「奇幻，純愛」《我，總是會愛上妳》: 自私

Cherry：「晨哥吖，既然你係度我就同埋你講啦，我打算約大家出黎食餐飯，時間係下個星期六。」

晨哥：「下星期六？哦我眀白喇，我會留定時間架啦，如果無乜野的話我就走先喇，我仲有野做。」

Cherry：「好咁到時見啦，啊你介唔介意幫我搵埋Jason佢地？」

晨哥：「當然無問題啦呢d小事，一於交俾我啦。」

Cherry：「咁就麻煩你啦。」



晨哥：「好，咁我走喇，到時見啦兩位。」

晨哥就係咁自己一個走左，留低我同佢係度。

大家咩都無講，佢有佢飲咖啡，我有我食，氣氛總係有種說不出的怪。

雖然明知道佢擔心緊既唔係我，但我見到佢咁緊張咁關心我，我都有一點高興。

成件事變得好矛盾。



明明我好清楚佢對我咁好係因為佢以為我係魯路修，但我都照單全收。

將佢本來係付出俾魯路修既愛意一一據為己有。

係由幾時開始鐘意左佢呢？我都唔知啦，或者其實係由一開始見到佢個一刻就已經鐘意左佢啦。

理由？我搵唔到，應該就係當初個感覺咁。個心feel到。

不過愛人需要理由架咩？我都只係想係剩餘既時間感受下幸福啫。



你咪當我自私囉，反正我本身都係因為一個自私既人先出現，可以話係自私既產物。

可以同佢一齊，咩都變得唔重要了。

就算要我一生都扮演另一個人過活我都無所謂。

可以的話，我想一世陪係佢身邊，但係我知咁係無可能。

因為我地兩個之間始終隔住一個謊言，一個一旦暴露就會令我一無所有既謊言，而且…

Cherry：「講明先呀我未嬲完架，咁既野你都可以拎黎玩你實在太過分。」

我：「係係~我知道係我唔好，咁你要點先肯原諒我呀大帝？」

Cherry：「唔…起碼都要請我食蛋糕先啦，呢度d蛋糕好..咦？」



佢講講下突然掩住自己個嘴，表情仲相當驚訝，好似記起某d野咁。

我：「做乜呀？」

Cherry：「我醒起Chase同Nicole兩個自己係屋企…我地快d返去啦都係！」

我：「唔洗驚啦，兩個都咁大個囉，唔會有事既。」

Cherry：「唔得呀我放心唔落！！快D返去啦！」

真係吖，認真無…！！

又黎嗱..？今日係第幾次呢…



呢D可能就係我違背承諾既代價啦…

不過我唔後悔，因為我無違背我自己既心…

同佢十萬火急咁趕返屋企，返到去我地兩個都呆左。

呆左唔係因為佢兩個闖左咩禍或者搞到屋企好亂，應該話係岩岩相反。

屋企非常整齊，好似平時咁。令我地驚訝既係飯檯上多左樣野。

飯檯上多左一個蛋糕，一個一眼就知道係自己整既蛋糕。

點解一眼睇就知？因為如果呢個蛋糕係鋪頭既出品，個間鋪應該十年前就要執。

Cherry：「Nicole…個蛋糕係…？」



Nicole：「係我同細佬整架，快d試下啦好好味架！」

Cherry：「你同Chase整既…？就只係得你地兩個？」

Chase：「我唔想整架，係家姐逼我幫佢手咋。」

Nicole：「咩呀你頭先食得好開心架！」

Chase：「喂！」

Cherry：「吓即係呢個已經係第二個蛋糕嗱？」

Nicole：「嗯！我地都要試左一次先敢比你地食架嘛。」



兩個八歲既細路居然可以自己整到個蛋糕，仲要係兩個..

我：「你地係點整架？」

Chase：「咪跟住書既咁做囉，唔通我地叻到可以無師自通咩。」

唔係，你地而家基本上已經係無師自通既程度啦…

我：「咁點解無啦啦會整蛋糕既？」

Nicole：「哦，係因為…」

Cherry：「因為我突然想食！！」

Cherry突然好似賽跑選手咁跑左去Nicole掩住佢把口，唔俾佢講野。

雖然唔知佢地想做乜，不過見到佢地咁我唔知點解就笑左出聲。

我：「好喇好喇，快D食蛋糕先啦，我都想知咩味。」

我拎起檯面上既是刀準備分蛋糕，但我好快就放返低。

因為我發現自己隻手不停係度震。

我：「呀我去洗個手先，Cherry麻煩你幫我分左個蛋糕佢吖。」

我講完之後就急急腳走左去廁所。

入左廁所之後，我即刻係自己衫袋度拎左個盒野出黎。

唉…