一個書生既Player故事: 三六五

仲有一個稀客，佢就係Michelle。
 
「你唔係喺Basel咩？」我問Michelle。
 
「返咗黎啦。」
 
「Congratulations. 恭喜你畢業阿。」Michelle向我微笑，握手。
 
「多謝。」
 


江柏琪當然認得出Michelle係我既前女友。佢傻傻咁企喺度望住我地既對話，無出聲。
 
咁我當然唔可以冷落我既女朋友：「介紹返，我女朋友，柏琪。Michelle。」
 
「好靚女。」Michelle讚江柏琪。
 
「邊係，你仲靚。」江柏琪面對呢個KOL級美女（Stalker對象？）既讚美感到負擔。
 
「送份禮物俾你丫。」Michelle喺手袋拎咗本書俾我：「我啱啱喺Basel舉行咗個人畫展，呢本係我既作品集。」



「估唔到短短半年你就畫咗咁多幅大作。好叻丫你。」

「哈哈，可能要多謝你。陪我走過人生既低潮。」Michelle同江柏琪講：「林書生真係一個好男仔，你同佢一齊，記得捉緊佢唔好放手。」

我拖實江柏琪：「我先唔會俾佢走。」
 
 「不如我幫你地影相？」江柏琪有點尷尬咁話。

「好。」我企喺Michelle隔離，刻意有點避嫌帶有點距離去影呢張合照，希望江柏琪唔會嬲。



「我去搵其他朋友影相先。再見。」Michelle輕輕的說，就走了。
 
 
今日既畢業禮就咁完成。

江柏琪真係好好，見到丁丁、阿婷好熱情咁攬住我，都完全唔會黑面或者嬲，仲一臉笑容幫我地影相。

食飯果陣，我問江柏琪：「你見到Michelle黎搵我影相，唔會嬲咩？」

「嬲黎做咩？」江柏琪話：「最重要係，林書生而家喺我身邊。」

就憑呢一句，我更加認定江柏琪呢個人。

「Wow～突如其來既表白。」搞到我突然有D怕醜，露出顴骨微笑。



 「笑笑笑，笑得咁開心做咩？我有批準你笑咩？」

「見到你開心咪笑囉，咁女朋友大人你批唔批準呀？」

「批準啦。」

我用手指掂一掂自己咀唇，再放喺江柏琪既唇上：「錫啖先。」

「哎呀，毛管都戙晒。」

「哈哈。」