一個書生既Player故事: 三十七

「敏敏，我好掛住你阿。」我一放學就去咗林敏兒學校。一見面就即刻攬實佢。

「點解一日無見都好似咁耐咁既～」林敏兒攬實我，矮矮既佢個頭枕係我心口度。

「係囉～」我輕輕撫摸佢順滑既頭髮。

經過連日來既特訓（我地成功挑戰咗連續見面兩個禮拜了，好叻叻豬），我開始熟習同林敏兒有身體接觸，亦都好享受可以攬住佢係我掌心照顧佢既感覺。我地相處得好Sweet，林敏兒無再好似之前咁係咁喊。我都好錫佢無再整喊佢虐待佢。

「有個問題我想問你好耐。點解臨畢業果排你成日喊既？」我問佢。



「因為。。我擺咗B中學做第一志願，我知道好大機會都唔會一齊入到A中學，會同你分開。。」林敏兒補充：「但你咩都唔知，仲咁老定，我心入面好焦躁，控制唔到自己既心情，所以成日都發脾氣。」

令我諗起有一次去丁丁屋企Hea，佢同我分析過林敏兒既心理，非常貼近。當時佢仲話，林敏兒一定唔係因為讀書壓力大，而係因為我先變到咁情緒化。我仲唔信喎。果然，女人都係了解女人多啲，丁丁真係我既好後援。

「對唔住呀，我無諗過你會咁諗。。你應該話俾我知。。」

「你唔係應要知我諗咩嫁咩？下下要講出黎，就無意思啦。。」下，你估我係你肚裡面果條蟲呀？你唔講我鬼知呀？家陣我玩心靈感應定通靈上身？唔通你今朝係屋企放咗個屁柯爛屎我又會知？

「我覺得，拍拖最緊要係溝通。有咩都要坦誠相對，講出黎俾對方知。」我同林敏兒講。



「咁你知唔知我而家諗緊咩？」我問林敏兒。

「唔知。」

「咪係囉！仲話要知你諗咩！神仙都估唔到啦。」我話。

「我知啦，你實諗緊你好鐘意我！」

「Um..都。。算你岩啦。。」




我諗緊。。。不如你試下幫我打個飛機。。。哈哈哈哈哈。。。。

不過我都係唔好講，講唔出，講完實俾佢小爆，我都係唔好咁誠實。


我地。。。好似同一分鐘前既自己自相矛盾左。


林敏兒認為要心靈感應，但又講返我知佢點諗。

我話兩個人要坦誠相對，但我住對佢又誠實唔到。

講既野同做既野都唔同。。。



係咪大家都唔知自己想點呢。。


「我最鐘意就係你啦。傻瓜。」我meet住林敏兒塊面講。

「BB，月尾就Test啦，我呢排要早D返去溫書。」

「洗唔洗我陪你去自修室一齊溫？雖然我遲過你先Test。」

「唔洗啦，你陪我實專心唔到。」林敏兒話。咁又係，我實阻住佢。

我都上左岸入左中學，就真係唔會咁勤力溫書。

「咁好啦。」Yeah！我又可以放假！做下自己野！