溝女的聖地──補習社: 35

我呢啲小毒毒，係大排擋入面舉手嗌伙記，都無人理。

我舉到隻手都攰撚埋，先有人過嚟。

「食咩？」換咗個伙記，不過都係女人。但佢個樣真係串過馬撚——閪女人。

「我要個避風塘炒蟹，蝦仁炒蛋，椒鹽鮮魷，同埋一碟青菜呀唔該！」呢個位真係盡顯男人嘅風度同埋霸氣。

「加唔加嘢飲？」



「加幾錢呀？」我問道。

「你係咪唔識睇字？」個伙記指住牆上面嘅菜單。

我望一望，下面又真係有黃色字寫住凍飲加8蚊。

「咁你飲咩呀？」我問Kitty，經過頭先嗰一記悶棍，我已經淆曬底。

「可樂呀。」Kitty依舊保持微笑，但我塊面已經沉咗落嚟，笑唔出......



果然係有上等人嘅風範，Sor，我真係無咁嘅情操。

「快手啲啦，仲有其他人嗌嘢架！」個伙記不停咁用支筆拍打佢本簿仔。

「咁兩個可樂。」我目無表情咁講。

個伙記「嘖」一聲，就走咗去。

「唔該！」Kitty對住個伙記背影講，真係好有禮貌，俾著我無對住佢講粗口已經好好。



等伙記遠走之後，Kitty就取笑我，「點解你去到邊度食飯都可以俾人笑？哈哈哈！」
 
「你估我想嘅咩？係人都恰毒撚架啦。」我講出嚟就笑笑口咁，但其實心入面係萬般無奈。

「你呀，要俾心機呀！我想你努力變得更好。」Kitty戳一戳我手背，語重心長咁講。

我知道，佢期待我有所成長，想我有朝一日脫變。

我眼定定咁望住眼前呢個女仔，係呢一個急促轉變嘅年代，一年當中已經經歷好多離離合合，有一個人願意等你成長，係一年幸運嘅事。

「我知啦，我一定會變得更好。」我斬釘截鐵咁講。

我就唔細講我哋食飯期間嘅打打鬧鬧，但呢啲承諾，一得閒諗返起Kitty嘅時候，就會好自然咁係腦海浮現出嚟。

兩個人食四個餸，好快就清曬。估唔到我哋啱啱好，又唔係話有食剩，又唔係唔夠食。Kitty一臉滿足，好明顯好享受呢一餐飯。



「我係屋企唔會食咁多碗飯，屋企啲嘢好清淡無味。所以呢一餐真係好好食！」Kitty摸摸自己肚皮，甚是可愛。

「大排擋啲嘢食都好正架！依家帶你去食糯米滋啦。」上網睇啲女仔唔係鐘意食甜品咩？去食糯米滋當甜品就一流啦！

「依家幾點呀？」Kitty緊張地問。

我打開部手機，望一望個時間。

「8點幾左右啦。」

「死啦！我差唔多要返去啦！」Kitty驚道。

「吓？好早咋喔。」我真心好驚訝，咁樣同平時係補習社放學出嚟無分別喎。
 


8點幾，大把人依家連飯都未食啦。香港人出名遲瞓遲食飯架啦，我真係估唔到Kitty會話要返屋企，今日嘅行程已經係咁打亂曬。
 
「係呀，我同我屋企人講咗9點前要返到屋企。」Kitty無奈咁講，一臉「我都唔想」嘅模樣。
 
「你返屋企嘅時間仲早過灰姑娘。」我言語中包含著嘲諷，心入面只係想可以同佢相處多少少時間。
 
「我有同屋企人講過架，佢都唔準我一個女仔出得咁夜，而且今日係平安夜……」Kitty拉長咗個「夜」字嘅音，姐係驚佢哋個女係呢一日俾人食咗姐。
 
老實講，屌你！我仲驚過你呀，係食都我食啦！我好驚Kitty俾人食咗呀！
 
Kitty見到我失望嘅表情，都忍俊不禁，「我哋仲有時間相處架嘛，係咪？」Kitty柔聲道。
 
佢呢個語氣，令我諗返起我哋初初係補習社相識嘅日子。
 
Kitty係幾咁溫柔善良，雖然依家都係，但多咗份女孩子嘅稚氣。


 
「其實今日對我嚟講，真係好開心架…雖然只係好短嘅時間，但真係好開心。」此刻Kitty嘅笑容已經深深印咗係我腦海入面。
 
聽到Kitty呢句之後，我嘅情緒先安撫落嚟。
 
「唔係淨係得你一個唔開心，我都想同你相……」Kitty幾乎用氣聲嚟講，我好勉強先聽到最開頭嗰句，後面已經聽唔清楚。
 
同女仔傾偈，係可以訓練聆聽能力。