溝女的聖地──補習社: 13

「邊個係Kitty？」呀楊問。
 
係喎，佢唔知邊個係Kitty喎。
 
「Kitty係我喺補習社識嘅女仔，幾好人，好nice，我對佢有啲好感。」我大約講下。
 
「你又知佢生日？」呀楊把聲好急促，唔知係度搞乜咩。
 
「呀楊你做緊咩呀？」我將電話較到最大聲，聽清楚啲。
 


「呼呼…做咩咁問呀？我…我打緊機呀…」呀楊上氣唔接下氣。
 
「你把聲咁奇怪嘅？」我覺得事情相當有嫌疑。
 
「我轉頭打俾你，就死啦就死啦。」然後就收咗我線。
 
算啦，竟然佢唔得閒，只好自己諗啦。
 
返屋企嘅路上，我都有諗，諗要送啲咩最好。Kitty缺啲咩呢？
 


我諗咗成晚，都諗唔到有咩係啱佢。
 
之前都未試過咁認真諗送咩俾人，都係求求其其係7仔買啲嘢，用個袋包到靚一靚，就送。
 
由細到大啲咩聖誕聯歡會要送聖誕禮物架嘛，要抽呀嘛，次次我都係咁送架啦。
 
但依家要認真諗送咩俾女仔，真係搞到我頭都大。
 
我上網搵資料啦，問下應該送啲咩俾女仔，都係啲好行嘅嘢，無乜新意：公仔，花之類嘅。
 


我想要啲特別啲嘅嘢。
 
我決定上連登問，萬能嘅連登仔。
 
我屌你老母，開完Post問，個個都係度派膠，無嘢幫到手。
 
送你老母、送自己、送綠帽，等等出神入化。
 
最後我係啲賣女仔嘢嘅網到搵到個幾啱嘅──手繩！佢好似無呢樣嘢係身。

貴就唔算好貴，都係百拎二百蚊。
 
呢款其實係情侶手繩，係台灣訂，香港應該會少見啲。我打算送一條俾佢，自己留返條，等我哋真係成為情侶之後，就帶埋呢條手繩出去。
 
嘻嘻，諗得真係周詳哈哈。


 
最後我揀咗一條粉藍俾佢，一條深藍俾自己。我知佢書包有一個粉藍色公仔嘅鎖匙扣，所以送粉藍色嘅嘢實無死啦係咪？
 
而且粉藍色襯佢，深藍色又襯我。
 
唔係嗰啲MK手繩，又粗又剩嗰隻，係我真心覺得靚。
 
出貨幾快嘅，台灣好興網購，因為出貨快，平，多品種！好過你係淘寶買多多聲啦。
 
就係前一日啲貨送到啦，等到我頸都長。
 
包好曬，小心翼翼放係書包，返學！
 
呢一日個心情都好緊張，一嚟係因為要上Kitty屋企，二嚟係我gel咗頭…
 


一返到班房，個個都望我嘅眼神都唔同咗，心諗係咪我gel完太柒？但同時間feel到啲自信返緊嚟。
 
隨後呀楊返到學校，第一時間就問我，「呀水，你個頭搞咩嚟呀？」
 
呀楊碌大隻眼望住我，然後就笑柒我啦……
 
「頂你真係好柒呀！仲柒過啲MK仔。」佢笑得都幾大聲，我塊面一陣紅，一陣綠，一陣紫。
 
「笑咩姐！」我有啲嬲嬲地，本身今日心情好靚，就俾呢條仆街搞一搞，咩心情都無曬咁制！
 
「好啦好啦，唔笑！」佢又真係即刻收返，唔笑喎。
 
「噗！」佢望住我個頭，「哈哈哈哈哈哈哈哈哈哈！」
 
真係屌你老母！


 
「得得得，你話俾我知你做咩搞到咁先啦。」佢揭力壓制住自己。

「咪同你講咗囉，補習社嗰個女仔生日呀嘛。」我反佢白眼，又要笑，又要唔記得！
 
嗰陣時話轉個頭打俾我，咪又係無打。
 
「好啦，咪話我唔幫你啦。」呀楊打開咗佢個書包，拎咗盒髮泥出嚟。
 
「哇！你隨身帶住架？」佢之前點會帶呢啲嘢呀？溝到女果然唔同啲。
 
我哋學校唔會點管有無gel頭，畢竟我哋學校又唔高級得去邊…
 
呀楊就咁帶咗我入廁所，花咗一輪功夫，我脫胎換骨咁出嚟。
 


就好似入咗一轉廁所，出返嚟嘅時候，個廁所就變咗髮廊咁。
 
今日我出嚟，行路都有風！真心覺得型仔咗。
 
後面嘅頭髮gel起咗，成個人醒神曬。我頭先係gel 唔起，反而「塔」咗，搞到好似洗咗頭，唔乾咁，仲核突……
 
今次實無死啦，搞掂曬，臨放學嘅時候，呀楊仲幫我執咗一執，話怕個頭「塔」喎。
 
「男人要出手嘅時候，都係要出手嘅！」佢都有義氣嘅一面。
 
我依舊好早就到咗補習，今日要再cool啲，再有型啲！
 
終於等到Kitty入嚟。
 
今日嘅佢唔同咗，發型唔同咗。本來係綁馬尾，依家變咗孖辮，兩條小小嘅辮子令我覺得係另類嘅可愛。
 
Kitty笑起上嚟有啲似日本嗰啲女仔，唔係AV嗰隻；而係好純樸嗰種。
 
睇嚟佢都有打扮過下，別有一番風味，一種好好嘅新鮮感。
 
Kitty一嚟到，我就細細聲講，「生日快樂！」
 
你話我自私又好點都好，我就係唔想俾在場其他男仔知道咁靚嘅靚女生日，如果唔係佢哋要出馬嘅話，我就會俾人甩開九丈遠。
 
Kitty回敬我一個甜甜嘅笑容，「多謝曬。」