溝女的聖地──補習社: 53

我望住枱面上嘅早餐，其實我覺得屋企人都好錫我。
 
雖然我哋好窮，但我屋企卻俾最好嘅嘢我。由細到大，我想要咩嘢，我屋企人都會想盡辦法俾我。
 
越大個嘅時候，我想要嘅越嚟小，我只係想屋企人健健康康就夠啦。
 
所以我見到枱面上嘅早餐，真係覺得好溫暖。
 
係呢個時候，Kitty係廁所行咗出嚟，問，「有無新嘅牙刷呀？」
 


我去搵咗個新牙刷俾佢，然後我專登同佢一齊刷，嗰個畫面真係好似情侶。唔係情侶，就係夫妻架啦。
 
「做咩入嚟姐！好逼呀！」Kitty玩咁樣推我出去。
 
「明明就好多位。」我無理到佢，企係Kitty後面，一齊刷牙。
 
我望住廁所塊鏡，從鏡入面嘅倒影中，見到Kitty一邊刷牙一邊笑。
 
見到佢笑，我又跟住笑，傻傻地。
 


「嗯…嗯…嗯嗯嗯？」Kitty刷住牙講嘢。
 
屌你，真係聽唔清楚架。但又覺得好得意好好玩咁，氣氛好和諧。
 
「嗯嗯嗯……嗯？」
 
我哋牛頭唔搭緊嘴，係度九唔搭八。
 
我哋一路嗯嚟嗯去，直到刷完個牙。
 


一刷完，Kitty就大笑，「哈哈哈！你頭先講乜鬼呀？」
 
「你又講咩呀！？我都聽唔清楚你講咩。」我跟住笑埋一份，估唔到笑聲都可以傳染。
 
「聽唔清楚你又講？九唔搭八！」
 
「你咪一樣？」
 
Kitty對住我吐一吐舌頭，「嗯…嗯嗯…嗯？」

我同Kitty就一路打打鬧鬧咁出返去食早餐。
 
我都想，有一朝日可以娶到佢做老婆。我都唔知點解無啦啦有呢種諗法，可能係我哋依家嘅相處方式，環境似啦，雖然好短暫，但都已經好幸福。
 
至少呢種感覺，同我想像中嘅婚姻生活十分相似。


 
我想要嘅，從來唔係啲咩大富大貴嘅生活，有一個家，舒舒服服，對我嚟講已經好滿足。
 
Kitty食早餐嘅姿態都好優雅，同呢個簡陋嘅屋企成反比。
 
但係呢個簡陋嘅屋企，卻帶俾我無數嘅溫暖。
 
「做咩唔食呀？」Kitty一臉疑惑咁望住我。
 
「無呀，諗緊嘢姐。」
 
「諗緊咩呀？你個蠢腦袋仲會裝到啲咩呀？」Kitty半玩笑地說。
 
「哼！咪裝緊你嘅嘢囉！」
 


Kitty突然間用手搣一搣我塊面，但我感覺唔到任何嘅痛楚。
 
「呀水。」Kitty輕輕地叫我，「其實我好羨慕你，你有咁好嘅屋企。」
 
Kitty好感慨咁望一望周圍，呢個家，只係由幾個簡單傢俬組成，同佢金碧輝煌嘅家係無得比。
 
「儘管簡簡單單，但裡面裝咗好多睇唔到嘅愛。」
 
Kitty指一指旁邊白色牆邊下面嘅雜物，上面佈滿咗灰色嘅塵埃，嗰度有幾箱雜物，我老豆老母通常都唔會點樣打理，而隔離，放咗我好耐無再掂過嘅玩具，整整一箱嘅玩具。
 
「我由細到大，我嘅玩具只有一隻毛公仔，我曾經想要一個快樂嘅童年，一個無讀書測驗嘅童年。」
 
Kitty食埋碗湯入面嘅最後一啖麵，然後捧起個碗，將碗入面嘅湯飲個一滴不漏。
 
「呢……呢個…早餐…好…好好食。」Kitty嗚咽地道。


 
兩行淚水係Kitty臉上劃過，滴落係我哋屋企嘅木枱上面，然後滴淚水就消失不見。
 
見到呢個狀況，我立馬係隔離個紙巾盒度拎咗張紙巾俾Kitty。
 
但Kitty好似收唔到聲咁，「我…只係…想要個…家嘅感覺。」Kitty嘅真性情係我面前表露無遺。
 
如果可以，我都想俾到個家你。我會係入面俾好多好多嘅溫暖你，等你舒舒服服。
 
到咗呢一刻，我幾乎可以肯定，Kitty係我呢世人，最愛嘅人。
 
我輕輕將隻手，放係Kitty嘅手上面。我知道，任何人都想係呢個時候要啲安慰。
 
Kitty嫩滑無暇嘅手應該感覺到，我帶俾佢嘅安慰，我諗。
 


我只能夠無助地陪係Kitty身邊，我份早餐都只係食咗一半，但我依家見到咁，我都唔夠膽食埋佢。
 
良久之後，Kitty擦一擦眼角邊嘅淚水，然後就衝咗入我間房。
 
我完全唔知發生咩事，唯有跟埋入去啦。
 
只見Kitty著急地打開佢自己部手機。
 
係喎！佢成晚無開過手機，依家充好曬電啦。
 
「登、登、登～～～」
 
好多訊息嘅聲音係部手機傳出嚟，同我猜想嘅差唔多，一定好蛋msg呀whatsapp搵Kitty。
 
只見Kitty係度處理手機上面嘅事情，我又幫唔到手，只好傻咗咁企係度。
 
Kitty深呼吸咗一下，「我差唔多要走，我約咗個fd一陣等。」
 
係喎！我都唔記得咗Kitty今日約咗人添，仲諗住可以相處耐啲添，依家睇嚟情況都唔容許啦。
 
「咁好啦，我一陣送你啦。」
 
「嗯，我換返啲衫先。」