電腦無啦啦多左d唔知咩既檔案係度(上): 第三十三節
望到呢whatsapp之後既我，當然焦急如焚
原來肥康，suki都黎左西藏，咁起碼唔洗孤身一人面對問題先，而且有肥康係度，處理問題都安心好多
當覆完肥康，快步走番出去沙拉寺既時候，我見到呀秋架吉普車仲未駛走
既然未開走，即係呀秋仲係附近啦，於是我企左係度等佢番黎
無幾耐呀秋就番左黎攞車，原來佢去左附近買煙仔食
同佢交代左幾句，佢好快就答應順道車埋我去XX旅館
呢間旅館離沙拉寺唔遠，半個鐘車程內就可以到
雖然係係呀樂既日記裏面知道左我係黎過西藏呢度，但可惜我完全冇哂記憶，所有野都好難以置信，人人所相信既記憶都可以係假，咁仲有咩可以相信呢?
係車上望住車旁掠過既路人，佢地既敦厚樸實，純樸既民風，心中隱隱約約好似得到一D啟示…
時間晃一下就過去，吉普車已經黎到肥康suki所住既旅館前面
再一次同呀秋道過別，我就行入旅館
呢度有好幾間酒店賓館一排咁樣開係馬路側邊，其中睇落最殘最日舊失修感果間，個招牌就寫住肥康住緊間旅館個名，係呢一刻我好似感受到周星馳黎到麗晶大賓館既感覺。
問過接待員，取過肥康房號，我就行樓梯上去，呢間旅館唔夠十層，仲要係冇電梯搭，但服務態度就幾好
黎到肥康suki住間房前，我敲左敲門，門好快開左
「肥康!」我已經伸出雙臂作抱擁狀
肥康巧妙避開一野拉左我入去裏面
雖然呢間野舊就幾舊，但係房裏面同出面三星級酒店果d房差唔多，有兩張床一個浴身連廁所，仲有部lcd電視添，真係估佢唔到。
我拉開枱下面張櫈黎坐，而肥康就坐左係張床到
「虧你搵到呢個地方喎，suki佢係邊?」我見到suki唔係間房裏面
「suki佢岩岩出左去買d食物番黎，街市仔呀，我大陸間農業銀行存款得過萬幾蚊咋，梗係要慳d洗啦，而且我都唔知我地要係西藏逗留幾耐…」肥康撓起雙手眼中散發絲微怒意
肥康又問
「街市仔，到底你果晚係咪係呀樂屋企做過d咩?」肥康用銳利既眼神望住我
我好快咁將成件事和盤托出，係呀樂屋企大打出手然後點樣del file同埋黎到西藏之後訓左係座豹山裏面…
肥康由起初聽到我話del file諗住同歸於盡去到聽我講話係豹底下死裏逃生，個樣好似由七竅生煙慢慢變番平心靜氣
「街市仔，你真係好事多磨，del file你都夠膽做，你知唔知咁做會影響好多野嫁。」
「我都唔想嫁，如果當時我乜都唔做就咁暈低，可能就比呀樂成功改變世界，我地一樣可能會消失，依家最多咪一拍兩散…」
肥康嘆左口氣
「依家唔做都做左，不過真係比你累死，果晚suki正話岩岩開門黎到，突然身邊既景物一轉，眨下眼我同suki就係馬路中央出現，身邊既miki小姐亦都唔見左，不過我地比你好彩，唔係係d咩荒山野嶺既地方出現，而係轉左黎市區，如果唔係真係九死一生…」
同樣地，我心裏面都呼左一口氣
「既然我地三個都黎左，咁呀樂係咪應該都係西藏呢一度?」
「係del file之前果陣，我同suki一齊，然後我地同時係同一個地方出現，咁好有可能呀樂都係你果座山果度…」肥康推斷
「但係我見唔到佢喎，佢會唔會消失左?」果座山真係冇人行過既痕跡，唔通呀樂一黎就比隻豹食左?
