一個書生既Player故事: 二二四

我起身落廚房睇下有啲咩食，無乜僅餘既物資，我只可以簡單咁煮個麥皮、烚隻蛋、加片火腿芝士做早餐。

「乜你次次都咁早起身既。」Michelle聽到我煮野食既聲音，嘈醒咗落樓。

「唔知點解黎咗歐洲之後，日日都咁早起身。」我背住Michelle煮野食，唔想同佢既眼對上，被佢識穿我既猶豫。

Michelle喺背後攬住我：「可能係另類Jet lag。」

「咁又係，係香港我成日都四五點先訓。」



我轉頭，好自然咁錫咗佢一啖，再將早餐美美的放喺枱面。

說實話，我個心有一刻好想推開佢，扮咩事都無發生過，叫佢唔好將琴晚既事當真，不過我無咁做。

「點解既？你住Hall？」

「唔係，我無住Hall。我喺酒吧返工。」

「你個樣好斯文，唔似會喺酒吧度做。」



「關事咩。」我地係先扑野，再拍拖，後瞭解既次序，對於我不予置評。

「點解要返酒吧既？」

「因為。。我對酒有興趣。。而且酒後既人生百態係用錢都買唔到。。旁觀者清。。」

「有咩特別既經歷？話俾我知。例如D客人飲完酒去開房？」

「你諗到既都會有。」我繼續：「有人飲醉酒不停同人Say Sorry，有人連鞋都漏咗喺酒吧，有人飲完周圍攬住人黎錫，有人呃女友出黎要我幫手扮朋友交人，有人扮醉去抽女仔水。。」



「哈哈，咁有無女客人撩過你？」Michelle托住頭，聽得津津有味。我突然覺得呢份工豐富咗我既人生，有好多野可以同人分享，總有許多人對呢D經歷感興趣。

「撩既定義係咩先。」

「撩你去搞野，或者表白。。」

「唔多唔少總會有既。」我懶係神秘咁講，其實都係得張翠珊一個怪女仔。

「原來我男朋友係咁受歡迎既人。」Michelle一副心心眼的樣子，女人都係鐘意呢D懶型既野。

「哈哈。你都係啦。我聽朋友講，原來你係Ig女神，好出名。」

「有幾出名。」Michelle一副自豪既樣子：「個個以為我有拖拍，都無人追我。」

「Ig既相係男友視角。」



「好多都係女仔朋友一齊去影嫁囉。」

「鱷魚頭老襯底，原來係毒撚。」

「Sosad。多謝你肯要我。」

「講呢D。」