一個多星期既考試結束。唔洗再晚晚捱夜溫書,Chur完又回復返日常作息,即係日日放學同肥傑、羅嘉樂打波,燃燒青春。

今日有少少特別。

打完波既我地並無即刻返屋企,因為肥傑一個提議:「就黎便服日,一齊去買衫。」我地三條仔走咗去商場行街。

「行開啲啦屌,好撚臭阿你!」我同羅嘉樂講。

「你估你自己好撚香?」佢反擊。



我地三個臭狐帶菌者就行入學校附近一個賣好多男仔衫既商場。罪過罪過。

青春期既男仔發育得好快,短短幾個月已經高咗半個頭。有無試過咁既一刻,就係平時好矮既同學,有一日見到佢,突然發現:「咦?佢幾時高咗咁多嫁?」又或者,即使佢聲音係慢慢陰沉咗,但你唔會發現嫁,到有一日你先會發現佢變咗聲。

肥傑就係咁既例子。佢日日打完波都要飲牛奶,突然今日,我先發現佢又高咗,同我睇齊高度。拉長個人,立刻瘦好多,又得。

所以話,意志真係可以減到肥嫁!想減肥既朋友一定要好好把握青春期,事半功倍。。

「呢件衫好唔好?」肥傑拎住一件黑色細波點恤衫。



「我覺得唔係幾襯你。咁Mk,羅嘉樂著會樂睇啲。」我將件衫掉俾嘉樂拼拼。

「拿,呢件可愛啲,同你形象好夾。」我玩野將件白色Bape掉俾肥傑。

佢將件卡通衫拼上身,估佢唔到:「Ok喎件衫!又有啲牌子!又平過Aape!」

我心諗,唔撚係呀嘛,堂堂一個男仔,著件咁既卡通衫,我小學果陣都唔著啦。(我著老母買既字母Tee、塗鴉tee多)卡通衫,我一定打死都唔著。

我唔出聲住,因為要等你買咗著出黎果陣我一定大大聲恥笑你。



羅嘉樂望住我,我地交換咗個奸狡既眼神。

「幾襯你阿我覺得!」所以我成日話,羅嘉樂同我係同一類人,最知我心意。

於是佢真係走咗去俾錢。我忍笑忍得好辛苦。

至於我就買咗件黑紅格仔既恤衫俾自己。易撞衫都無計,而家興呀嘛!始終返學要見人,唔可以咁柒!

我地三條仔各自買咗幾件衫,燒晒荷包既錢就返屋企。

點解要咁注重型象?點解要咁在意人地點睇自己?係覺得自己會有人睇,定想吸引人睇?我都唔知。但我知道跟潮流買衫一定唔係著俾自己睇。會暗暗期待、特登去買衫去便服日,大概呢啲叫青春期。