係當時我未知道係代表d乜,而家諗返就一切明白了。」

呢個𡃁仔,非同少可啊…

我:「魯路修有無帶你去check IQ?」

Chase:「佢有提過架,不過咁麻煩,都係唔好搞我。」

怕麻煩呢點真係似足魯路修…

Chase:「好喇,而家又到我問喇,你到底係邊個,點解會同我老豆一樣樣?我老豆而家又係邊度?」