「點解你要買倉鼠送俾人?」一路行,Maisy問我。

「我朋友最近有啲抑鬱,情緒好唔穩定。難得佢對倉鼠有興趣,咪想買俾佢等佢搵返啲寄託。」

「點樣抑鬱法?」

「因為一啲解決唔到又返唔到轉頭既事發生咗,令佢受到好大壓力,好容易喊、亂諗野鑽牛角尖、由一個好有自信既女仔變到好自卑,仲會𠝹手。」又唔可能同人講流出事件,我講得好玄。

「會𠝹手。。你唔驚佢情緒唔好會虐鼠咩?」Maisy提出一個問題。呢個念頭令我有一絲既害怕,驚Maisy講既野會成真。



「咁我咪唔應該買倉鼠俾佢?」

「如果只有咁先幫到佢,呢個風險都無可避免。試諗下如果你朋友無咗精神寄託會自殺咁點算?」

「。。。」要犠牲一樣野既幸福而成就自己,咁樣仲會係一件值得鼓勵既事嗎?道德話俾我知當然唔係。

「都係自唔自私既問題。」但現實既我會。

「人類都係自私。為咗自己既幸福有乜野做唔出?」Maisy咬牙切齒咁講。



「你好似好有感受咁。」我回答Maisy,雖然不明所以。

「我每日咁努力付出都係只為咗維持自己既基本生活。」Maisy突然開心事台話:「我屋企無錢,每日打幾份工都係為咗賺學費,有時都唔知生存為乜。」

「又要努力讀書鬥拎Scholarship交學費,唉,講起都覺得辛苦。」Maisy呻。仲話叫我教佢讀書,睇黎佢先係Dean list類既真正學霸。

「Sorry呀出黎買野應該開開心心,突然間講咗自己既煩惱。」

林書生係咪應該考慮下做社工?咁多人都搵我講心事。



我若有所思:「咁又唔好咁講,家家有本難念的經。我地生活喺資本主義既社會,自細既教育係要競爭而唔係互利,覺得我要贏、要批判對方先係對自己好;我寧願你少一粒魚蛋,都唔要我多一粒再對分半粒既觀念。不過呢個唔係剩係香港有既問題,好多地方都面對緊。」

「點解會咁諗,係因為我睇過一本講北歐芬蘭政策與生活既書。作者係一位芬蘭既女記者,因為結婚而搬咗去美國居住,受到好多生活上既衝擊,分析兩個地方不同之處。」

「其中提到芬蘭有好多真正幫到市民既政策,雖然芬蘭既稅率偏高,但市民卻可以享有優質既生活,免去好多林林總總既費用,例如有全方位既醫療保健、男或者女人生咗仔有一年既有薪產假,如果父母仲想延長假期仲可以有兩年福利津貼、免費讀大學同埋研究所。美國人覺得呢D政策係養懶人,努力又有錢既人當然要享受多D,但作者卻指芬蘭政府係幫市民處理好多基本生活需要,先有心思同時間去發展自己既個人事業,而喺芬蘭交稅係羊毛出自羊身上,為自己支付優質既服務。」

「到作者搬去美國就好唔適應當地為生活既疲憊,小至貼士俾幾多、電話Plan有好太種浮動價格既選擇Which喺芬蘭唔需要好仔細咁格價驚俾人呃都係一種壓力,喺芬蘭作為中產既佢黎到都要擔心生計,仲要講追夢真係難過登天。」

「人地幾幸福,來生不做香港人呀我!」Maisy話。

「但作者覺得因為呢種破釜沉舟既壓力先成就到卓越、自由、熱情、有創意既American Dream。到底邊種生活先最好,都係睇自己用咩角度去睇。可能到你做咗芬蘭人又嫌果邊悶,天氣唔好不見天日。哈哈。」我回答。

講下講下,我地已經去咗寵物街其中一間有賣倉鼠既舖頭。

店員同我地介紹咗黃金鼠、小銀狐、三線鼠、布丁鼠、小紫王。。



見到佢地眼仔碌碌的確好萌好得人鐘意。

店員同我介紹咗D性格比格溫馴既倉鼠,我Filter走晒D容易咬人既惡鼠先至影相俾Michelle揀。

行咗幾間影埋倉鼠屋俾Michelle揀,個情況好有《情色漫畫老師》入面哥哥正宗行街Skype妹妹紗霧既感覺,唔知做乜勁。。。

我:【呢度D倉鼠啱唔啱心水呀?唔啱我再影俾你啦!】
Michelle:【就呢隻啦。】
Michelle:【唔該你!】Michelle卻沒有以往咁厭尖,好快就揀咗一隻灰色偏白既小紫王倉鼠。仲要同我講唔該。

我再幫Michelle買咗鼠籠、食盤、飲水器、廁所、磨牙棒、倉鼠糧。。

好好記底店員同我講既新手須知,就同Maisy返去九龍塘。



時間比想像中早好多。

「陣間食唔食飯?」我問Maisy。

「好呀。」

「我上去Hall擺完野落黎,你喺樓下等我啦。」又唔係想撩人扑野,無事幹拍人地上自己房,廢時令人誤會。

「唔好啦,自己一個等戇居居咁。。」

「Er..咁好啦。」

「上去參觀下你間房。」Maisy笑得令人難以拒絕。