溝女的聖地──補習社: 8

我無啲狗公睇得咁開，呢次問唔到，咪下次囉，再問唔到，咪第二個囉。一次問唔到嘅打擊已經好大。
 
「嗯…」kitty猶豫咗一陣，我知通常都會俾，但我哋識咗又唔耐，我好怕會太心急，嚇親佢。
 
「好啦，但我Facebook 無嘢好睇架咋，講明先呀。」kitty一臉認真。
 
有無嘢睇對我嚟講根本無所謂，當係其中一個聯絡方法。
 
成功加左之後，我唔睇住，留返喺屋企慢慢J，J到出血！
 


「依家講到邊呀？」kitty準備撳本書，問我。
 
仆街！啱啱掛住同kitty傾偈，同埋掛住諗佢，都無留心聽書添。
 
我快速望一望前面嗰幾個男仔，23頁，好彩都無到瞄到，如果唔係喺kitty面前失左霸氣就唔好。
 
「講到23頁呀。」我好型棍咁講。
 
「但係你本書依家係12頁喎……」睇嚟kitty都好醒目，瞞唔過佢。
 


「啱啱掛住同你傾偈呀嘛哈哈。」我好牽強咁解釋。
 
跟住落嚟我哋就無乜點交流過，到咗依家我先發現，原來kitty數學唔差，好多題都做得好快，甚至俾呀Sir解題仲快。
 
咁點解佢仲要嚟補習呢？
 
之前佢一直都坐喺我後面，我都無機會留意佢數學點樣，依家坐喺我隔離先知，原來自己對比起名校嘅學生係差咁遠…
 
kitty好專心咁做數，神情異常認真，亦都好集中，相反自己就乜都唔識。
 


因為我除左打機做廢青，我就咩都唔識。中四嗰段時間完全係荒廢曬，咩都無學到。
 
我終於明白咩叫書都用時方恨少，原來書中真係有黃金屋，黃金屋入面就係住咗kitty咁嘅美少女喺入面。
 
到落堂嘅時候，kitty本書已經寫到密密麻麻，而自己本書就空白一片，簡直係無面目見人…
 
正當我想快快手收埋本書，唔想俾kitty見到嘅時候，已經太遲了。
 
Kitty已經見到了。
 
「咦，點解你本書咩都唔寫嘅？你唔識，跟唔上？」Kitty有點驚訝。
 
「Er…係呀。」唔知點解，我唔想呃佢，即使俾佢見到我衰嘅一面。
 
Kitty佢唔出聲，唔知係度盤算緊啲咩嘢。但佢唔出聲，反而令我感覺更加沈重。


 
呀楊話，揀數最明智，通常男仔數學都好過女仔，女仔唔識嘅時候，就係男仔出手嘅時候！
 
睇嚟我無咁嘅福份…
 
「其實我每堂都會遲到係因為我哋學會有嘢做，我嗰兩個朋友都會學會嘅人嚟。」
 
我唔明佢同我講呢啲有咩用意。
 
「不如咁啦，下次我哋上堂嘅時候早少少嚟，我花啲時間嚟教你呀？」
 
我聽到除左喜出望外，卻略略感到唔好意思。
 
所以我就以退為進，「咁唔係咁好嘅，阻住你啲時間。」
 


Kitty嘅反應係我意料之內，「傻啦，我本來差唔多每日放學都會留低整學會嘅嘢，所以走一日唔算好過份姐。」
 
我當然係好啦，臉上面嘅笑容真係收唔返，俾佢見到曬。
 
我知道自己笑到傻仔咁，但我控制唔到，因為真係好開心！
 
「做乜笑到成個傻仔咁？」Kitty亦都跟住笑。
 
「無呀，好開心有人咁樣教我嘢咋嘛。」我就嚟想起身跳隻開心舞。
 
「舉手之勞姐，而且你咁好人。」Kitty順勢拎左支筆出嚟。
 
捉住咗我隻手，係我手上面寫低咗8個數字。寫完之後仲要細細力咁戳一點，唔知咁樣做係咪會型啲嘅呢？我見好多人都咁樣做。
 
「嗱，有啲咩事唔識嘅，就whatsapp我啦。」Kitty側住頭咁笑，佢除咗有天使嘅笑容，亦有天使嘅心腸。


 
即使溝唔到，可以留係佢身邊都甘願。
 
Kitty準備拎起書包走嘅時候，我唔明點解佢要對我咁好。
 
我哋明明只係上過三堂，唔算深交嘅朋友，只係萍水相逢，何解會對我咁好。
 
我忍唔住，我好想知點解。今次一別，下一堂都唔知會唔會再見…
 
我望住自己手掌，嗰一種感覺真係難以形容。我手上仲好似殘留住Kitty嘅餘溫，久久不散。
 
今晚就用呢隻手嚟打飛機啦！講笑姐…邊會捨得整污糟佢呀？
 
今晚唔會洗手就真。呢一幕真係好深刻好正，從未試過有女仔咁樣對我…
 


「點解你對我咁好嘅？」我呢一句說話令Kitty怔一怔。
 
「其實我好少男性朋友，由細到大屋企都管得好嚴，小學同中學都係女校，身邊嘅男仔都係大哥哥嚟。」
 
「今日會嚟補習社都係嗰兩個朋友叫，平時我都唔洗補習，我都係瞞住屋企人嚟。」
 
係白色嘅燈光下唔難睇得出門Kitty塊面紅曬。唔化妝嘅佢，兩頰忽然緋紅，搞到我係咁眼甘甘咁望住佢。