「奇幻，純愛」《我，總是會愛上妳》: 感動
佢咁講得，即係佢一定係識得魯路修啦。
等我諗下先，呢個女仔…短頭髮…文青feel既女仔…無喎，我記憶入面無呢個人喎。
死喇，點算好呢，唔知佢係邊個的話好難扮架wor。
佢好似已經睇穿左我諗乜咁，笑住咁嘆一口氣。
女：「我都係剪左個頭髮啫，你咁就唔認得我啦魯路修？」
我：「哈哈…真係唔好意思呀，我記性比較差。」
呢個時候最好就係扮死狗，嗯。
女：「唉，你真係一d都無變，仲係咁傻仔，大哥你三十歲有多架啦。」
喂大哥，你鬧完就快d話我知你到底尊姓大名啦好嘛。
女：「唉，居然要同咁多年既朋友自我介紹，真係好尷尬。
」「我啊，Ada呀，Ada林穎欣啊。
」林穎欣…即係同Cherry一樣，以前都鐘意魯路修個個女仔..
Ada：「我諗我地都差唔多有成六七年無見啦。」
麻煩啦今次，居然偏偏遇上佢…
不過頭先佢話咩「同佢地傾完有無開心番D呀？」係咩意思？佢知道我既野？
佢係邊度知道我既野架？邊個話佢知？
Ada：「喂你未答我喎，有無開心返d呀。」
佢會唔會知道我唔係魯路修既事？唔係，佢應該唔知，如果唔係佢應該就唔會叫魯路修啦？
唔…會係邊個呢…
Ada：「喂！」
哇痴線咁大聲，想嚇死人咩大佬。
我：「大佬唔洗咁大聲既。」
Ada：「鬼叫你唔應我呀，你自己攞黎。」
啊，呢種對話既感覺我有印象，句句都比佢頂到行既感覺。
好喇，知道應該點應對啦。
我：「係咩Sorry囉，話時話你真係變左好多，我都認唔到你。」
Ada：「係咩？我都只係剪左個頭髮咋嘛，佢地都認得我。」
咁即係師父佢地都知道係Ada黎？無人講既？啊，肯定係肥豬既主意。
肥豬以前就鐘意Ada，之後仲做埋好朋友。
不過都只局限於好朋友。
我：「嘛，咁我知點解肥豬要黎呢度啦，你係呢度返工？」
Ada：「啊係喎你好似係第一次黎呢度，呢度其實係我開架。」
What the fuck? 間野係佢既？
Ada：「都係今年先開咋嘛，喂講左咁耐你仲係未答我喎。」
啊，係喎，我自己都無左回事添。
我：「你又知我唔開心？」
Ada：「唉呀你唔好成日用問題答問題啦，係Cherry講架。」
Cherry講？
Ada：「shit講左出黎添，算啦講埋佢啦，佢早兩日搵過Jason佢地，話你最近好似有d怪，想你班兄弟幫下手開解你。」
「你到底做乜啫？成個人感覺都好怪，好似另一個人咁。」
另一個人。我一聽到呢四個字成個人都嚇左一跳，即時好慌張。
佢睇得出？今次仆街了。
我：「咩呀我好怪咩，你頭先先話我一d都無變架。」
我故作鎮靜咁講，其實個心就慌到仆哂街。
Ada：「唔…我都唔知點講好…行為舉止都仲同以前一樣咁白癡，但種feel好奇怪，好似收埋左好多野咁。」
「Cherry話你出去做野之前已經係咁，返左黎都仲係咁，怕你工作壓力太大呀。」
「佢話怕自己開口問你會搞到更大壓力更辛苦，所以先搵你班兄弟幫手開解你，仲自己一個係你背後為你做左好多野，幫你手照顧對仔女，等你輕鬆d擊敗你睇下佢對你幾好。」
「不過佢以前就已經係咁架啦，對你好到不得了。」
Cherry呀..？佢原來係背後做左咁多野…
死喇，個心突然間好熱添…
Ada：「所以不如你講哂所有唔開心野出黎，等自己釋放左d負能量出黎，之後再開開心心咁返去見佢啦。」
…
突然間，我想講哂所有野出黎。點解會咁。
記憶中，Ada佢係一個幾守得秘密既人。
或者佢講得岩，講哂出黎個人可以舒服d…
我：「其實我…」
！！！
邊個搭我膊頭！？
我擰轉身一睇，之後成個人都呆左。
因為搭我膊頭既人，係晨哥。
晨哥：「喂，你兩個係度傾密偈唔預我？」
一個無諗過會係呢度出現既人。
