辦公室「吞pop」大全 - 如何可以喺公司度蛇王而不失霸氣: 辦公室「吞pop」大全1 - 如何可以喺公司度蛇王而唔俾人發現
我係阿武，英文名叫Bowie。
如你所見，我係一個打工仔……
乜野話？見唔到！咁俾啲想像力啦！
想像下一個著白色恤衫，黑色西褲，黑色皮鞋，載粗黑色眼鏡，廿幾歲，平均高度，平均身型，平均體重，平均長短……妖！當我冇講過啦！
總之，一個平平凡凡、普普通通既男人，而家坐係張電腦枱前，戇戇居居咁望住一大疊單，發吽逗……
好既！呢個就係我啦！
或者你會問我，做乜要戇戇居居咁坐係電腦枱前望住一大疊單？喂！返工呀！問黎都多餘！搵食姐！犯法呀？
我地公司係做紅酒貿易既，即係呢，阿唐唐收到成個地下皇宮都係嗰啲呀！我既其中一個工作，就係負責將啲單check清楚有冇出錯，冇出錯就出cheque，出完cheque俾我阿頭check，阿頭check完就俾老細check，老細check完就簽，簽完就去reception等交收。講起啲cheque既銀碼，每日都幾千萬上落架，諗起都犀利！
或者咁講啦，我而家唔係真係check緊單……
「我地而家見到C朗射罰球啦，對家奧沙辛拿既門將就係安達斯費南迪斯呀……C朗起腳啦，哎呀！呢個波射得渣左啵，實擋到啦……唔係，哇！個龍門做緊乜呀，捐山窿，係兩腳之間碌入網喎！」
「Yes！入左！」
我舉高雙手……
弊！差啲嗌左出聲，唔記得呢度係公司呀，女魔頭隨時會殺番黎架！
冇錯！如你所見，我喺辦公時間睇緊波，睇緊西班牙盃精華重溫，順便自己做埋旁述，其實講咁多野，簡單啲講，就係「吞pop」囉！
乜野話？又見唔到！
咁都好既，你蛇緊王既時候又點會想有人見到呢？
我地女魔頭管得好緊架，驚我地吞pop蛇王唔做野，特登係我地天花板上高擺左一部閉路電視，實行全天候廿四小時監控，一句講野，「BIG MAMAS ARE WATCHING YOU」！
但作為一個蛇王勇士，要吞pop就需要不畏強權！
吞pop第一要點：偷懶需要勇氣！蛇王無罪！吞pop有理！
我第一日番工知道呢隻「天眼」既存在，亦都係我人生中第一次覺得中學讀物理以及Biology係有用既！
每一隻眼都有盲點，「Blind Spot」。
所謂盲點，就係因為眼角膜其實係一塊凸透鏡，當一個物體處於凸透鏡既焦點，佢產生既影象就會係無限咁遠既位置，眼球上就會產生唔到影象，呢個就係眼球既盲點啦！
而攝錄機既盲點就簡單得多，就係我既身體遮住部電腦螢光幕既部分啦！
好彩，個攝影機就係個位正後面，為左每一日都可以欣賞到精英球賽，或者上下高登，追下post，經過我精心計算，攝錄機既迴轉速度，俯角仰角全部度過曬，然後將個Mon擺好位置，將張辦公凳移好，再借用係男人都會有既膊頭，就可以唔俾攝影機發現，開開心心睇波去。
當然啦，咁樣係有代價既，就係要將個Window收到好薄好細，長遠而言對眼睛係有不良影響。鬼叫我生得唔夠高，陣係遮到個Mon一半咩？
另一個問題，就係唔可能長時間吞pop，因為唔止女魔頭隻「眼」，女魔頭仲會親自現身，親自用佢地既眼去觀察我地、打量我地、欣賞我地，所以……
吞pop第二要點：工作時要娛樂，適當時候先做適當既野！
工作始終要做野，偷懶唔好太過分。
唔係，返工係一半用黎做野，一半用黎受氣。咁我花左七成時間做野，三成時間係娛樂，消番我受左D氣，都算好厚度啦掛！
