一個書生既Player故事: 一

『那時的我還不懂什麼是愛情。』

 我比而家既小朋友幸運，我有一個正常既童年，無被父母迫瘋狂補習學野，日日放學返屋企睇下數碼暴龍、柯南，Hea做下功課咁又一日。上堂串下Miss，落堂就同班男仔玩下爆菊、猴子偷桃。小學唔睇AV，都唔會特別諗拍拖，係一個真‧Pure既年紀。

 最初對「鐘意」呢樣野有認知，係o係我小學六年級既上學期。

 咁耐既事要我講返起，真係好考驗我既記憶力。

  時間返到去小六既開學日。




 我一直都唔係用功讀書，靠小聰明考試過骨就算，得過且過既類型。

 上個學期負負碌碌成功係全級180人入面考到第35名。

 以全班最後一名既姿態碌左入精英班。而由廢班升到精英班既我，基本上大部份同學都唔識。

 六年級要行六層樓梯，啊，諗起以後每次上去都要行到氣喘喘咁，好討厭。

 係熟悉又陌生既課室入面，我遇到一位可愛既女同學，佢皮膚白皙，留住中長既黑色頭髮，扎起兩條孖辮仔，俾人感覺好似隻白兔仔咁乖巧，用清純黎形容就最貼切不過。



  「哈佬，你係咪10號呀？」呢個女仔問我。

 「係呀。」我好似個傻仔咁戅居居咁答佢。

 「我學號係9號呀，我叫林敏兒，你都可以叫我Sally嫁！」說罷，佢就坐左響我前面個位。
 
其實你數下個座位咪知坐邊，唔洗特登問我囉。蠢。

 「我叫林書生。」我禮貌地答佢。



 林敏兒，我心入面重覆默念呢個女仔既名。

 其實，正話係操場排隊集會既時候我已經不停望實呢個女仔。

 第一次見到佢果陣，個心呯一聲好大力咁跳左一下。。。

 唔係，係好多個一下。。。

 我眼睛好似唔能夠係佢身上移開。。。

 只能說我好想認識下呢個女仔。

 班主任Miss Chan：「你地男左女右跟高矮企啦。」



 
係未認識晒全班同學既時候，跟高矮調位就係最好既方法。

 全班同學開始好嘈吵咁移動，有講有笑。Friend既人三五成群咁走埋一堆，你地班人真係好唔誠實囉！有D男仔會特登吉高對腳扮高，希望可以坐到後排
一D既有利揸流攤既位置。

 林敏兒生得好矮，幾乎係全班最矮果幾個。

 好彩我生得唔高，同佢坐既機會又大左一步。我呢個誠實既孩子一定要跟返我既實際高度去排呢條隊，好樣衰咁企返係頭幾個度。

 「林敏兒，你坐老師枱前面果個位啦。」好衰唔衰，係要掉係老師枱前面既。睇佢個乖女樣，Miss Chan調佢係度，功能似係用黎邪住D問題學生。

 「第三果個。。。林。。。呀林書生，你坐最左果邊第二排啦。」大獲啦！我同林敏兒既距離又遠左！

 點算好呀。望一望格離個短髮女仔，唉，我真係好想坐係佢格離。



 「同學A、同學B你地林書生後面啦。。。」佢地就黎左我後面。

 我靈機一動，另轉面大大聲咁撩後面兩條友講野：「哈佬，我叫林書生呀。舊年係5B班嫁，你地都係5A升上黎？」

 「係。。係呀。。。」男同學A個表情好無奈咁。

 「Miss Chan望實你啦。你快D望返去前面啦。」女同學B好怕醜咁講。

 我仲拎住張紙巾擅自出位去掉垃圾，今次Miss Chan實忍唔住掉走我啦掛。

 我一路R水吹到完場，終於，Miss Chan就將我鎖定做左班上既麻煩份子。

 如我所願，我被Miss Chan掉左去林敏兒格離。



 我同林敏兒既故事就係我刻意安排下開始左。

 呢個人，成為左我小學生涯既重要記憶。

 基本上，係我小學有限既記憶入面，記得既所有野都係關於林敏兒。