電腦無啦啦多左d唔知咩既檔案係度(上): 第十八節

直到我地四個都考完哂AL之後，我提出不如我地做暑期工儲錢係放榜之後去一趟西藏做畢業旅行。兩個月之後，每人儲左大約一萬蚊…而榜亦都放左
我，肥康同埋呀雯都入左同一間大學，但呢個時候呀樂同我地講要放棄佢既學位，呀樂話佢要去外國升學，一直收埋唔講，係唔想我地失望，因為曾經一齊承諾，一齊奮鬥話四個要入同一間大學，並一直以呢個為目標。當然，呢個都唔係佢既本意，而係佢父母要求…


縱使係咁，我地四個既感情依然係咁深厚，絲毫動搖唔到我既強大既感情根基。
「照咁睇，會唔會係西藏之旅改變你地既關係呢?」呀力問
但冇人答覆佢
我同肥康隻字不講，因為我地知道亦感覺到呢件事我地係實實在在發生過，但係唔知點解記憶裏面，點都搵唔到一片蹤影。
之後有一個禮拜都係紀錄一d好鎖碎既野，又或者果日根本無野值得寫而冇寫到…
直到八月十號，呢一日係西藏之旅出發之日




呀樂既日記就好似變左一本紀錄書咁，紀錄哂我地做過d乜
預定一個禮拜既旅行就由八月十號開始，我地坐上左青藏鐵路，正式開展西藏之旅。呀雯同肥康搭車既途中好似有少少高山症既徵狀，但係好快就適應左，係鐵路既旅程我地都好愉快，特別係認識左一個外國人既老人家…
呢個老人家雖然睇落好老，但聲如洪鐘，一d都唔似行張就木年近百歲既老伯，佢非常親切咁問我地會去咩景點玩，又介紹左好多西藏既特色比我地知，雖然我地曾經做過好多research，但老伯講既野好多我地都未聽過…
之後老伯仲拎左d酥油茶比我地飲，教我地好多有關既禮儀，例如有藏族既朋友請你飲呢d茶，你唔可以一次過飲乾，因為呢個係藏族既習慣同埋係禮節。
同呢位老伯分別既時候，我地都顯得非常既不捨，老人係臨分別前留左一個電郵比我地，比呀樂拎住。
「呢個成百歲既老人家又係幾本事，咁老仲識玩電腦」呀力開口道
「咁依d係活到老，學到老丫嘛，唔係剩係年輕人先識既」miki嗔道
係呀力同miki一唱一和之間，我依然係目不轉睛






到達第一個目的地酒店後，我地分配好房間，呀雯一間，三個男人就另一間房，我地就迎接我地期待已久既景點，布達拉宮、大昭寺、西藏三大聖湖羊卓雍湖，納木措湖，等等…不在話下
其中有一部份既描述，睇落幾特別既係旅行既第四日
果日我地四個去左沙拉寺，呢個沙拉寺有一個大殿，裏面供奉一個觀音聖像…
係果度我地遇到一個女喇嘛
肥康既反應好大驚小怪「嘩!女喇嘛呀，真係未見過，食唔食得」
呀雯拍一拍肥康個頭「佛教都有尼姑啦，有女喇嘛有咩出奇，你係咪歧視女人唔可以出家先」
肥康摸住個頭「哈，唔係，平時睇電視都係見得多男喇嘛，唔知有女喇嘛姐…」


根據呀樂本日記，原本呀雯想用簡單既藏語同女喇嘛溝通，但點知呢個女喇嘛原來識講廣東話，事關佢既身世都幾特別，本來佢係廣東人，因為家境太窮，五歲果陣時，有個外國人比錢佢父母買左佢番去，仲話佢地既細路係一個活佛選中左，於是佢就跟住呢個外國人黎到西藏，當番到西藏果陣時就將佢交左比一個喇嘛照顧，自此個外國人再冇出現過…而呢個女仔亦成為左今日既女喇嘛






我同呀雯都對呢個女喇嘛講既野好有興趣，於是留低同佢傾計，傾既內容因為呀樂冇聽到所以冇紀錄低，而呀樂同肥康就去左寺內其他地方參觀同埋影相。
當晚我同呀雯都傾得好開心，似乎亦都埋下左呀樂態度轉變既伏線
係餘後既日子，我同呀雯越黎越多身體既接觸，越玩越埋，呀樂同肥康都feel到有d野，肥康曾經有過一番戲言，但呀樂好似因為呢句野受左唔少打擊
「你地兩公婆係度打夠未，唔等你地喇，我同呀樂行先啦」


呀樂好明顯受左好大打擊
因為佢係日記咁樣描寫
「…內心有股恐懼，她將離我而去，轉投他人的懷抱，天為什麼要這樣對我，我是不是幹了什麼不好的事，為何要讓我喜歡她?是不是時機的問題?如果我可以早點把一切說清楚就好了…」
女神被搶既典型心聲完全地表露無遺


過左呢一日之後，懷疑呀樂無心機再寫日記，所以見到佢草草就收左筆，裏面亦都冇記低咩大事發生，就係咁旅行就「順利」結束。




睇到呢度，我地都深呼吸左一下
以上都係接近兩年前既故事，到底我地四個跟住發生過咩事都係唔知。
「真係一個情深既漢子，一定係街市仔你做左d咩傷過呀樂心啦」miki眼有淚光
「喂，大佬關我咩事，如果呀樂真係我朋友，我一定唔會對佢做咩嫁…」我攤開雙手
肥康亦都嘆左口氣
「就算點衰都好，都係街市仔既問題，咁點解佢要洗埋我既記憶呢?我又冇想溝suki既意欲，老實講丫，suki係幾正，但我都係鐘意d比較野性既女仔」
「大隻康，冇人想知你鐘意咩類型女仔，不過你講得有道理，你應該係無關人士，如果呀樂係為左情，我唔覺得會燒埋你果份」呀力指出問題所在