望住倉央做住呢d咁既動作,真係有d不寒而慄既感覺
同一時間,倉央佢開始發出古怪既聲音,亦即係之前段片裏面聽過既語言
「佢講既果種語言好似藏語,但係又唔係完全一樣,有一半我係聽唔明」suki咬耳般係我耳側輕聲講
我諗番起我之以前問過professor,佢封email就話呢個語言同古藏語有50%既相似,但到底點解倉央會講d唔係呢個世界上出現過既藏語既呢?
倉央繼續自故自地講一d我地聽唔明既音節,而佢既動作亦開始有變化,雙腿依舊盤膝而坐,有時舉高雙手,有時係天空畫圈,彷佛將一個無形既物體掄圓,雙手輕輕挽左一圈之後又將雙手平放壓係大腿之上….完全無視左我地三個就係佢隔離
「suki,你覺唔覺有d似瑜伽既姿勢?」肥康忽爾察覺到d野
「的確係有d相像」我附和道
「但同現代瑜伽好唔同,會唔會係古印度瑜加呢?」suki諗到d野
我同肥康一同望住suki,期待佢解釋落去
「我以前睇過一本書,係講古印度既,當中其中一個chapter就提過瑜伽,係以前印度既宗教裏面,無論咩宗教,佢地相信透過修練瑜伽可以達到心神合一,最終達到梵我合一,梵我合一我諗同我地以前中化學過既天人合一差唔多,最終佢地就可以得道成佛…」




「唔通倉央佢依家已經同大自然合二為一?」我又再瞥過去倉央果度,但佢依然古古怪怪咁做奇怪既動作同埋講d唔知咩話
「我有一個諗法,如果要將成件事連埋一齊諗,lapallo、歷史、倉央既夢、完結、轉世靈童…如果倉央佢係轉世靈童,會唔會佢可以將歷史既預言透過夢裏面黎表現出黎,而更有可能既,會唔會係倉央能夠同歷史交流,你見佢無啦啦講古藏語,又古印度瑜伽術咁款,好難相信佢只係一個普通既女喇嘛…」肥康嘗試比一個合理既解釋出黎
「咩係同歷史交流?歷史係生物黎?」我大惑不解問
「其實未必係歷史既,可能係佢可以窺探到歷史既演化,或者呢一個係以前其他轉世靈童既記憶,好多好多唔同既可能性…」肥康好快聯想到好多野
幾分鐘已過,倉央自我意識好似番番黎,眼珠開始有番神,但仍然有d呆滯
「請問我頭先做左d咩?」
「頭先你坐左係度做一d類似古代瑜伽,仲講d類似古藏文既野,其實咁做係咪有咩特別意思呢?」肥康問
「我…原來我又失魂…真係唔好意思」
「又失魂既意思係?」我保持住低沉既聲音問
「其實由我黎左呢度之後,已經有好多次會不覺意就行左黎呢度,曾經有其他喇嘛見過我做呢d古怪行為,以為我有夢遊病,但經過診斷醫生判斷我並冇患上夢遊,我見冇咩大礙,我就冇再理會,久而久之,呢個行為由幾日一次慢慢越黎越少,但最近半年都未出現過我仲以為已經好番,但最近呢排又好似變番頻密」倉央把聲聽落有d攰




「聽你咁講呢樣野係你黎左西藏之後先有?」肥康追問
「本來細個既時候,我都只係發呢個夢,但自從黎左西藏沙拉寺之後,除左偶然會發番呢個夢之後,就出現埋夢遊既徵狀」
「咁你對呢個夢有咩想法?」肥康道
「係夢裏面我好平靜,我就好似一部機械,毫無感情,只係作為觀察,世界再唔存在,係一瞬間就會毀滅哂…呢個我睇到既影像同感覺」
「唔!~歷史既意志…到底係咩呢」肥康忽然低頭喃喃自語
肥康突然腦海叮左一聲
「我聽人講過話倉央大師你係比一個外國人帶你黎西藏喎」
「哦,係呀」
「你仲認唔認得果個人個樣?」
「事隔太耐,我已經唔係點記得喇」




「咁呀,佢有冇留低過d咩野比你?」
「應該冇….等一等,我記起佢臨走前送左一幅畫比我,係有關藏傳佛教既主題,但呢一幅畫係西藏好多地方都有得賣,冇咩特別野,依家比左主持放左係倉庫擺放」
「可唔可以借比我地睇一睇?」
倉央微微笑左一下
「唔知點解你地比我有一種感覺好親切,好似認識左好耐既人,而且肩負起重任,令我有種不自覺幫助你地既感覺,如果你地想睇,冇問題,等陣間番落寺我幫你地搵出黎…如果可以幫到你既話」
離開既時候,天已經全黑,好彩有倉央帶住我地行,原來有一條比較平坦既路可以行,我地三個忍唔住嘆左口氣。當落到山既時候,肥康就同倉央講我同suki有d要事做要走先,而肥康自己就會留低睇幅畫