「奇幻，純愛」《我，總是會愛上妳》: 悲劇的序曲

晨哥：「一有咩事就食佢啦，你應該明我咩意思架。」

我：「嗯…我想問…」

晨哥：「唔？係咪有咩事？」

我：「唔係…只係我想知…我仲有幾多時間？」

晨哥：「唔好去諗呢d野啦，只會令自己辛苦，一定有辦法既。」



可惡…

-------------------------------分隔線-----------------------------------------

我：「喂傻仔lulu。」

lulu：「嗯？做乜呀？」

我：「我問你做乜就真呀，無啦啦成個人呆哂既。」



lulu：「嘛，只係有d野要諗下啫，無野既。」

「啊，我返一返公司先，兩隻野就交俾你啦。」

我：「返公司？咁今晚洗唔洗等你食飯？」

lulu：「um…唔洗喇，我自己食埋先返喇多數。」

我：「咁好喇，唔好做到咁夜呀記住。」



就係咁，我同兩個細路目送左lulu出門口。

難得我放假，仲諗住同佢出去行下街架嘛，不過算啦難得佢主動話要去公司做野。

佢都好似有一段時間無返公司啦。

咁而家我做乜好呢？稿又差唔多寫哂差個收尾，啊咁不如準備下lulu個生日party先。

場地就已經決定左，用美星姐間café，野食就叫到會，而家就係差請咩人同到時玩咩啦。

Um…請人都係請返個d架啦，唔知子琪朱雀佢地係咪香港呢？一陣打個電話先。

至於玩遊戲呢…

Nicole：「媽咪你係度做咩呀？」



我：「唉喲Nicole豬，媽咪係度幫你個傻仔Daddy計劃緊生日會呀。」

我見到Nicole行左埋黎，就抱起左佢，哇衰豬而家咁重既。

Nicole：「生日會？咁有無蛋糕架？我想食士多啤梨蛋糕~」

係喎！！生日梗係要有蛋糕架啦！！點解我會咁蠢無左回事架！  

我：「多謝你提醒媽咪呀Nicole豬~媽咪好蠢呀差D唔記得左蛋糕添！ 」

蛋糕…自己整有無得諗呢？

我諗如果到時佢知道個蛋糕係由我親手整的話佢一定會好開心架啫。



我記得佢好鐘意食一款芒果士多啤梨蛋糕，唔知我整唔整到呢？

Nicole：「媽咪？」

我：「好！決定左啦Nicole！我地一齊整蛋糕比Daddy好唔好？」

Nicole：「好呀好呀，不過我唔識架喎，點算好？」

我：「其實我都唔係好識架，但我記得我之前買左本教整蛋糕既書，我地邊學邊整啦好唔好？」

「Chase你都會幫手架可？」

我望向一直坐係另一邊自己一個係度玩ipad既Chase，我見到佢一聽到我叫佢佢就即時成個人彈起，好似做左虧心事咁。

衰仔，一定係打機又課金或者尋晚玩到好夜啦。無佢收。



Chase：「哎..整蛋糕咁難好麻煩架喎，叫我試味就無謂，整就不了。」

懶過鬼，似足老豆，由佢啦夾硬迫佢幫手都唔會有好結果，加上佢口味又同lulu好似，就比佢負責試味啦。

我帶住Nicole走入廚房，check下整蛋糕要用到既野齊唔齊，好彩要用到既都有係度，夠我試做一次。

之後就係去拎本蛋糕書…本書我記得之前交左俾lulu叫佢幫手放入書櫃話遲d先睇。

係邊呢係邊呢，幾個書櫃每個都有咁多書一時三刻真係搵唔到添。

哎點解會有咁多書架，真係麻煩。

Oops，學左lulu添哈哈。



噢，搵到啦，睇下係咪呢本先。

我係書櫃入面一下抽左本書出黎，哇d書排到密密麻麻咁，想拎一本出黎都難。

我揭揭本書，揭揭下就比我exactly搵到芒果士多啤梨蛋糕既食譜，睇黎連個天都想lulu食到我親手整既蛋糕。

好，而家即刻出去整下啦。

唔？好似踩到D野咁既？

我望一望地下，發現原來自己踩住左個公文袋。

啊我記得啦，個公文袋係頭先抆本書出黎個陣跌出黎，只係我掛住睇本書無執返起。

公文袋放係書櫃…入面會係咩黎架呢..？

會唔會係lulu偷偷地買左層樓呢哈哈？

我出於好奇，打開左個公文袋，拎入面既野出黎睇。

呢份係…身體檢查既report？點解…

Nicole：「媽咪你要去邊呀？」

我：「乖，同細路留係屋企！唔好出去！媽咪好快返！」

我要去搞清楚呢份野到底係咩事…！