所以，我望望個鐘，十點啦。嗯，一個鐘頭娛樂都幾夠，我有足夠精神一陣去受氣啦。
我而家就係足球轉播網站個Window撳交叉，然後開始check單……
咪以為我蛇王多，做野一定好懶散，我做起野上黎可謂相當認真架！認真到呢……認真到呢……
認真到呢……我都懷疑呢個係咪我自己？
鬼上身呀！一做野就拼命做，一定係鬼上身呀！
我諗每個打工仔番工嗰陣，都會覺得自己係鬼上身啦……
咁搏做乜？未死過呀？定係趕住去投胎呀？
咁樣啦！而家就十點半，全公司最搏殺既時候就係而家啦，個個都埋頭苦幹，唔做野都要扮做野，皆因呢個時候，總有一個女魔頭會殺番黎公司，睇下你地班奴隸做緊乜。
而我而家面對緊既最大問題，就係……
我阿頭未番黎！
「大雄」，我最中意咁叫我阿頭，係公司裡面，連埋我，唯二既兩個麻啦佬。其他既都係啲師奶阿姐之類啦，仲要好叫唔叫，叫「Diana」、「Fiona」之類。大佬呀！你地擺個周秀娜、官恩娜唔得架，你地班女魔頭點請人架？
講番我阿頭大雄，又係好叫唔叫「Edison」，所以公司啲阿姐都叫佢「Eddy哥」或者「雄哥」。佢同我一樣，都係蛇王高手，不過就係向另一個方向發展……
大雄係一個典型既晚返早歸，盡量減少留係office時間既「射波高手」！
佢恃住自己係會計總管，經常要去銀行，所以就每次都拉長~~佢出街既時間，實行同各位女魔頭越少見面越好。至於佢出街會出邊？哼哼，呢個世界，蛇竇多的是，各大小茶餐廳、快餐廳、麥記肯記，坐得一時得一時，揸住部i-phone、PSV，慢慢細味遊戲人生，寫意得佢丫！
所謂「晚返早歸」，就係遲一頭半個鐘番工，早一頭半個鐘放工。人地問佢去邊，佢次次都話去銀行辦「公事」，又話啲銀行呢出張支票都搞一個年紀，又話傾credit仲麻煩過打大佬，真係夠「公事公辦」呀吓！
仲有一個重點，「射波高手」。所謂「射波」，直接講就係「扮病請假」。根據網上小傳聞，射波，音義同字意都近同「卸膊」。我舉個例子答你，當皮里斯想射十二碼時，佢刻意扮射門而又唔射門，輕描淡寫咁卸個波俾亨利射，而亨利走上前，亦都扮射唔射，實行放曬飛機又可以贏到場波。能夠達到呢個「欲戰非戰，欲病非病」既境界，就係射波既最高神萃。
套入番大雄既情況，佢每個月好似例行經事咁，總會病番一兩日，而每次打番黎，都會類似咁話，「哎呀，我知道好多野要做，但我痾到……根本離開唔到廁所！」，又或者，「啊~~我感冒、發燒，好……好辛苦，我……我聽日好D……會番黎做野架啦……」之類……
其實我冇辦法理解大雄係咪真係氣弱血弱、體弱多病，但佢既康復能力可謂神速，感冒只需一日立即好番，第二日就若無其事，開開心心上班去。仲要次次都拎住大大張醫生紙，claim番公司二百幾十蚊湯藥費添！
但今日比起平日係唔尋常……
大雄遲番並唔稀奇，但遲過十點半番就絕對稀奇，亦都絕對大鑊……
原因，已經係門口出現啦！
十點半鐘，一定會有一個女魔頭番黎！
驚你唔知，我講明先，我地係有三個女魔頭架，而十點半，冇定邊個女魔頭番黎先，總之一定有一個女魔頭會番！
更加大鑊既係，今日番黎先既係管錢既「射喱眼」！
射喱眼把大門爆開，爆風強得將公司裡頭既人全部吹飛，然後用招牌既斜視眼從左至右將啲人全部射死。平日既我，就算面對槍林彈雨，都可以淡淡定定有錢淨。但今日，我側邊個擋箭牌就唔見左啦……
射喱眼走到我既正前面，對眼就射喱到我側邊個位，一邊望住大雄張空凳，一邊問：
「Edison左去邊呀？」
