溝女的聖地──補習社: 24

「係呀，我哋小學同學嚟架！」關晴好興奮咁捉住Kitty隻手。
 
有時我真係唔明女人個腦係裝乜。
 
你小學好好朋友，上到中學都可以keep住聯絡嘅姐。但頭先嗰一幕，我仲以為兩個係失散多年嘅姊妹。
 
差在未跳埋舞咋，得返我同關晴身邊條仔係度你眼望我眼。
 
係我同嗰條仔互望嘅眼神入面，我睇得出，佢同我一樣都係無佢哋咁好氣。
 


「原來你同呀水同一間中學，仲要同一班呀？」唔知幾時關晴已經講曬啲嘢俾佢知。
 
「咁一樣返去啦？」Kitty問。
 
「好呀。」關晴都義不容辭，拖起佢條仔隻手。
 
關晴專登行過嚟我隔離，好細聲咁同我講，
 
「都話咗我會幫到你架啦。」再加埋佢把死人聲，輕挑到呀……佢條仔點頂得佢順？
 


「係呢？你嚟呢度補咩？」Kitty好似有種他鄉遇故知嘅感覺。
 
「英文呀。」關晴好豪邁咁講，一啲都唔介意。
 
「係喎，你英文不嬲都唔好。」Kitty醒起。
 
「咁你呢？」佢哋你一句，我一句咁係度噓寒問暖，搞到我同佢條仔係度面面相墟，唔知點好…
 
「係呢？呢位係…？」都係Kitty醒目。
 


「佢係我男朋友，呀俊。」關晴幫忙介紹返。
 
「你好呀。」
 
即刻諗起神仙B，俊？邊撚到俊‌？
 
不過幾型仔係真嘅……
 
但呢位呀俊望Kitty嘅眼神都好唔自然，以男性直覺嚟睇，有啲嘢。

返到學校之後，關晴問我，Kitty係咪就係我想溝嗰個？
 
我知自己瞞唔到佢架啦，「係呀。」
 
「Kitty份人好單純，我哋小學畢業之後，雖然少聯絡咗，但感情一直都好好，每年都有見一次咁啦。」關晴好關心我咁。


 
其實我覺得佢係關心Kitty多啲…擔心佢嘅幸福。
 
「咁你覺得我有無機呀？」我決定直接問關晴。
 
「嗯…我覺得以Kitty咁嘅質素，佢唔缺追求者。」關晴講得好啱。
 
關晴轉一轉個語氣，好真心咁同我講…
 
「唔怕老實講，都中六啦，剩底嘅時間唔多，我就同你直話直說。」
 
我緊張到吞一吞口水，我明白關晴講嘅嘢，我真係明。
 
「其實女仔要嘅好簡單嘅姐，無非都係想要個錫佢嘅人姐，而係呢一方面，你係做得好好啦。」
 


面對住關晴，我一時間覺得怕羞，唔知點應對。
 
我傻頭傻腦咁搔搔頭，「係咩，哈哈？」但卻掩飾唔到內心嘅開心。
 
「咁你諗住點幫我呀？」
 
「咁急做咩呢？睇定先啦，就嚟聖誕啦，係一個好機會俾你發揮你自己！」關晴講得啱，我都差啲唔記得咗。
 
咁多年啦，聖誕節都係自己一個係屋企過，我都差唔多遺忘咗呢個節日，反正有同無，又有咩分別？
 
「咁點做好？佢鐘意啲咩呀？」我好著急咁問關晴。
 
關於Kitty嘅一切，我有咩可能唔著急？
 
「呢一層就係靠你啦，靠你嘅心意同誠意啦，哈哈！」關晴拎手機出嚟，覆佢條仔，「加油啦，呀水。」


 
呢個小息我得到個重要嘅資訊，跟住落嚟就係要諗啦……