一個普通女仔既大學故事: 九

SP:【Rocky..我好掛住你啊…幾時可以見到你啊？】
Rocky:【今晚好冇? mk等】

大學生生活於一個灰色地帶，佢教識左我，你可以同一個人做晒情侶會做既事，但你地唔一定係情侶。

已經聽過太多類似既故事。

日日講早抖掛住你又點？隔日搵你出街又點？拖手咀甚至搞埋野又點？

如果你咁傻走去問人「我地係咩關係」，佢一定會答你「我地咪好朋友囉」又或者「之前衝動左sorry呀。。」



唔知呢種扭曲既生活係我身邊先有，定呢個世界都係咁？

以前好曳既同學大左好似愈來愈乖，玩夠有個穩定男女朋友從此摺埋渡日。

掉返轉，以前毒撚入左u或者愈叻既同學，私生活就愈混亂。

所以經歷完果次（我認為）浪漫既睇日出，就算我有幾掛住書生，想同佢更進一步發展，我都只會擺係心入面，用返普通朋友既態度同佢傾計。我知道佢呢D男仔做SP就有可能，對我絕對唔會認真。日日聽埋佢吊呢條女，媾果條女，加埋佢咁靚仔咁多女埋身，俾你一齊左都無安全感啦。





Summer唔搵D野做下，都無可能日日約到frd去街玩，不如搵下外快仲實際。於是我去左學校附近一間文青Cafe返part time。呢間Cafe好靚，台灣文青Style，全店坐到大約30人，牆身地下都係石屎色，木製傢俬，周圍放左D樂器。填好更表講定返邊日就得，好free，午更就算飲左酒都可以起到身。

「你幾時可以返工？」老細問我。

「而家都得架啦！」我同老細講。

我入去換左套制服，好想扮台妹講返句普通話。

「喂！Step！乜你係度既？」突然背後有人拍我。竟然係Felix？！



「我今日第一日返工呀！」我同Felix講，個心好開心，有Frd一齊返就無咁悶！



Part time做既野不外乎幫客人帶位，落單，收錢，同埋水吧。

好快上手，無咩特別， 6點啦，平平無奇又收工。

「傻佬～」有客人望入黎水吧，叫Felix。原來係Felix女朋友黎接佢放工。同Felix一樣係陽光女，一身小麥膚色都幾登對。

「好快，我執埋D野就走架啦。」Felix立馬執野就走。「老世～我走先啦！Step，bye！」

望到一對對上黎拍拖既客人，又望下Felix同佢女朋友。



街裡愛人一對對。諗諗下，都分左手成個Sem，我好似開始習慣一個人既生活。

到底幾時先會搵到屬於我既Mr. Right呢？