「呃……呃……」
我一時語塞，講不出聲，額頭滴汗，心底打震……
說時遲那時快，射喱眼搵緊既「Edison」打開大門，恤衫都未整理好，額頭又係滴緊汗，一邊喘氣，一邊托番好副眼鏡……
接下來，人類將會見識到，乜野係真正既人間煉獄……
---
「喂！大佬呀！你仲乜今日咁遲番呀？」
「瞓過龍……」
到左Lunch time，我地兩個唯二既男人，只有一齊吃飯，互吐苦水。
而經過「三家公審」之後，大雄仲係面有難色咁。
「你唔知道個老佛爺駕到嗰時，我有幾牙煙呀！」
---
阿武想像片段
「老佛爺駕到！」
隨住一聲傳令，射太后徐徐步入大殿。
只見她左顧右盼，巡視四周，走到小武子面前，問曰：
「小武子，小雄子何在？」
「回老佛爺！」小武子頃刻下跪，戰戰競競回話，「小雄子……小雄子尚未歸來啊！」
語畢，小雄子衝衝忙忙的走入大殿，履冠仍見凌亂。
「大膽狗奴才！」射太后斜著眼，怒叱一聲，「你可見現為何許時辰？何故日上三桿才向哀家行禮？實在罪該萬死！」
「老佛爺饒命！饒命呀！」小雄子匆匆跪到地上，不斷向射太后跪拜……
---
「真係好對唔住，但係瞓過龍都係人之常情啦！」
「咁你都唔好講埋啲古靈精怪既借口啦！竟然話喺番工途中撞到個少女，話唔見左一啲好重要既寶物之類，搵下搵下就過曬時間咁……」
「咁我嗰時咁驚，諗到乜就講乜啦！」大雄反駁咁話，「係啦！就好似一切都係Akashic Record既指引，係天意呀！」
「喂！你不如下晝都射波走人啦。駛唔駛睇下醫生呀？知唔知青山幾多號電話？」
「唔好玩啦！我今個月已經病左兩日，好多啦！」
的確，大雄一個月係唔會病過三日，一來會扣人工，二來都係嗰句，偷懶唔好太過分啦。
「不過呢，經過左地獄三巨頭既審判，十一隻眼連續不斷射擊我，我以後都唔敢瞓過龍啦……」
---
大雄想像片段
呢度係冥界第十八層既審判之間，喺冥界三判官既玉座前面，擺左一套閻王之毛筆與生死冊，以及判別正邪之天秤與羽毛……
坐喺玉座上面，三位神情既肅穆又恐怕既地獄判頭，分別係掌管冥界財經之斜目王、掌管冥界政事之三目王，以及掌管冥界外交之鬥目王，共有十一隻殺氣騰騰既眼睛，狠狠注視住跪喺地上既罪人。
「今日要審既罪人係葉子雄！」三目王先大聲宣讀犯人既名。
「葉子雄『愛迪生』，你知道你犯左乜野滔天大罪！」斜目王開始審問犯人。
「小人只喺遲黎報到姐，求三位大人饒命！」犯人不斷跪拜求饒。
「都話此等人物唔可以留低架啦，經常生病唔黎報到，」鬥目王定目注視著犯人，不斷去批評，「又經常留連人間界，又喺我地面前胡言亂語，敷衍了事，對冥界絕對係冇貢獻呀！」
「咪住！」斜目王射厘住鬥目王，然後話，「始終愛迪生都係我既人，冇左佢對冥界既資金流動一定有阻濟。」
「咁等我講句公道說話啦，」三目王話，「既然佢係有用既話，死罪可免，活罪難饒，我地將佢既惡行以文書通告全冥界，並且將佢永遠困係呢個地獄十八層內，永不超生！」
「大人饒命呀！」
「哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈哈！」
---
「唉！終於都係收左封Warning Letter，好恐怖呀十一隻眼！」
「喂！乜鬼野十一隻眼呀？」
「呢，管錢既射厘眼，連埋眼鏡，一共四隻；管客既鬥雞眼，冇戴眼鏡，兩隻；最後三隻眼，額頭上面有粒癦，唔係，係通天眼，連埋副眼鏡，咁就有五隻眼。四隻、兩隻、五隻，全部加埋一共十一隻！」
