我被初戀女友瘋狂報復: 第九話
「喂...係鐘樓等...好啊,到時見,拜拜!」
到左平安夜,好彩經理好人俾我當晏晝更,咁我就可以約慧勤八點係尖咀鐘樓等,咁順道就可以去尖東睇燈飾,當然禮物我都已經準備好,隨時踏正十二點就送俾佢。
「我到左喇...」出奇地今次係我遲到,「對唔住!我已經極速趕過嚟...你到左好耐呀?」
「唔係...我都係啱啱到...」佢今衣著真係好有聖誕特色,紅色既半截裙,上身白色冷衫再加上粉紅色中褸,顯得佢青春又可愛。
「我地不如去食野先囉...」
「好啊...啊...等等...嗱!Merry Christmas!」佢係揸緊果個紙袋攞左條紅白間條頸巾出嚟,圍住我條頸度,「我織左好耐喇,鍾唔鍾意呀?」
「鍾意!女朋友織既溫暖牌,點會唔鍾意?唔...好暖呀!」
「口花花...我份禮物呢?」見到女朋友撒嬌,有邊個男朋友唔心軟?
「嗱!本來想踏正十二點先俾你,順便慶祝埋你生日...」我係袋度攞左份禮物出嚟,係一條有圓型吊墜既頸鏈,「我搵左好耐都搵唔到「假如愛有天意」果條頸鏈,咁咪買左條差唔多樣既...鍾唔鍾意?」
「鍾意...」佢手掩住口,眼淚慢慢落下,「好...好貴既?做咩...晒咁多錢?」
「唔係好貴咋...」我幫佢戴上條頸鏈,再用手指輕抺佢既眼淚,「女朋友聖誕加生日禮物喎,幾貴都買喇!最重要係你鍾意!」
「我...」我唔等佢講埋落去,錫左去佢嘴度,而佢雙手亦輕輕攬住我,就係鐘樓下,我地擁吻左接近一分鐘(其實我無特意計時,但依個係我地錫得最耐既一吻)...
「喂...好喇...去食野喇...」佢拍一拍我背脊,溫柔咁講,臉上流露出一絲害羞。
「嗯...行喇!」正當我地手拖手準備起行時,突然一下重撃打落我背脊度,若再加多幾鎊力,我一定重傷到吐血身亡!
「喂!咪咁啱呀!」係羅小柔,天啊!你俾我抖下啦,搵一日見唔到佢得唔得呀?
「係囉,真係咁啱既...」我擰轉頭,除左羅小柔之外,仲有八卦儀,啟明同志玲。
「你地食左野未?不如一齊丫?」慧勤問。
「都好啊,多啲人好玩啲!唔知家雄點?」啟明望著我問。
「我無所謂啊...」其實我想同慧勤二人世界既,不過我見到啟明帶左相機,而且一班人食野可以食多啲又可以夾錢,再加上慧勤提出既,咁我就一口應承。
於是我地一行六人就咁一齊食野,睇燈飾同影相,咁就過左個平安夜喇(雖然同我期望既有啲出入)。聖誕假後,就係中期試,一如以往,唔考第尾已經可以劏雞還神,家長日又係叫我努力,發掘興趣果啲喇。
「嗱!還返俾你啊!」羅小柔將一疊我係聖誕假前借俾佢既DVD同CD還返俾我。
「嘩!我都無諗住你咁快還...」講真,係同學們之間借野唔還係非常普遍既現象,「還」已經係一個奢侈既幻想(至少我屋企仲有隻遊戲碟未還俾人)...
係度講下而家我地調左位後既位置,羅小柔依然坐係我左右,不過今次隔左條走廊,而真正坐我隔離既係志華,我地兩個都係自中二之後第一次同男同學坐,依隻無雀仔既...啊!唔係...係無腳既雀仔當然面露不悅喇!
「舊果啲還左嘞,咁我想問你借果啲點先?」佢老奉咁既態度問我,我當然...
「嗱!兩隻CD,一隻楊千樺,一隻什錦碟,mark低先,費事唔記得!」為免身體承受不必要既傷害,我決定借俾佢...
明明得一對耳邊聽到咁多CD嫁?
「你最近成日借CD俾佢喎...」食晏時慧勤突然問我,順帶一提,佢而家調左係單丁位度,即係我隔離再隔離。
「係咩?我有時都問佢借書啊借碟喇...」其實我有問好多人借野,但自從有次唔見左之後,我已經被其他人列入左「借野黑名單」中...
「咁你借左啲咩俾佢呀?」
「都係啲舊碟...前排佢話想睇返啲韓片,咁咪借左幾隻孫藝珍做既俾佢囉,都還左啦!」
「哦...喂...」佢哄個頭埋嚟,係我耳邊講:「放學我想去你屋企,得唔得?」
我差啲成柸可樂噴出嚟,佢咁既語氣令我一時間引發無窮幻想(主要都係啲愛情動作片片刻),實在令人熱血沸騰...
「我指我地一齊溫書咋喎!」
「係...係溫書啫,無其他野...」我馬上執好間房,由於我間房唔係好大,所以我地都坐係張床度溫書...
「喂!你唔好以為屋企無人你就可以亂嚟喎!」我從後攬住佢,手慢慢向上移,而我下身亦開始有反應...
為左唔可以令我得逞,佢直接企左係身,扮係參觀我間房咁...
「嘩!你都好多野喎,又CD又漫畫...咦?你又有隻「假如愛有天意」既?」
「咦?我果隻係度?咁佢還果隻...」我立即係書包攞出羅小柔還俾我果隻「假如愛有天意」DVD,打開一看,裡面夾左張摺左既畫紙。
「咩嚟嫁?」慧勤打開一睇,原來係我既素描畫像,而背景係我屋企,幅畫右下角仲寫左「For You」...
「佢上過嚟你屋企?」慧勤咬緊牙根講每一個字,佢既忿怒由佢雙眼爆發出嚟,有一剎那我以為佢會一刀殺左我...
「唔係你諗咁嫁...果次佢話美術習作...要畫人像...」
「咁你就帶佢上嚟屋企?」佢打斷我既說話,仲拎起個書包準備走,「我唔想再聽你解釋喇!」
「唔係呢,你聽我講先啦...」我情急之下捉住佢手,想大力拉佢返嚟攬住佢,點知...
「啪」一聲,佢果把力度之大連果夜我阿媽返嚟都問我係唔係得罪女人...跟住佢帶住兩行眼淚走左...