「奇幻，純愛」《我，總是會愛上妳》: 抱歉
假既老豆..啊？
佢又無講錯既，我的確唔係佢真正老豆，所以話係假既我都唔會怪佢，因為係事實。
而家咁諗，我好似咩都可以當係假咁。
身份係假既，只係用魯路修既身份去過生活。
以前既記憶亦都唔係自己既，全部都係魯路修既。
咁我到底有乜野係真架呢？
Chase：「哥哥。」
哇屌，呢個細路幾時出左黎架？我完全留意唔到既。
我：「傾完嗱？咁我地都差唔多要返去啦，出黎太耐會比人懷疑架。」
我轉身行左兩步，感覺有D唔係好妥，於是擰轉頭望下，發現Chase佢仍然企係原地。
佢頭dup dup咁，應該係有野想講。
我唔知邊度黎既心思，慢慢咁行返埋去佢度。
我：「係乜有咩事呀Chase？」
Chase：「老豆叫我同你講Sorry..
」我：「Sorry？做乜野事要講Sorry呀？」
Chase：「我之前唔應該咁同你講野，唔應該話你係假…」
哦，原來係呢件事。
其實係帶佢黎呢度之前，我有同佢傾過，主要都係清清楚楚真真正正咁同佢講返成件事。
交代左我到底係咩人，魯路修既情況等等。
我仲千叮萬囑咁同佢講叫佢唔好同Cherry或者Nicole講，唔想Cherry佢地擔心。
結果換黎既係一句說話。
「關你咩事啫！你當自己係咩人？你係假架咋！」
頭先我就係係度諗緊呢句野。
我：「無啊，我無放係心，你唔洗道歉喎。」
童言無忌，又何必同佢計較呢。
Chase：「老豆同我講左喇，呢段時間就麻煩你照顧住媽咪同家姐啦。」
我：「放心喇，我之前就已經應承左佢一次，一定會做到，連你我都會照顧好。」
Chase：「我就唔洗啦，我自己可以照顧自己。」
放屁，七歲人仔講咩自己照顧自己，當年我都係中二先自己一個人過啦。
啊又講錯，係魯路修先岩。
我：「咁好喇，咁不如你同我一齊照顧你媽咪同你家姐？你都知我扮魯路修扮得唔夠好架。」
Chase：「我老豆都同我講左喇，我會幫你手架啦。」
佢收起佢果個細路樣，擺返之前個個老積樣出黎，搞到我哭笑不得。
我：「咁就拜託你啦，好喇我地返去啦。」
Chase：「啊，唔記得再講添，我老豆話想同你講兩句。」
佢想同我講兩句？
我：「咁呀，你企係度等我一陣啦。」
Chase：「快D喎，我唔想企咁耐，好麻煩。
」我：「得啦我會儘快。」
我之後就行左入房，見到魯路修。
見到佢好辛苦咁捉住自己心口。
Lulu：「快D閂門先…」
我照佢講既說話去做，急急腳閂左道門。當門閂埋左之後，佢睇落終於鬆一口氣。
明明佢無講任何一句野去描述自己既情況，但我好似知道哂所有野咁。
佢咁急叫我閂門係因為佢唔想比Chase見到自己而家既樣會擔心。
我：「辛苦你啦真係。」
lulu：「點可以係自己個仔面對擺個病樣出黎吖，唯有頂硬上囉。」
「不過好奇怪喎，頭先同Chase佢一齊個陣我真係無唔舒服架喎，係佢出返去之後先開始痛。」
我：「可能係親情既力量囉。」
lulu：「可能係啦，哈哈…」
我：「咁…你想同我講D乜？」
lulu：「嘛…都係想同你講聲對唔住囉。」
我：「你個仔岩岩同我講左啦，我真係無放係心呀。」
lulu：「唔係呢件事，各方面都想親口同你講聲對唔住。」
各方面係指..？
「我最近係度諗，我真係好對唔住你。」
「咁樣創造左你出黎，又要迫你去過我既人生。」
「其實你會唔會好憎我？」
…
一時之間，我真係唔知點講好。
真係好多野想同佢講，好多野想問。但又唔知應唔應該講好，就算係，亦唔知應該係邊問起好。
唉…真係麻煩啦今次…
lulu：「你真係同我一樣…連諗野都係一樣。」
我：「吓…？」
「唔知你記唔記得，以前晨哥話過我太顧人感受，將自己排得太後，睇黎你都係咁。」
「不過對我就唔洗啦，某程度上黎講我同你可以話係同一個人，所以唔洗顧慮太多。」
咁佢都講到咁，我就唔怕講啦。
我：「如果我鐘意左Cherry，你話點好？」
lulu：「係啊…你鐘意左佢啊…」
我：「唔係…我只係…」
lulu：「佢的確係一個好好既女人啊可？直頭好似天使咁。」
喂，等一陣啊，俾人講埋d野先呀屌你！
Lulu：「所以你會鐘意佢我唔意外呀，佢真係太好。」
去到呢度我真係忍唔住，打斷左佢既說話。
我：「喂大佬而家我鐘意既講緊係你老婆呀！唔係話係你家姐或者你朋友呀！你甘心你老婆就咁比另外一個男人搶走？」
明明我只係講下，想知道點解佢忍心交自己老婆比另一個男人照顧，點知居然講到嬲。
我開始愈來愈諗唔明佢到底諗乜，佢而家直頭好似想送左個老婆比人咁。
Lulu：「唔甘心又可以點啫，你都有眼見架，我而家只可以訓係度等運到。」
「我自己知自己事，或者我真係撐唔到咁耐…」
「所以你咁同我講我反而更加開心，俾我知道就算我死左都會有人好好照顧Cherry…」
我個心又開始莫名其妙咁痛起上黎。
而家咁睇，比起上次佢好似瘦左少少…
我：「晨哥佢地唔係已經幫你…？」
lulu：「嗯，不過我諗我自己挨唔到咁耐啦。」
佢好似已經完全放棄左希望咁，好豁達。
我：「喂我頭先只係講下咋，我無…」
lulu：「哈哈..我知你諗乜，你想知我點解可以咁放心交個老婆比人嘛。」
「你知道我最唔想發生既事就係佢喊同傷心架嘛，所以最好就係佢連我死左都唔知，一直開心咁過落去。」
我：「咁如果到時我真係同左Cherry一齊而你又好得返…」
lulu：「唔好諗咁多假設性問題啦..順從自己既心就可以。」
「走喇，Chase應該已經唔耐煩架啦。」
魯路修你呢個人…