我輕輕咁一下敲落佢個頭度。
「邊鬼個會明呀？」
而家Lunch time，成條街都係行去餐廳食飯既人，然後我先至發覺。
「喂！我地究竟去邊度食架？」
「被地獄三巨頭咁公審完，時間都冇幾多剩啦，食老麥算啦！」
「你仲好講既真係？你遲大到，我要等你俾人審完，再一齊食飯先咁遲炸！」我嘆左口氣。「唉！算啦！老麥就老麥啦。」
「對唔住囉！其實最衰都係嗰三件野，一有機會我一定炒佢地魷魚！」
「咁你唔撈又想撈乜？」
「去追逐自己既夢想。」而家大雄既眼光，好似星星咁發緊光。
「好啦，咁你夢想係乜？」
「我要揸fit！」大雄握緊自己既拳頭，全身好似發緊光咁。「我要做老闆！」
「好，咁你要做乜老闆？」
「冇諗過！」
我又敲落佢個頭度。「咁你仲好意思講既？」
「夢想炸嘛，都係諗下就算，寫過就算啦，」忽然大雄啲光芒又冇曬。「你就冇夢想既咩？」
「夢想呀嘛，我既夢想就係有一個平原，冇公司冇政治，但係有一大個球場，無論係而家仲好靚波既C朗、而家仲好靚仔既碧咸、而家肥過隻豬既朗拿度，抑或係好似你同我一樣咁屎波既普通人，唔理球技，唔分時代，唔分種族，總之大家開開心心都踢番場波，大家開開心心咁追住個波，追到冇曬時日，冇曬分寸，乜鬼煩野都唔會發生……」
……
「喂！」大雄用一副幾可惜既樣望住我，「我就話冇諗清楚啦，你嗰啲直頭係不切實際喎！根本就唔可能發生！」
「豈！都話明夢想姐，發下就算，不如發大啲啦！」
廢噏一輪，我地都行到去老麥個大門口囉。喺呢個老麥個M字招牌跌落黎，都會壓死三個大學生既時代，講夢想又有乜為丫？不如快脆啲，食個包，塞飽個肚，然後懵口懵面返寫字樓做野啦！
「喂！你去搵位坐，你食乜？」
「照例，豬柳強包啦！」
大雄你都識揀囉！八蚊例餐豬柳強包……啊，唔係，而家已經係九蚊啦，即係又快又平又夠塞飽個胃，豬柳強加塊蛋，脂肪卡路理又夠，的確係唔錯既選擇。之不過，九蚊例餐，仲有麥香芝包同雙牛豬堡姐，一定要豬柳強咩？
於是，我係左邊條龍，排呀排，排呀排……一邊轉下珠一邊排，終於，等左好耐（幾分鐘），到我叫野啦。
「唔該兩個豬柳蛋包。」
收銀小姐一邊打部收銀機，一邊問，「係咪拎走架？」
好！問得好！我真係好想一把火就咁車埋去！睇死我買兩個包咁姐，就一定係拎番去食咁悽慘！但係，我唔可以對一個只係想「打份工姐」既人咁冇禮貌架嘛！
「想問喺度食得唔得呀？」
話雖如此，從我既語氣聽得出，我都係冇辦法收一收我把火……
「兩個豬柳強！」
我將個盤拍落張枱度。
「哇！阿武哥，你唔係仲嬲我呀嘛？」
「唔係唔係，快食完番office啦，俾時間我上下網都好啦。」
於是，我地就拆開豬柳強件衫，然後一野咬落去。
……
「做乜狠野！」
個豬柳蛋包裡面竟然夾左張紙？
喂！我對個小姐有唔禮貌姐，唔駛咁樣報復掛？
不過，我聽到大雄都喺度嗌「做乜狠野！」，即係話大雄個包都有料到啦。
我用認真既眼神望住大雄，大雄當然都望番我轉頭，我地都用檢屍官咁既態度，將眼神望番落個包度。
「大雄，一齊拆開佢黎睇下。」
「嗯。」
我拎開面頭層包，仲有芝士同豬柳，因為根據呢個口感，張紙就係個豬柳既下面。
一拎開……
哇！好恐怖！恐怖到我地都唔敢出聲，甚至連想住個包去投訴既念頭都冇曬。
裡面，真係，夾左張紙！
張紙，仲要，寫住……
「你地返工吞pop既證據係我手，唔想死就今晚七點，重慶大廈出面等」