因為晨哥仲有Ellie既要求,我仍然需要留係間獨立屋度。

呢D可唔可以叫做留院觀察呢?但係呢度又唔係醫院,用呢個字又好似唔係好岩。

傷口亦隨住日子慢慢推移而無再痛,只係我每日都要食藥,佢地話可以幫助傷口加速癒合喎。

唔知係咪因為D藥既關係,個人有時會有種作嘔既感覺。

啊,差D唔記得講,Cherry佢地三個搬左過黎,話要陪住我咁話。



我起初都有話咁好似唔係咁好,話哂間屋都唔係我地既,咁樣未免太過份。

只不過晨哥居然係呢個時候跳出黎話無所謂,當自己屋企得,真係痴線。

無錯啦,就係多得晨哥呢一句說話,呢三個人日日都出現係我面前,有時都真係覺得有D煩。

講下笑啫,又點會嫌佢地煩吖,開心都黎唔切啦。

過左幾日,我已經可以自己落床行,開始唔洗吊住一抽抽野。



難得Cherry陪左兩個細既落沙灘玩,出去露台吹下風都好。

我一個人走左出露台坐低,望住沙灘睇佢地母子三人係度玩。

雖然有少少距離,不過都仲可以見到佢地係度做緊乜。

Nicole係度堆緊城堡,而Chase則係度挖緊水道,似足我。我細個去沙灘都係咁玩。

至於Cherry佢就坐左係兩個細路後面睇佢地玩,不時同佢互動下咁。



呢個㬌象係幾咁靚啊。

晨哥:「覺唔覺下面沙灘差咁d野?」

哇屌幾時入黎架。

我:「唷晨哥,係咪夠鐘檢查啦?差d野?唔知喎,差乜野呀?」

晨哥:「唔係,我黎搵你吹下水啫。你睇唔出下面差乜咩?差你呀。」

我:「屌講呢D,咁麻煩唔好搞我。」

晨哥:「估到你會咁講啦,係啊你聽日可以走架啦,可以返屋企喇。」

我:「終於走得嗱?而家你咁講我反而有少少唔捨得添。」



「佢地三個好似係度住得好開心咁,不過呢D大屋我搵一世既錢都買唔起哈哈。」

晨哥:「咁啊,俾左間屋你囉。」

我:「痴撚線,你估而家玩大富翁咩,講笑搵第樣啦。 」

晨哥:「嘛,咁當係你作為今次實驗對象既正當報酬囉。」

實驗對象啊…

我:「咁呢間屋我更加唔可以要啦,應該係俾佢先岩。」

晨哥:「啊…你又講得岩。」



我:「有佢消息未?」

晨哥:「暫時仲未啊,幫佢辦好左個身份之後佢就消失左,我都已經派人搵緊佢,不過暫時未有消息。」

我:「你話佢係咪有心避開我地呀嗱..?」

晨哥:「可能啦,或者佢搵唔到方法去面對你啦,畢竟佢…」

我:「其實佢都無做錯,錯既人由頭到尾都只係我一個。」

「若然唔係我一意孤行,就唔會發生咁多事…」

晨哥:「嘛,你咁講即係怪我幫你啦。」

我:「我絕對無咁既意思!只係…」



晨哥:「我明..」

Yui:「夠鐘食藥啦兩位。」

呢個又幾時入左黎架。

晨哥:「咁唔阻你食藥休息啦,一陣再傾啦。」

我:「嗯,好一陣再傾。」

之後我就食左藥,係Yui同晨哥都離開左之後我坐坐下就訓著左。

到訓醒既時候,天已經變得一片黃。



我:「嗯…」

我出盡全力,伸左個懶腰。

Cherry:「你訓醒嗱? 」

我:「哇!!  」

我個心嚇到幾乎跳出黎,因為Cherry就坐左係我旁邊。

Cherry:「sh…兩隻野係入面訓緊架。 」

我望一望入面,果然見到Chase同Nicole係我張床上面寫訓緊,睡相仲相當可愛。

我見到咁不禁微笑。兩個細路真係得意。

係呢個時候,有人從後細細力咁cool住我,係邊個?仲可以係邊個吖。

Cherry:「岩岩起身,不如陪我落沙灘行下? 」

嘛,我都預左佢會咁,點解?直覺囉。

所以我聽到佢咁講之後完全無感到驚訝之類,我只係輕輕咁放低左一個字。

我:「嗯。」

我講完就拖起左佢用黎cool住我既手,兩個人走左出去。

雖然話係夏天,不過多得有海風,係黃昏下行都非常舒服,唔會點出汗。

兩個人,手牽手咁行左半個沙灘,一句說話都無講,只係望住前方。

一時心血來潮,我望左過去海個邊。

