「喂,羅小柔,借本英文作業嚟參考丫!」一朝早,劉家雄就問我借功課。
「參考?抄考嘛!」
「是旦啦!總之借嚟喇...」我怒啤佢,「唔該...」
「最多咪欠交,咁緊張做咩啫?」
「你有所不知喇...」家儀插嘴過嚟,「阿劉家雄一直暗戀Miss Lee嫁,所以佢唯獨英文功課係唔會欠交嫁!」
「哦!嗱...」咁啱林慧勤經過,我特登大聲講,「費事你欠交功課被人罰留堂啊!」
「咁大聲慌無人聽到咁...唔該啊...」
於是,劉家雄就攞住我本作業起勢咁抄,而我就係側邊陰陰嘴笑...
「聽日見喇,拜拜!」同同學講完再見後,我無返屋企,自從果件事之後,我唔太鍾意返屋企,就算返到屋企都係對住四面牆,倒不如四周圍行下,天黑先慢慢返屋企。
最近鍾意左嚟到公園畫畫,有時畫下景,有時畫下人,不知不覺時間就咁過去...


「係度坐...嗱,你個魚柳飽...」係以前間學校附近都有個公園,有時我會同陸綺珊一齊係度食晏...
「最近有無功課唔識呀?我可以幫你喎,雖然我成績唔係好好...」陸綺珊食住薯條問我,佢係鍾意食左薯條先之後先食飽,同我相反,所以有時我食完個飽先發覺啲薯條俾佢食晒...
「無啊...你不如教我畫漫畫仲好...」
「你已經畫得好好喇,我都無野可以教咯...」
其實我邊使佢教,只不過想有個藉口黐住佢啫...
「咦?喂...跟我嚟...」佢突然執晒啲野,行左去叢林一角,探頭望住一對同樣著住我地校服既女學生,而佢地明顯比我地大,應該係中五中六度,而佢地同樣匿係無咩人發現既叢林度,面對面咁企...
「邊個嚟嫁佢地?」我覺得咁樣望住人唔係咁好,所以問陸綺珊佢地係咩人。
「高啲紥馬尾果個叫孫嘉敏,中五既,聽講佢係中五已經蝦蝦霸霸,有時會欺凌啲睇唔順眼既同學...你睇矮啲果個低緊頭,個樣幾可憐,應該而家被孫嘉敏恰緊喇!」佢講到好緊張咁,我有一刻信以為真。
「咁我地而家點做?」聽到佢咁講,搞到我都緊張埋,我驚我地隨時大打出手。
陸綺珊將食指擺係嘴唇,示意我唔好出聲,靜觀其變。同時孫嘉敏已行近果個女同學,而個女同學亦慢慢抬起頭,下一秒卻令我地目瞪口呆,佢地竟然接吻,仲要唔係蜻蜓點水,而係激吻,而且佢地仲開始撫摸大家既胸部...


我地兩個呆到唔識反應,直至佢地結束為止,其間我個心卜卜咁跳,而我手中仲揸住半個未食既魚柳飽...
「估唔到佢地咁...」我地沉默咁行返學校,陸綺珊好不容易講左句野出嚟,而我成個腦都係頭先孫嘉敏佢地接吻個畫面,同時亦浮出一個問題:究竟接吻個感覺係點既呢?
「喂,行快啲喇,遲喇...」陸綺珊突然拖住我手快步行,我卻有種觸電既感覺,雖然以前曾經被女仔拖過手,但今次個感覺卻有啲唔同,同時我腦海幻想我地接吻既畫面...
手不停地畫,淚卻不斷地流,曾經我幻想過好似眼前依對情侶咁互相擁抱接吻,旁若無人然而,我既戀愛卻不被世人接納,只有埋藏係心底。
自此我就無再踏觸依個公園...
「我下一世唔做女仔啦!」差唔多每次生理週期我都痛到死去活來,今日仲要因為咁無食早餐,胃痛同M痛一齊夾攻...我真係唔想做女仔啦!
「使唔使買野俾你呀?」家儀好心咁問。
「咦?你聞唔聞到好香呀?」香味由劉家雄櫃桶傳出,我望一望,有個食物盒,裡面有兩份餐蛋治。
「依份咪係劉家雄佢地撐枱腳既早餐,尋日返學咁啱見到佢地係操場食野。」
「撐枱腳...」望住份餐蛋治,心裡卻有種莫名既感覺...


「喂...你真係好肚餓喎...」家儀無奈地講。
可能係肚餓,可能係妒忌,我大啖大啖咁食,越食越急,當食到最後一啖時,劉家雄已經返左班房,而林慧勤亦比佢更早返(只係我無留意)。
「你知唔知不問自取是為賊也?」佢個樣雖然垂頭喪氣,但語氣卻充滿挑釁。
「你想講咩呀?嗱!」我係銀包攞左張二十蚊紙出嚟,「當我買左嘞,滿意啦?」
同時我亦要求佢每朝整俾我,而佢亦爽快答應,跟住佢就行去林慧勤度,應該係逗返佢。
「真係食得嫁?」陸綺珊用充滿疑惑既眼神望住我係家政堂整既排骨。
「你試左先啦!」老實講,依次係我第一次整俾屋企以外既人食,「點呀?」
「可能我熱氣掛...」佢食完一舊就飲左好大啖水,「係呢,你聖誕節會去邊?」
「唔...以前爸爸媽媽都會帶我去旅行既,但自從細佬出世之後都無去過,應該今年都係留係香港...」
「哦...咁...我想...我想...」佢吞吞吐吐講,「我想約...約你出街...」
「啊...哦...好啊...」突然個心跳得好快,聽完佢依句成個人飄飄然咁,差啲暈左係度...
「哦...咁我果日再聯絡你丫...」佢睇落好興奮,仲一連食左幾舊排骨...
「咁...去邊呀果日?」
「度時先講,唔係點俾驚喜你,你記住果日著靚啲得喇!」佢頂唔順,成支水一口氣飲晒...
「其實係唔係好鹹啫?」


「都話我熱氣咯...」
已有 0 人追稿