「應該唔會，呀樂同樣係”author”之一，del file係唔會del到佢，依家既情況好有可能係我地四個既file並無delete，而由你黎到西藏果一刻既未來而經清除哂，咁我地好自然就會出現到係過」
「咁樣唔會同我地原本既file重疊咩?」我忽然諗起一個大問題
「唔知你有冇聽過有個科學理論係講時間既不連續性，如果時間唔係連續，咁樣每一秒既世界資料都係唔同，即係今日我既唔等於明日既我，因為我見到lapallo點解會逐個日子會開一個file呢，咁樣好有可能歷史既紀錄係一個個間段，而唔係連續，當然，亦都有可能係因為當成為左author之後，file又會有所改變，多左d特殊既野都唔定」
聽到呢番說話，我心底果陣迷霧好似剎那豁然開朗咁樣
門柄咔一聲轉動，原來suki番左黎，我手上拎左一袋野
「街市仔!!」suki跑左過黎攬住我，用佢水靈既雙眼直視我
見到suki乜事都冇我都放心左好多
「suki，你都冇事真係好喇」我輕輕捉住佢隻手
「見番到你真係好」suki好激動咁講
「唔好講咁多住，睇下買左咩野食番黎先」肥康已經走埋去個膠袋到
膠袋裏面有酥油餅、仲有d即食麵同凍薄餅
飽頓一餐，肥康又好凝重咁叫我地坐好
「呢一兩日我係suki果度了解左好多野，當初呀樂父母意外傷亡之後，佢係佢個blog果度打左段野，我地意識到呀樂想改變歷史甚至”殺人”，於是我同你就去阻止佢，係同一日，係呀樂本日記裏面我地都知道，佢向suki表白，但失敗告終，係之後果幾日，我地依家不斷勸說同安慰呀樂，我地三個傾過之後，由suki出馬去勸呀樂，因為只有suki對佢既影響力係最大…之後…」肥康望一望我，由望一望suki
「得嫁喇呀康，等我講埋落去」suki咬一咬下唇
「當時呀樂威脅我…」說著suki唔知係嬲到震定係驚怕而震
「佢話只要我同佢一齊，就會放過街市仔同呀康…當時佢既眼神真係想殺哂所人咁…但為左你犧牲我既身體我都無所謂，但估唔到呀樂佢竟然過份到清除左你地既記憶，街市仔你知唔知你忘記左我果陣，我真係好傷心，我真係有自殺既衝動，但係一諗到呀樂可能會加害你地，我又唔敢喇…」
我再一次捉緊suki隻手，但睇到佢隻手有幾條疤痕
「咦你隻手…係咪呀樂做既」我霎時火冒三丈
但見suki低頭不語
「仆街呀樂丫，早知之前應該唔留手咁喪打佢先岩」我越諗越唔忿氣
肥康係呢個時候又問左一個問題
「但點解係街市仔部腦果度突然又會多左一個file既?文字加密又係係邊個做既呢，如果當時我地失左憶既話」
「呀樂佢唔係即刻洗你地記憶嫁，同埋係我去勸呀樂之前，街市仔同你好似傾緊d咩方案，但果陣我冇刻意去聽，所以詳情我都唔知…」suki說道
「咁即係我電腦果個file有可能係肥康你做嫁喎」我望向肥康
肥康用拳頭捂住個嘴
「可能係一d補救措施，或者當時我地意識到呀樂會做既野，所以預先有d咩防範都唔定，但點解可以瞞得過呀樂既”歷史控制器”呢?呢點我仲未諗得通」
「係喎，我記番起有一次suki你迷暈左肥康呀力同miki，之後你就del左肥康既電腦裏面既野，我一直想知你做左d咩」我又諗番起以前既事
「當時呀樂注意到lapallo既數字上升，然後係裏面發現到個地址係呀康屋企，佢就好嬲，但奈何佢已經改變過你地一次意識上既控制，然後佢又恐嚇我…話寧可令到香港唔再存在，都唔可以有人阻止我…我唯有自告奮用提議，諗住del左file就可以乜事都冇…」suki細說道來
「但你點樣可以del左file又唔影響到歷史?lapalloedit.exe 係咪就係果條歷史既鎖匙?」我急問
「呀樂就係教我delete左呢個檔案就可以廢除左個改變歷史既功能…然後搵一個file delete左佢，咁所有file就會消失…但我已經唔記得左呢個file係一個咩既file喇」
「一個好特別既file，係歷之之源嗎?」肥康淺笑左下
「咁樣格硬死諗都唔係辦法，係呀，我頭先係沙拉寺見到光頭miki，但佢好似唔係miki，而係另一個人」我把話題一轉
「光頭miki?」suki問道
「係呀，你之前應該係肥康屋企見過佢，佢個樣同沙寺個女喇嘛係一樣樣嫁」
Suki突然醒覺咁樣「唔怪得之前佢個樣好似咁熟口面啦…」
「你都知啦，我怕會影響歷史，驚引發果d咩歷史悖論，所以我拿拿林就調頭走左，佢應該唔認得我嫁喇，反正佢仲係沙拉寺，唔驚佢會走，有咩調查都可以慢慢黎」我替自己既行動稍作解釋
「你冇輕舉妄動係岩既…我諗」肥康對我呢個咁明智既舉動似乎冇乜表示
「咁我地依家應該番去香港定係要做d咩?」suki有d不知所措
「就算番去香港又點?依家呢個世界存在住兩個我，我地應該諗辦法番番去我地既未來，而根據呀樂既日記裏面，果位bernando比左個檔案呀樂，咁呢個人應該就係所有問題既根源，係眾矢之的，搵到佢咁我地先有機會番番去」肥康冷靜咁分析依家既形勢
「今日係8月9號，當年我地出發既日子係10號，咁我諗要11號先會見到bernando黎到西藏呢度」我將手機調較番正確既日子
「既然仲有兩日，咁我地應該做咩好?」suki嬌聲道，唔通佢想西藏旅遊?
「街市仔你唔係話過沙拉寺有個光頭miki既，我認為值得去查一查」肥康提議
「但係…唔怕影響d歷史咩?」
「睇番呀樂日記，當時我同呀樂去左其他地方影相，咁由我出面應該冇咩問題，如果驚既話我可以裝扮下先既…」
唔知點解肥康係件衫到摸摸下就拎左副黑超同拎左頂冷帽出黎
「乜你隨身帶住d咁既野嫁?」我好奇咁問
「哦~唔係，係呀力果箱野搵到姐，借黎用下冇問題掛」肥康笑道
仆街又係呀力，呀力到底同多啦a夢有冇親戚關係嫁…