一個普通女仔既大學故事: 十四

「7點啦，快Ｄ起身Hold game呀～～～」Parsons入房叫醒我地呢班OC。

「好眼訓。。。」玩O camp無得訓又冇錢收又要做野，真係好鬼辛苦。

我同書生、Janice係Check point hold Running man 既task。



而家D O Camp都幾開心，有情侶戰玩，用個紙圈圈住兩個人隻手。



「拖住好似安全D，無咁易俾人撕爛個圈圈。」相信唔少男Fm鼓起好大勇氣先夠膽講出黎。

「好呀。我唔想咁快死呀。」呢個係靚仔得到既回答。而我觀察所見，通常靚仔配靚女都會拖住。

「下，唔好啦，男女授受不親呀。」有D毒男配左個女仔，個女仔避到母雷宮咁遠。You face your fate係不限年齡架。



「OC～呢度係咪有Task？」琴日係Red House玩Game幫我甩身個組仔喎。



介紹返，佢身高大約175度，瘦瘦地，單眼皮QQ地，帶住個黑框眼鏡，成個愛回家個十仔咁。

「係呀。」做正經野先。「依個係一個情侶Task，你地兩個要跟住D圖做動作。根據難度可以拎返相應既錢，分別係20蚊、40蚊、同100蚊。」

挑完20蚊、40蚊個task都輕易而舉，佢地就想做100蚊個task。「抬起個女仔10秒，隻腳凌空開始計。」

「太簡單啦OC！有冇難D，我做完你俾多D錢我啦～」組仔話。

「你同我鬥耐啦！嬴左我就俾200蚊你。」書生講完就一野抱起Janice。



「好！就咁話啦！」成班人圍觀起哄，我心諗，好彩Felix冇見到姐。

最後果個QQ組仔嬴左，我feel到成班freshman對住佢都心心眼，好青春啊。

「私人醒多500蚊俾你，唔好話俾人知啊。」我同佢講。

「多謝靚女OC。」佢就拖住個女仔跑走左。有D想識呢個組仔添，但係我毒，我唔敢。

書生同Janice拎住枝筆去搵D行行企企唔玩既freshman畫面，好開心。有時佢地去左蛇王就剩底我一 個係度9 fing。



終於，最好玩最感動既Camp Fire都黎左。。

我又見到果個QQ組仔。一路跳camp fire我都Mark實個組仔，係佢附近出出入入，希望佢會留意到我。冇計啦，我細膽，面皮又薄，唔想主動去R水吹。



「好啦，大家係咪跳舞跳到好攰呢？我地黎玩大家最期待既遊戲啦－－就係Changing Partner啦！」MC話。

Yes! Changing partner 簡直係我呢D毒撚既救世主！

我極速鼠到去QQ組仔既附近，屌，要俾個核突肥仔拖住手跳舞。

冇計，為左要識個QQ組仔，死就死啦。

「We walk to the left.. we walk to the right...」

「快D同新識既朋友打個招呼啦，問下佢叫咩名，唔好唔記得同格離個靚仔靚女抄牌呀。」岩岩轉到我，MC就講呢返說話，多謝你呀MC！我愛死你！

「Hi 組仔，我地又見面啦。」呵呵，我被佢暖暖既手心捉住，好幸福呀～



「Hi 靚女OC，你電話係幾多號呀？」佢問我。十仔啊，你真係醒目！

「6xxxxxxx！記得就打俾我啦～」我特登重覆多一次，希望佢會記得啦。

「靚女我一定記得架喎。等我電話。」短短5句就完左，唔知佢會唔會記得我呢？



就係咁，3日2夜既O Camp好平靜咁完結左。。。我亦冇識到D咩人。。。我去玩O Camp做完三日苦力都冇得到D咩。。。O camp每個環節都好匆忙，同人既交流就只限果幾分鐘或者幾句說話。奉勸咁多位freshman一定要把握機會，想識果個女仔就唔好諗咁多，即刻去做啦，唔好等第時後悔。曾經遇過d正仔係我面前，但我冇珍惜呢個機會，如果可以為佢加上一個期限，我希望係一萬年。。。。咳咳。。。