我地成班人喺Common度研究Mandy個劇本,碗都未洗。

「你條片係要拍乜?」我問Mandy。

「五分鐘既微電影,內容不限,主題係青春。」Mandy話:「咁所以我咪寫咗個愛情故事黎講下青春既戀愛。」

「好老土呀。。。」佢個故仔好似典型既港女愛情劇,係男女主角係校園相撞,女主角D書跌晒落地,對望果下就心動咗。

齊喺學校度玩、住Hall、表白、拍拖,然後當然唔少得攬攬錫錫搞野。



幾年後,男女主角仲有好美好既事業,儲夠結婚,每日都咁Sweet,仲被報紙頒咗做全港最佳情侶大獎。

到最後卻發現係一場夢。

一個肥矮毒醒咗之後喺張床度嚎哭,原來所有野都係夢境,有個靚女女朋友係夢,自己靚仔都係夢。手揸住一堆紙巾,肥矮毒注定單身,一生都要同伍姑娘作伴。

「點解,點解呀。。。我都係想拍拖姐!!!呀~~~」

這是一個典型既Come On James既故事。





「請問咁同青春有乜野關係?」我問。

「幻想都係青春既一種。」Mandy話。

「你肯定你係讀CM既?」Felix話。

「人地CK拍d片咁藝術,你果D咁MK。」Carmen話。CK拍果D片係王家衛色調唔知做緊乜既藝術片。



讀CM既人都有種古怪既藝術家風格,鐘意王家衛,仲有奇怪既脾氣,但Mandy係例外,完全係負。

「知唔知考公開試寫發夢係會肥佬?」我話。

「而家係考DSE咩?」Mandy反擊。

「真係要拍?」Hailey細細聲問我。

「你想條Hall宣傳片有著落既話。。」Mandy插嘴。

「不如直接跳去親密既床戲啦~」Felix突然推波助瀾。

「床戲都出得街咩?」Hailey問。

「得呀,快啲去試下戲先。」Mandy話。



「你叫我試就試,咁我咪好無面?」我話。

「唔好咁衰啦Mandy你~」Carmen喺一旁幫我講說話。

「哎返去打機先。」我話。

「唔好走住啦,不如而家拍一條先啦~」Mandy映求我。

「而家?點拍?」Hailey感到好驚訝,唔知道Mandy想點。

「你同Hailey企喺中間洗碗,我拍你地既背影。」 
 
「執執套衫先啦起碼都。」同我一樣著住Hall Tee既Hailey話。
 


「唔洗啦,咁先夠真實自然。你地就扮曖昧中,同朋友煮完飯兩個人喺度洗碗。」Mandy「指導」我同Hailey:「企埋D。」

我同Hailey都好無奈,又唔知要講D咩。


「其他人就喺枱度玩電話,扮傾計得啦。」

「將你幻想拍拖好Sweet好噁心既情節做出黎就得!俾D初戀既感覺我!」

「OKOK!Stand by!」CK、Felix、Carmen都喜致孜孜咁幫Mandy做臨記。

「3、2、2。開始!」

「。。。」水喉開住咗。



一、二、三、四、五、六。。。

Common頓時只剩下水柱撞擊洗手盤既聲音。

咁突如其來既設定,我同Hailey都唔知講咩好。

「。。。你覺得Mandy係咪呃緊我地洗碗?」我裝作無若無其事,問Hailey。

「唔會掛。」

「你地,又唔幫手洗碗。。淨係得我地兩個洗。。」Hailey轉頭同臨時演員們講。

「個洗手盤都無咁多位,你兩個做代表幫我地洗咪得啦!」CK賊笑耍走Hailey。

「唔緊要啦,咁咪有機會俾我地相處下。」我好噁心咁講唔係我平時會講既對白。



Hailey不停洗碗,而我卻停底,望實Hailey。

Hailey裝作害羞,問我:「你做咩呀?」

「無呀,望住你洗碗。」

「做咩姐你。」Hailey用一個好活潑可愛既表情瞪住我。

「繼續洗啦你。」我用一個好撩架打既表情同佢講。

Hailey就聽我話繼續洗,我就繼續望住佢。

「夠啦!唔好再望啦!」

我摸摸Hailey個頭:「哎呀你咁樣真係好可愛。」

「俾你激死。。」

「低B。望下你都嬲。」我微笑。

Hailey埋頭苦幹咗半分鐘。

又忍唔住偷望大家。

我同Hailey好有默契咁對視甜笑,用最甜蜜初戀既心情洗碗。

就係咁樣,唔出聲,心情像小鹿亂撞一樣,靜靜地洗晒今晚煮野食既所有碗。

「Cut。」Mandy導演話。

「哈哈哈哈~~」其他人終於都大大聲咁笑咗出聲,包括我。

「好噁心呀林書生你。」Felix話。

「Wow~~都幾Sweet呀,好似真係曖昧緊咁。」Mandy重播果條片,表示好滿意。

「哈哈,你兩個不如真係一齊啦。」Carmen好奇怪咁笑咗聲,我都分唔清係恥笑定忍笑。

「人地Hailey姐有男朋友嫁啦,幾時輪到我。」

「我強烈覺得佢地係昆我地洗晒D碗。」Hailey表示不滿。

「啱呀,應該收返錢。」

「道具黎姐。」

「好夜啦,訓教啦!」Hailey趕我地訓教。

「應承我,真係要睇劇本,我地再約時間拍啦!」Mandy執電腦。


我返房,手機播住Mandy send黎啱啱拍既果條片。

我份人已經麻目到無晒感覺。

唔識開心,亦都唔識傷心,更加對人無想拍拖既感覺,我心底有一部份既我,唔知去咗邊度。

但係唔知點解,喺虛假既情節入面,我好似真係搵返一D甜蜜既感覺。