呢個㬌色,同當時好似。

Cherry:「同個日我係度見到你個陣好似啊可?」

果然佢都係咁諗。

我:「嗯,真係好似。行左咁耐不如坐下?去個邊個級石級?」

Cherry:「可以啊,你話事啦。」

或者大家坐低左可以方便D講野。

我地行去石級坐低,佢挨住我膊頭,兩個人一齊望住個夕陽。

「我呢…」

真係唔好彩,一係就大家都唔講,一講就大家一齊講,撞哂聲。

不過多得咁,大家都笑左出聲,個氣氛好似輕鬆左。

「對唔住。」

又係咁,大家同時間開聲。但係今次大家既反應就大不同,我就保持平靜,而佢就略顯驚訝。

我把握機會繼續講落去。

我:「呃左你咁耐,真係好對唔住。」

我終於講到出口。

我:「我知道因為我既自私,傷害到好多人,仲令你擔心同傷心。」

「明明我應承過你唔會再令你喊,但係…」

Cherry:「唔好再講啦,夠啦。」

佢打斷左我既說話,仲好突然咁攬住我。

Cherry:「其實我都應該同你道歉先係…我應該早D察覺到先岩。」

「我應該一早就發現個個唔係你,應該及早察覺你有古怪,我呢個老婆真係無鬼用。」

「我居然仲同另一個男人嘻嘻哈哈咁過左兩個幾月,我真係好對你唔住…」

慘,連我都…

我都攬住佢,兩個人係個沙灘度攬埋一舊。

我feel到佢係度震,所以我輕輕咁掃佢背,希望佢可以平伏下。

但係令我出奇既係,佢居然都同我做緊相同既野。

啊,原來我都係度喊緊。

今次好似係訓醒之後第一次喊,耐都連自己喊緊都唔知添。

我:「既然大家都有野對唔住大家,咁不如學獎門人話齋,打和啦好無?」

佢聽到我咁講之後居然即刻推開我,表情仲相當

Cherry:「咁又唔得喎,講到底都係你呃我先,你唔岩多D。」

我:「係係,咁你想我點賠罪吖老婆大人。」

Cherry:「唔…要我原諒你都得,就係你唔可以再除低呢兩樣野。」

佢一邊講一邊係衫袋度拎左D野出黎。

啊係呢兩樣野啊…結婚戒指同好多年前既個條戒指鏈。我係避世之前將呢兩樣野交左俾Proto Zero。

我打算接過呢兩樣野,佢卻係呢個時候收起手掌,搞到我拎唔到。

Cherry:「狗圈梗係要由主人親手戴上架啦。」

哎又黎。

不過我無反抗,乖乖咁伸左條頸埋去,佢亦即刻為我戴上呢個所謂「狗圈」。

我硬係會被佢食住,點解會咁。

之後佢亦為我戴上埋隻戒指。儀式總算告一段落。

重新戴上呢兩樣野,感覺有少少奇妙。

嘛,感覺好似所有野終於都歸位咁。

不過,其實好多野已經唔同左了。

我望住隻戒指,又諗起個個都戴過呢隻戒指既人。

希望佢可以過得好同開心啦。

Cherry:「喂傻仔lulu。」

我:「嗯?」

佢叫我個名,搞到我望左去佢度。

佢一下錫左埋黎。

啊,夕陽之吻,又一個。

不過我唔討厭啊。

錫左幾耐呢?我真係計唔到,總知就係好耐啦。

呢下kiss,令我諗返起初吻。

過左幾多年呢?唔太記得lu。我只係記得個日又係黃昏。

哈哈。而家同個陣一樣,我個腦又係一片空白。

佢終於退開左,我終於可以吸到空氣。

Cherry:「喂…你做乜係度發呆呀。」

我:「嘛…你突然咀埋黎,搞到我諗返起好多以前既事啫。」

Cherry:「喂咩叫突然咀埋黎呀!講到我好似好隨便咁!」

我:「哎,你知我唔係咁既意思架,唔好係度扮嬲啦。」

Cherry:「咩叫扮嬲,我真係嬲架。」

我:「咁呀,咁我應該點做好呢,咁做好無呢!」

Cherry:「嘩! 」

我出盡全力,一下抱起左佢。

我:「哇你係咪重左?點解好似要用咁多力先抱得起你咁既?」

Cherry:「喂你個衰人! 」

佢一路笑一路輕輕力咁打我,而我就抱住佢慢慢行返去屋度。

返到去屋個陣,我地兩個都呆左。

間屋多左好多人,仲有好多野食野飲放哂係花園,直頭好似開p咁。

晨哥:「唷兩位,Party等緊你地開始呀。 」