我被初戀女友瘋狂報復: 第十一話
「好熱啊...好撚熱啊...」志豪熱到忍唔住爆晒粗...
面對三十幾度既高溫,再加上中年午時分,太陽直曬我地頭蓋頂,我地係巴士站等唔知幾時開既巴士...
「好熱啊...係唔係唔開嫁?等左十分鐘喇!」連平時耐性較好既慧勤都呻,可想而之我地等左幾耐。今日佢著左件黑色小背心,加件淺粉色格仔裇衫當褸著,下身著條牛仔熱褲,確實係炎夏既最好配搭(對男仔嚟講)。
「不如我地玩個遊戲丫...」我突然有個好玩既主意,「我地由而家開始,唔准講個「熱」字,就算英文都唔得,講左就罰五蚊,啲錢最後攞嚟大家飯野食野既,好唔好?」
「幾好喎...就咁話啦!」志豪豪氣地應承。
「好啊,不過罰左你先!你講左個「熱」...」羅小柔總係捉住我既錯失...
「好...嗱!你都要喎...」為表公正我身先士卒。
「無散子啊,擲住數先啦!」瀨皮...
等左陣終於有車,上車後,經佢地安排,我坐係慧勤隔離,而佢就坐窗口位。
「今日天氣幾好呵...哈哈...」佢照舊無理我繼續望風景...
「睇下,我帶左好多野...有啤牌喇,UNO喇...仲有帶左午餐肉,咁就可以...」我不停講左幾分鐘野,佢依然固我咁睇風景,其他人唔知仲以為我自言自語痴鬼左...
「有咩咁好睇呀?」我決定挺而走險,「你聽我講下野,唔好咁小器好唔好?」
結果...佢淨係怒啤左我一下,跟住擰返個頭繼續望風景...都好,至少佢對我講既野有反應...
「終於到喇!」
到左渡假屋,我地擺晒啲野換好晒衫,急不及待衝左去海灘。去海灘,玩既就唔止水同沙灘波喇,最大既戲玉當然係掟人落水,尤其係女仔...可能顧及我既關係,無咩人對慧勤出手,反而佢自己跳左落水,而我就被羅小柔同八卦儀夾手夾腳咁掟落水,當然我都拖埋佢地落水。不過,最顛最西利都係志豪,一口氣將啟明同志玲一齊掟落水,最後我地八個無一倖免全部濕晒。
見到慧勤件衫濕晒仲現左裡面件...我立刻除左我僅有既T-shirt俾佢遮住先。
「唔洗喇,依件泳衣嚟...」佢微笑咁婉拒,依一笑俾我既感覺良好,起碼佢都回應我,睇嚟進展良好...
「無肌肉就唔好show出嚟喇!」同樣除左件上衫既志豪揶揄我,的確同佢比我係相凝見拙...
「好喇,差唔多時候返去啦...」於是我地八個就濕住咁返渡假屋。
「整好未呀?好肚餓啊!」唯一唔識煮野食既志華係度嘈生晒...
「未食得就啤啤先喇!」志豪攞左半打支裝啤酒出嚟,以佢個樣基本上無人信佢唔夠砰...
「C.O.O.L呀?」
「唔通H.O.T咩?」我地既禁語遊戲連溫度既形容詞都唔講得...
「食得喇!」一大班人最好就係打邊爐,肥牛,肉丸依啲當然唔少得,而最大驚喜係慧勤佢地班女仔特登包左啲餃子,當然有「驚」又有「喜」喇...
「嘩!好鹹啊!」
「唔係喎,我果隻好味呀...可能你熱氣啊!」
「點解未淥先爆既?」
好彩既係...我地食完都無咩事...
「...咁個護士就舉起隻手講:「係咪呢隻呀?」...我都話我唔識講嫁喇...」講鬼故,可以話係宿營必備節目,可惜既係慧勤講既醫院鬼故我地大部份都聽過,而由佢把聲演繹...確實驚嚇度大減。
「唔係呀...我覺得幾驚...係嘛?」志華挫一挫我手掙,要我和應,總係覺得近排佢對慧勤殷勤左...
「係呀,我個心仲驚緊...不如講第個?」羅小柔又爭住和應,自從上次畫像件事我同佢對質,知道個真相後,我對佢既感覺更加複雜...
「仲有無新既未聽過嫁?」大家你眼望我眼...
「差唔多係時候出發喇!」
講真,呢次係我人生以來第一次,亦係唯一一次摸黑行山,為既係聽朝既日出(不過後尾聽人講睇日出最好係西貢...)。於是我地各人攞住支電桶,凌晨四點左右出發。可能慧勤朝早玩太投入關係,佢既腳步明顯比其他人慢,所以我都係佢身旁睇住佢。
「你好似好攰喎,使唔使抖下?」我關心佢問。
「唔使...行啦,我地跟唔切佢地...」佢突然失左平衡,向左傾左一傾,好彩我及時接住佢...
「唏...你咁樣...係一邊坐下先啦!」於是我地係路邊坐低。
「其實上次...」趁而家得我地兩個,我解釋返上次幅畫件事,「唔係我帶佢上去,係佢跟蹤我返屋企...你...唔信呀?」
「吓?」佢一臉錯愕,「你講...咪信囉!」
「吓?真嫁?點解既?」
「咩點解啫?你唔係話過以後唔呃我既咩?」連我自己都唔記得有咁講過。
「係,係有講過...其實我有問過佢,佢話佢鍾意既唔會鍾意佢,仲話果個唔係我...」
「哦...」佢淡然吐出一個字。
「聽講你年終試...其實關唔關我事?」
「唔關,係咁啱果時...婆婆過身...無晒心機溫書考試...不過咁都好丫,可以同你同班昅實你!」
「講到我咁...不過,假如果時我係你身邊既話...我應承你,無論發生咩事我都係你身邊守護你,做你既守護天使!」
「好啊!勾手指尾丫!」我地兩隻尾指交上,而雙唇亦...
「其實我今朝有掙扎過嚟唔嚟嫁...」
「咁點解你會嚟既?」
「因為我知你一定會逗返我囉!」