「媽。學校今日派左升中既資料。」我將今日既通告拎俾媽媽睇。

「嗯,都係填C中學做第一志願嫁啦?」媽媽不以為意咁講。

「媽,我唔想入男校。我想入A中學,都係Band 1英中,況且學校位置近D,交通又方便D。」我試圖說服佢。

「A中學同C中學完全兩個Level!C中學出黎既學生個個都係精英,最重要係同你一齊玩既同學都唔同層次,近朱者赤、近墨者黑,你群埋D點樣既朋友係好緊要,點可以相提並論?」呀媽有少許激動。

「名唔名校又點,我都唔Care。」讀名校唔洗默書考試?讀完名校就一定入到大學?讀完名校出黎唔洗返工咩?都係一個虛名姐。最重要係乜野?要同林敏兒一齊阿!



「肯定係你個咩林敏兒想揀A中學你先咁講啦!」媽媽好醒,一眼就睇穿我心事。

「唔關事。係我自己唔鐘意入男校姐。」某程度上都係真心話。日日見住成班男同學,無左堆八婆係度,真係有D悶。。

「你考好成績再算啦。以你而家成績要入去都有少少忟水,你估你想入就實入到?四月先交志願,唔洗即刻決定嫁嘛。」呀媽決定採取拖字抉。你揀人人揀你,我都未必名成績入去。

「我考到頭十名既話你就要俾我揀。我要自主!我要選擇自己既人生!」我係度大叫口號。

「我會證明俾你睇,我係得,唔洗靠人地,無論去到邊自己都有能力做到叻仔。」



媽媽一言不發向我微笑,對於有個咁有鬥心既仔,應該感覺到好自豪?定係佢唔相信我有能力可以做到?到底佢係度諗緊咩?定還是佢由始到終都無諗過俾選擇權一個得十歲既我?我都唔知。我淨係知要刻己,做好本身,有成績俾人睇到先有談判既資格。