一個普通女仔既大學故事: 十七
夜晚，我又落左去搵書生佢地Hea。
好似係上次3P完之後第一次見面。岩岩入去果下我自己有少少Odd。不過我諗書生同Wade都唔會提，就等呢件事變做永遠既秘密啦。玩完就要學識抽離。
佢地一如平常咁打Fifa，好鬼煩好嘈。自從上次MK Carman chur完書生被人打入冷宮，我都好少見到佢。基乎都係我一女四男呢個組合出現。諗起仲有2個禮拜我地呢個2個月既組合就唔會再出現，不禁開始有Ｄ唔捨得。
「就黎Quit hall啦，你地仲有咩想做又未做架？」係咁熱鬧既情況底下我居然問Ｄ咁撚哲學既問題。
「入啦！！！屌！！咁都入唔到！！On 9 Parsons！！」「屌！！」「你老味，你估我想架。」
「Sor 9呀Step，你岩岩講咩話？」呀Wade問。
「我話，就黎Quit hall啦，你地仲有咩想做又未做架？」我重覆。
「下。。都無咩野未做。。」Felix話。
「平時已經玩得好喪搏盡左我地既Hall life，都無咩野好後悔啦。」Parsons話。
「岩呀，quit左hall都仲會keep住聯絡既。只不過少D咁解姐。」書生話。
「希望我地quit左hall都仲可以友誼永固啦！」我真心講架，當你地係好好既朋友。
「on9。」佢地一齊笑我。
「到時記得黎我同書生既畢業禮呀。」Felix講，btw，佢同書生讀唔同科既。
就係講完既時候，Felix禁緊部電話，突然臉色好嚴肅咁黑晒面，成間房既氣場都唔同晒。
正當我想問佢咩事既時候，我見到佢電話係我地O Camp既whatsapp group入面開左張圖。
我即刻拎自己部電話睇下發生咩事。
唔睇由自可，一睇就大檸樂。
有張相係O Camp房入面，個女仔cool實男仔條頸黎錫，仲要騎住左佢，兩個人著住我地玩既O Camp tee。
雖然Ｄ頭髮遮住左，個男又側左影唔清個樣，但明眼人一睇就知係書生同Janice。
笠綠帽已經好撚慘，仲要俾人影相放上Group公告天下，仲仲要係自己日對夜對既好朋友同以為好好既女朋友搞埋一齊，3個Combo，Felix我身為你既朋友都鄧你可憐。。。
仆街啦今次，點收科。。。
全場都靜晒，無人夠膽出聲講野。
面對世界大戰既前夕，我真係唔想參與呢埸花生，奈何我而家係一個尷尬既位置，走又唔係，留係度又唔係。。。
Felix深呼吸一下，故作冷靜咁同書生講：「我諗都唔洗講Ｄ咩？原來你呢Ｄ就叫兄弟？」
書生用木無表情既樣子，唔敢望住Felix，亦都無答佢任何野。
「你平時食咁多女我唔理你呀，點解要搞著我條女？你到底有冇人性？我對你地真係好失望。」爆seed啦爆seed啦。
「Sorry。我無心。」書生講左句。我都唔知而家心入面既佢諗緊乜。
「但唔係我撩佢，係你條女撩我。其實如果咁易同第二個男人搞埋你都應該要早Ｄ飛左佢。你信就信，唔信就算啦。我要講既就係咁多啦。」
Felix聽完就走左出房，我俾個眼色Wade同Parsons，就跑出去跟住Felix，廢時佢做傻事唔知去左邊。
佢粒聲唔出走到去Hall附近一個球場，果度都幾大，而且半夜都冇乜人。
佢搵左張凳，一坐底就大喊狂喊，喊得好慘好淒厲。
「我真係。。好。。好。。愛佢。。點解。。佢。。。要。。咁對我。。仲要係同我既兄弟。。」Felix喊到野都講唔清。
見到Felix呢個樣，就諗起大半年前既我。
當我知道自己俾信任既人出賣，完全瓦解左左我一路以黎既價值觀。
乜拍拖唔係兩個人既事黎架咩？拍拖唔係應該專一架咩？點解認真既人就係輸？明明錯既係佢，點解要我承受呢Ｄ痛？我到底做錯左Ｄ咩，搞到你要咁對我？我應唔應該當咩都見唔到繼續同佢一齊？咁既人你明知佢唔會改，都仲想痴返埋去做乜姐？點解你要咁蠢呀？你既生命已經冇晒意義啦，Step你不如去死啦？
幕後玩家龔嘉欣果幾場喊戲，話佢誇張既人一定係無經歷過呢種心痛到想死、真真正正崩潰、去到邊喊到邊既感覺。
我拍一拍佢膊頭，好溫柔咁話：「我明架。我真係明白你既感受。」
「你想喊就盡情喊啦。有我係度撐住你，一切都會過去架。」
佢喊左幾個字先開始冷靜落黎。除左靜靜咁陪住佢，我都唔知可以講咩。
Felix打破沉默。「其實已經唔係第一次。同佢一齊左一年。半年前佢都試過同第二個男仔搞過。」
我：「下？咁你都仲同佢一齊。」
Felix：「因為我真係好鐘意佢。我Year 1果陣識佢，對佢一見鐘情，追左佢兩年佢先肯同我一齊。」乜呢個時勢仲有Ｄ咁既痴情好男人？經過呢2個月既相處，我覺得擔屎都唔偷食既佢，同書生完全係兩個type。都唔明點解佢地會做到朋友。
我：「以你咁既條件，要搵過個有幾難。」
Felix：「係有其他女仔追過我，不過我都拒絕左。因為我個心由頭到尾只得Janice一個。」
「唉。」我嘆左一口氣：「放棄啦Felix。呢個女仔唔值得擁有你既好，因為佢連對另一半應有既尊重都冇呀。」
「我個心好亂，你俾我冷靜下先。」
【你有 1 個新信息。】
Wade:【你叫Felix今晚訓你度啦。廢時同書生撞口撞面咁老尷。】
Step:【OK】
我：「你今晚黎我房訓啦。廢時落到去尷尬。」
就係咁，Felix就黎左我房過夜。我訓我Roomate張床，而佢就訓我張床。成晚我地都傾左好多心事，由細個到而家既情史、屋企既芝麻綠豆小事都有傾到。我地成晚連手都冇hi到一下，好pure好true，我都係第一次同Felix傾到咁Deep。
一朝起身就唔見左Felix，原來佢落左返去自己房執野搬走。
書生亦都拎左Ｄ紙箱返黎Pack箱。佢地兩個都當對方透明唔講野。
唉，估唔到住Hall既最後一個禮拜係咁樣完結。原本仲諗住大家開開心心劈返場勁既酒局賀一賀佢。
同時亦都好諷刺，以為大家好好朋友，點知就搞埋自己既女朋友。
真係要帶眼識人。呢個世界真係好撚多賤人，反轉豬肚就係屎。
呢頭講完想友誼永固，下一秒就斷姴。我相信呢件事既發生，大家呢段友誼已經返唔到轉頭。
而我都知道我同書生既SP關係將會係呢度完結，就等呢段往事成為永遠既秘密。