溝女的聖地──補習社: 2

「下？姐係你叫我自己去溝？你唔陪我？」我識鬼咩？
 
「幫埋你溝女？咁你溝完我係咪都有份食先？」呀楊佢串過馬撚，心中不免一肚子氣。
 
「我都係咁溝返黎啦，都無人教我。」佢攤攤手，「你夠鐘意嘅話，就自然有方法架啦。」
 
「嗱，唔好話我唔益兄弟啦，最好揀數學，因為多數女仔數學都唔得嘅。」
 
「千祈唔好揀yylam嘅中文，啲女係為左睇佢，你仲諗住食？」
 


「你交補習費都成幾舊水，入到去正係睇啲仆街呀 Sir嘅錄影帶？有無咁戇居呀？梗係順勢溝條女，一齊補習之餘，仲可以慳返筆錢拍拖呀嘛……」
 
「有啲補習社仲有得試堂添，試完見無心水就走場囉，方便又快捷。」
 
望住呀楊春風得意嘅姿態，好難想像以前頹廢既佢。依家，簡直係有光環照耀緊佢咁，令我無法直視。
 
「講就講左咁多，呢啲野唔好同其他人講呀，我當益兄弟架炸。」
 
「咁緊係，多謝曬！你真係唔話得。」
 


識到佢咁好嘅朋友真係好……
 
「多謝就唔洗啦，你幫手埋咗張單佢啦。」佢拎埋枱嘅牙籤，撩住牙咁行出去。
 
真係好仆街。
 
我拎齊野之後，呀楊轉個撚頭行返埋黎。
 
「你最好做定資料搜集呀，邊間學校著咩校服，邊間補習社少人多人呀，都要做足呀！」
 


多得佢嘅提醒，我已經知道要點樣入手，我急不及待想玩玩了。
 
返到屋企，即刻做定資料搜集，附近邊間數學係播錄影，我住嗰區嘅學校校服，一一調查清楚。
 
第一次會做足功課，竟然唔係為咗讀書。我同老媽子講私補唔夠，要出去補習社補埋就穩陣啦。
 
之前私補都係老母半推半就先叫到我去補，我依家竟然咁生性話要補習，佢都感到老懷欣慰。
 
我揀咗禮拜四嘅放學，上去交左學費，整埋張學生證，就準備等開堂。好老實講，依家諗諗下真係好淆下，如果我真係有咁嘅膽量，我諗我一早就拍左拖啦。但我見呀楊如此成功，我突然間就好似有咗股希望咁……
 
我踏入補習社嘅第一步，其實同普通班房無咩分別，只係大家著嘅校服同埋老師唔一樣姐。
 
由於我比較早黎，人跡稀少，我揀左個靠後面位嘅角落。因為男仔通常都會坐後面，唔聽書，玩手機。同埋咁樣可以觀察成個場，所有異性生物都逃唔過我雙眼。
 
但原來我錯了，呢度係補習社。個個俾錢入嚟，仲曬時間同你玩？


 
反而後面嘅位好少人坐，個個一窩峰咁聚首前方。我好驚後面淨係得我一個坐。
 
啲人差唔多入曬啦，都幾滿下，全個場得返我後面嗰幾個位，應該都無人入嚟架啦。
 
不禁令我大失所望，男仲多過女。而女嘅質素都唔方好得去邊，真係一睇就知讀書look，完全唔會裝扮下自己。一定係嗰啲「讀書時期不應該談戀愛」嘅理論主義者。
 
估唔到嘅係，呢堂名校嘅學生居多，一入到嚟個氣場都唔同曬，完全唔似我地學校咁，懶懶閒咁。
 
除咗呢樣之外，又真係有兩Pair著唔同校服嘅人入黎拍拖。因為佢地一入黎已經係拖住手。唉屌，點解我唔早啲嚟！？
 
因為普通OK啲既都俾人搶走曬啦……剩底既咪豬頭骨囉。
 
話唔定呢度有幾個係呀楊所講嘅網上獵食專家呢，都係要小心行事。
 


投影機開始播放嗰個老師嘅影片，開始係度教數，全場鴉雀無聲，好認真咁聽佢講解。
 
我都打開出面服務員岩岩派既練習書，專心咁聽書，既然無女岩食，唯有認真聽書啦。
 
「嗞…」一把開門聲從後面傳來，係咁靜嘅空間入面，除左呀Sir把聲，突然有把咁突兀嘅聲音傳嚟，自然心生好奇。
 
前排嘅人紛紛回頭看，我當然都唔例外啦。
 
我一眼就睇得出，佢地身穿嘅校服，係名校女校嘅校服，最高級！