我被初戀女友瘋狂報復: 第七話

「喂~聽朝呢~我想食餐蛋治呀!」係電話度,慧勤用溫柔既聲音下達命令,而我從來無抗拒過佢既命令...
「係...除左餐蛋治,仲有咩想要?要唔要豆奶呢?」我扮晒餐廳侍應咁。
「唔使喇,淨係餐蛋治夠喇!」
事源慧勤既爸爸因病入院,而佢媽媽就要去醫院照顧佢爸爸,咁就整唔到早餐俾慧勤,於是佢就要出街食喇。但係自從小食部林伯兩公婆退休轉左俾汽水集團搞之後,食物款式係多左,但質素卻差左,尤其是餐蛋治,塊餐肉薄到大風啲都吹得走,於是我強烈建議由我整俾佢食!
「好似...好好味咁喎...」第一次我整俾佢食,依個就係佢根據外表俾我件既餐蛋治評價,跟住佢食第一啖...
「嗯...好味啊!同以前林伯整既一模一樣呀!」佢已經急不及待咁食落去,不消半分鐘件餐蛋治已經被佢消滅左。
「仲有啊!」
「嗯...真係好好味啊...哈哈哈...」睇見佢食得咁開心,我個心都甜一甜...
「係林伯教我嫁,有次我神早返到學校,跟住買早餐食,咁啱佢又整緊餐蛋治,於是就同佢傾計而佢又教我點整嘞...原來秘訣在於將麵包放落煎完午餐肉既鑊度烘,咁啲麵包就會吸啲餐肉油,又有食多士既質感!我試過用煙肉代替餐肉,比餐肉脆口但鹹左啲...」我喋喋不休咁講,而佢就食住餐蛋治好留心聽我講。
「阿仔啊,做咩依排咁早起身整早餐?」第二朝我阿媽八我早起身既原因。


「整俾人食嫁...」其實佢都估到我拍拖,只係我唔想講咁白...
「做咩整三份既?個女仔好大食嫁?」
「一份就自己既,一份就俾應該既人食既,一份就俾...唉...一言難盡...」
真係一言難盡...話說兩三日後慧勤無啦啦叫我早少少返,於是我就神早返到學校但佢都未出現,果日朝早可能食左阿媽啲綠豆粥突然攪肚痛,於是將裝左餐蛋治既食物盒擺係櫃桶後就衝左去廁所。然而,當我返嚟後,我見到我同慧勤既餐蛋治被人食緊,而食果個人係...羅小柔,而禍不單行既係慧勤啱啱返到,仲要見住佢食...
「幾好食喎,邊度買嫁?」佢講完就將最後一啖食埋...
「自己整嫁...」垂頭喪氣地講。
「估唔到你整野咁好食!」
「你知唔知不問自取是為賊也?」
「你想講咩呀?嗱!」佢係銀攞左張二十蚊紙出嚟,「當我買左嘞,滿意啦?」
「唔...咁好喇!」


「但我有要求喎!我聽日...以後都想食,當然我會俾返錢喇!」
我計過有我著數於是一口應承。之後我聽八卦儀講先知佢果日因為姨媽到無食早餐,返到學校就胃痛,最後聞到我既餐蛋治忍唔住食左...但係...而家最重要既係逗返慧勤先!
「唔好意思啊,份餐蛋治被人食左,我買啲野俾你食丫,餐蛋治?」
「唔食喇...唔使喇...」我聽得出佢有啲嬲...
「唔食餐蛋治...食熱狗丫,轉下新口味...」
「唔使喇...真係唔使喇...」睇嚟我要出絕招喇!
「你有無聽過大陸養豬既故事呀?」佢無反應,我繼續講:「話說有一日,有個男人走去問農夫平時俾咩啲豬食,於是農夫就答:「都係啲食剩既餸頭餸尾囉!」原來個男人係愛護動物協會既,要告農夫虐畜,咁就罰左佢一千蚊。第二日,又有另一個男人問農夫平時俾咩啲豬食,今次農夫醒左就答:「我俾啲山珍海味啊人參俾佢食嫁!」點知個男人係環保局既人,要告農夫浪費食物,又罰左一千蚊。咁跟住第二日又有另一個男人問農夫平時俾咩啲豬食,今次農夫就答:「無啊,我淨係俾張二十蚊佢,佢想食咩就食咩囉!」
同時我攞左張二十蚊俾慧勤...
「喂!你即係話我係豬?」我無講丫,唔好誤會啊...
「唔係...你點會係豬呢,等我買野俾豬...你食啦!」


「你...」佢未講完,我已經極速跑左落去小食部...
「嗱!你咁耐未食野,飲左包豆奶先啦。」我將飲管插落包豆奶度,再攞包蛋糕放係佢檯面,「再過一陣先好食個蛋糕,唔係個胃頂唔住嫁...檸檬味,你最鍾意嫁!」
「嗯...咁你食左野未呀?」
「我?我梗係買左喇...」我未講完,佢已經打開左包蛋糕,搣左一半俾我。
「我估你都係無買嫁喇,仲有啊...嗱...」跟住佢又係袋度攞左份禮物出嚟,「你記唔記得今日咩日子呀?」
「都唔係你生日,拍拖六個月紀念?仲有咩呀...」
「你生日呀,笨蛋!」
「我扮唔記得之嘛...」
「搵鬼信...」