Ada：「咦晨哥你又話忙唔黎得既？不過真係好耐無見啦我地。
」晨哥：「嗯，好耐無見啦Ada，嘛原本我係黎唔到既，不過突然間有d變掛，所以我就黎到啦。」
Ada：「哈哈..你講野仲係咁特別..點都好啦，歡迎光臨。
」「唔該埋單~」
Ada：「啊，我去做野先啦，你地兩個慢慢傾啦唔阻你地。
」佢講完就行左返去，留低我同晨哥兩個係度。
我係望完Ada佢離去既背影之後好自然咁望左晨哥一眼，但我好後悔我做左呢個決定。
因為佢啤到我行一行，係我記憶以來最恐怖既晨哥。我甚至對腳開始不由自主咁震起上黎。
應該係認真mode開到最盡…但係點解？點解佢咁突然開左認真mode？
晨哥：「喂，你到底想做乜。」
我：「唔係..我咩都無做…」
晨哥：「你想講哂成件事出黎？」
我一隻字都未講，點解佢會知…
晨哥：「你知唔知你咁做可能會將呢一個月黎既努力都白費？你咁做對唔對住魯路修？」
「魯路修對你咁好，仲將Cherry交托俾你，你想佢既心願失敗？」
魯路修，魯路修，魯路修，所有野都係魯路修。
點解大家都對魯路修咁好！
我：「咁我呢？」
晨哥：「嗯？」
我：「次次都係魯路修，你地有無諗過我？」
晨哥：「呃…」
我：「我都係人黎架…」
我講完之後就自己行左返去肥豬佢地度。
我：「喂我有D唔舒服，走先喇，下次再傾啦。」
我一路講一路拎錢出黎放係檯面，佢地四個都望住我。
肥豬：「喂魯路修…」
師父：「你個樣好唔掂喎…」
Jason：「洗唔洗幫你call的士呀？」
我：「唔洗，我無事，唔洗擔心我，你地enjoy啦。」
我唔開心，但只可以強顏歡笑。
以為自己終於可以抒發一下自己心情，結果原來都係唔得。
我開始想放棄。
我身心俱疲咁挨到返屋企，唔係，係魯路修既屋企。
唉，口𥚃說想放棄，但身體卻很誠實。
我都係想發洩下啫…
Cherry：「咦你返黎嗱？咁早既？
」我：「啊，係呀我返黎啦…」
已經無心情同無力去應付佢啦…
我一邊講一邊行入房打算拎d衫去沖返個涼等自己可以放鬆d。
係沖涼既期間，我諗左小小野，但係點都諗唔明。
明明我其實都叫做對晨哥抒發左我既壓抑呀，但係點解講完我反而仲唔開心？
我而家成個人都覺得好奇怪，唔識用咩字可以去形容自己既感受。
唔知我身份既人對我好好，好關心我，但反而知道我真正身份既晨哥既人對我就好差，逼得我好緊。
咁我既存在其實會唔會係不被需要？
如果有朝一日大家都知道左我既真正身份之後仲會唔會對我咁好？
如果我想大家一直都對我咁好，我係咪只可以…？
直至沖完涼，我都諗唔出答案。
沖完涼之後我並未直接去訓覺，而係自己一個坐左係廳度發呆。
我坐左幾耐我都唔知，我對時間既觀念突然間無哂。
我只係想沉浸係呢一個幽靜既空間到。
然而呢一片幽靜最後被一遍煙所打破左，我被迫咁離開我既沉思。
Cherry：「煮左個麵比你食呀，趁未冧之前快D食啦。」
又係佢..佢又自己一個係我背後做野…
我：「點解…」
Cherry：「Ada Whatsapp左我，話你係佢餐廳都無乜食過野，我怕你坐坐下會餓，咪自己煮個麵比你囉。」
言下之意即係我坐左咁耐佢就係唔知係邊度望足我咁耐..？
Cherry：「我唔知點做先可以解決到你既煩惱同令你開心返D，所以我只可以為你做呢D小事啦。」
我：「點解要對我咁好…」
Cherry：「你傻架？好耐之前已經講過啦，我想要你，仲有你既世界，所以你既一切都係我既，我梗係要對自己既野好啦。
」呢句說話其實好白癡，但我唔知點解聽到之後覺得好感動，眼淚仲開始湧出黎。
坐左咁耐，我終於企起身。但我並唔係行去碗麵度，我甚至繞過左碗麵。
我最後走到去Cherry面前。
錫左落去。