《長洲天黑黑，孩子請閉眼》: 第二十六章

《第二十六章》

【1】
緊張的氣氛籠罩住長洲小島，每一個人懷著最終的希望，積極尋找狼人的蹤跡。

同一的時間，

我卻悠然地走進一間空盪盪的士多店，靜靜坐在門外的摺櫈上，猶如百無聊賴的老伯伯抖著腳，卻沉靜以待，那將至的殺機。

一分一秒，靜靜流過，




卻不減空氣中瀰漫的肅殺。

沉寂的巷子裡，我苦等著的影子，終於出現了。
不出所料，他裝作友善的表情，一步一步接近，但他的眼睛不懂說謊。

他沒帶半點歉意，這點讓我很不舒服。
究竟當時他為何會選擇我和他？
我和阿奇真像一對情侶嗎？

不過，有名你叫白痴，有時白痴的思路的確離奇脫軌，不能輕易測度。





「阿仁，我有事搵你商量。」白痴仔邊說邊步近至一個危險的距離。
「你果然出現。」我抬頭。

時機已到，白痴仔收起所有笑容，從腰間取出一把散發寒意的軍用長刀，在刺眼的陽光下閃耀發亮。

手、起、刀、落。

刀，刺入內臟，穿透身體。
空氣瞬間充滿血腥的味道。





白痴仔跌跪我面前，撫摸自己血如泉湧的傷口，眼神充滿不解。他以極難過的目光望向我，血手還不甘地抓向我的大腿，我沒有甩開他，直到他力氣餒盡，血手才無力地滑到我的鞋面，留下一道血痕。
我想他臨終最後的疑問是：究竟是誰在他背後？
他看不見，但從我視覺中，
卻清晰可見，
張日強的臉，非常冰冷。

「從背部插刀嘅好處，就係嗰個人至死都唔知究竟係邊個殺佢。」我無情踹腳，甩開屍體的手。

白痴仔死不瞑目，真希望佢下世可以擺脫白痴這個封號。

「我救咗你一命。」張日強正醞釀把我吞吃的情緒。

這時候，白痴仔的口裡竟爬出一隻黑色的生物，驟眼看是一隻只有六隻腳的蜘蛛。





同時，我也感到喉嚨好痕好痛，我站起來掐住自己的脖子，掐住自己的喉嚨，痕痛得好想伸手入內。
連張日強頓時都顯得不知所措，直到我眼底下見到兩隻黑色的小毛腿，從我的口慢慢爬出來。

又一隻六腳蜘蛛從我的口裡爬出，我迅速用手將牠甩開，牠掉在地上後，就跟剛從白痴仔口裡爬出來的蜘蛛會合，雙雙離開。

我被醜陋的東西嚇得魂飛魄散，低頭喘著氣，但不忘搖搖頭，否認張日強救命之說，澄清：「你係救咗狼人一命。」
當我終於感覺氣管通順，便站直身子，鄭重地說：「丘比特就係白痴仔，只有佢知道我同阿奇係遊戲裡嘅戀人關係，所以佢知道只要殺咗我，狼人就會死，然後大家都可以獲救，可惜，因為丘比特唔可以公開我同狼人嘅關係，所以唯有一個人嚟殺我，更可惜，張日強你就係唔捨得狼人死，所以一直暗中保護我，結果佢就死喺你手上。」

只是，我真想不到白痴仔就是丘比特。算吧……

我別個頭，望向蜘蛛雙雙逃去的方向，說：「六腳蜘蛛應該係當初落喺我同阿奇同白痴仔三人嘅降頭，或者科學啲黎講，係一種嶄新嘅生物科技……？」我也不肯定，「科技」呢樣野，我只係識佢條鐵。

但這種東西未免太可怕，一想到呢隻咁核特嘅蜘蛛喺我體內活了咁耐，我就不禁渾身打顫。

「其實你係故意引白痴仔出嚟？然後你一早估到我會嚟救你？」張日強震驚。




「係時候話俾我知，你點解要坦護阿奇，因為友誼？你同阿奇嘅友誼比較深？」我疑惑。

張日強閉眼沉思一會，然後終於開口道：「你記唔記得當初你第一日醒返，我話你就係狼人？」

「係……」
「嗰陣其實我想編造一個故仔去呃你，等你唔會再有搵狼人嘅意欲，但我實在太傻瓜，點可能用呢啲下三流嘅大話呃到你？」張日強自嘲說。

「原本你諗住點呃我？」我好奇。

「我諗住呃你就係狼人，而且係一隻有幻覺嘅狼人，然後用幻覺去解釋所有令你起疑嘅野。」張日強苦笑。聽完我也想笑。

我曾經說過，如果有人說我有幻覺，這個解釋真的很屈機。

「咁你真係好傻。」





我明白他的用意。
只有說我有幻覺，很多事情都可以用幻覺來解釋。譬如我沒有殺人，但這只是我的幻覺，其實我真係有在殺人。
對於一般人，在詭異不可思議的事件中失憶醒來，或真有可能被這種荒唐的大話給迷惑。正如我當初，其實都有一剎那懷疑自己。但最後，我還是屬於那種至死都相信自己的固執人士。


「係……我好傻……我仲傻在……我……都無諗過思思居然會自把自為將你帶走，仲想引你離開呢個島，佢想將一切交俾命運決定……可惜，事情就演變到呢個局面……」張日強深深嘆氣。

我心裡面突然多了很多疑問，什麼擅自把我帶走？什麼引我離開這個島？

「你講咩呀？」我深深疑惑。

「我講咩都唔重要，既然丘比特已經死咗……」張日強眼神瞬轉為凶，握動手上染血的長刀。

「你唔會想殺死我，因為只有我先知道阿奇喺邊。」我快速地賭著說。





「……」張日強猶疑了。
不……他並不猶疑！

一秒之間，他舉起長刀向我正面劈斬過來，我倉惶閃避，摺櫈卻已分為兩截。

始料不及，我只有，跑！