溝女的聖地──補習社: 66

之後嘅日子，我都係做返一個毒撚，日日無所事事。
 
呀楊都知我咩事，日日叫我打機，等我唔好有時間亂諗嘢呀之類。
 
去到差唔多放榜嘅時候，Kitty whatsapp我。
 
『好耐無見，得唔得閒出嚟食個飯？』
 
我見到呢個訊息，心中有一服陌生感。
 


成長最可怕嘅係，由當初熟悉嘅感覺，慢慢變回陌生……
 
邊個話熟咗，就可以一直咁熟悉落去？
 
當我哋有一日無再聯絡，無再見面，其實就會越走越遠。
 
其實越走越遠唔係啲咩咁複雜嘅嘢，只係大家嘅生活圈子唔再一樣，大家經歷嘅嘢唔再一樣。
 
說穿了，人同人之間嘅關係就好似一個交叉點。大家嘅生活有交集，自然就有感情；但當我哋再無交集，再深厚嘅感情，都會疏遠。
 


『可以呀。』
 
唔知由幾時開始，我哋嘅關係，變得如此冷漠，冷漠到可怕。
 
我哋約咗係間好高級嘅自助餐入面食飯。
 
我無打工，我用嘅，只係每個禮拜屋企俾我嘅零用錢。
 
呢一餐，我差唔多帶曬我所有身家。
 


我嚟到嘅時候，Kitty已經一早同我講佢到咗。
 
我係靠邊邊嘅位搵到Kitty。
 
『嗨！』我勉強地牽起笑容。
 
Kitty只係有禮地點頭笑一笑。
 
今日嘅佢，無咗之前清純嘅氣質，反而打扮得高貴大方。
 
一身白色嘅打扮，上身白色嘅寬身背心，上身係白色鬆身嘅七分寬褲，一對白色高跟鞋，頭髮好明顯都係有整理過，而且本來黑色亮麗嘅秀髮，染成啡色。
 
啲陰已經無咗，換成中間分介。
－
我個心都好似同以前一樣，一樣為佢嘅美麗而動容，而心跳加速。


 
但會好自然咁同佢以前比較，我比較鐘意以前嘅佢…
 
我今日執咗好耐先出嚟，比之前同Kitty出街仲耐。因為好耐無見，我想以最好嘅自己去見佢，而且自己都有學下打扮呀咁，出街會留意啲著得型嘅男仔，去學下佢哋。
 
「你唔同咗喎。」
「你好似唔同咗。」
 
我哋一齊講差唔多意思嘅，然後尷尬地相視而笑。
 
呢一種尷尬，係我哋之前未曾有過，即使係第一次見面都好，都未曾試過。
 
「你…今日做咩無啦啦叫我嚟呢度食飯嘅？」我打破呢種尷尬。
 
「無呀，我想係我臨走前同你食餐飯姐。」Kitty淡定地道。


 
「你平時帶我去咁多好嘢，今次想請你食餐好啲姐，當係報答你。」
 
我依家覺得反正都最後一次，有咩都唔怕講啦，不妨打開天窗說亮話。
 
「其實我唔係想你報答我，我只係想你鐘意我姐。」今次算係我第三次表白啦。
 
但嗰日嘅事，無論如何我都開唔到口講……
 
「呀水…」Kitty表情好唔自然。
 
「我出去拎嘢食。」
 
我逃避，逃避佢接落嚟想講嘅嘢。
 


然後就走咗出去拎嘢食，我唔想面對佢拒絕我嘅事，我無咁嘅勇氣。
 
當然啦，世上點會有咁正嘅事，會Kitty主動同你表埋？
 
佢都知我心意啦，要一齊嘅講，講句「OK」就得架啦。
 
咁佢唔講，意思係咩都好清楚啦。

我求其揀啲野食，就返埋去。講真，我無咩胃口……
 
我返到去，Kitty已經好有禮拜咁講聲「我去拎嘢食。」，然後好有儀態咁企起身。
 
睇佢一身高貴嘅打扮，我諗我真係配佢唔起……
 
身處嘅餐廳，都唔係我所負擔得起，我只係一個公屋窮撚。


 
越諗，我個心就越灰。
 
依家嘅Kitty，先係真正嘅佢。
 
以前一直同佢同埋啲平民嘢，無錯，係開心，佢都好開心。
 
但呢個唔係佢應該有嘅世界，現實中無咁多韓劇，無咁多有錢仔追窮女，更加無有錢女同窮撚一齊。
 
因為兩個世界嘅鴻溝實在太大，我頭先所講，感情係需要交集。
 
我吔終有一日因為世界唔同，而無咗交集。
 
Kitty拎咗野食返嚟之後，就開始食，過程當中甚少言談，令我覺得好唔習慣。
 
因為平時係出面食茶餐廳嘅時候，我都係同Kitty一路有講有笑，氣氛好和諧。
 
「今日…咁少嘢講嘅？」我唔想我哋最後一次見面，都要咁樣。
 
「無呀，我平時嚟呢啲餐廳，都係咁樣。」佢輕輕用刀切佢份牛排，然後放入佢迷人嘅小嘴入面。
 
隱約見到佢嘅嘴唇上面，好似有唇膏。平時素來唔化妝嘅佢，竟然會化妝……
 
「你今日真係好唔同，變得更加高貴。」我真心讚美佢。
 
「係咩，哈哈？」佢臉上泛起陣陣嘅笑容。
 
「你今日都著到好靚仔呀，平時你都唔會著襯衫嘅。」佢笑我。
 
我陪笑道，「咁今日食高級嘢，點可以著茶餐廳嘅look嚟呀？」
 
一瞬間，我哋好似返翻去以前打打鬧鬧嘅時候。