一個書生既Player故事: 三六七

我同父母、江柏琪一齊去收樓，好簡單用肉眼睇下地板有無谷起、天花有無剝落或者有水漬、牆身有無明顯裂痕、門窗有無鬆動等等。
 
除非天花爛到鋼筋都見到或者嚴重漏水咁誇張，否則唔係住落都驗唔到乜野問題。
 
交鎖匙。
 
搵裝修佬做簡單既裝修：油下牆、鋪木地板、開電制位、換光纖，就度位傾下傢俬既設計以及擺放。
 
「我想用胡桃木色同埋白色既傢俬，呢度擺個白色既電視櫃～～」
 


「好，你想點擺都得。」我露出爸爸微笑。
 
有你喺我身邊，間屋幾大，傢俬點擺又有乜野所謂？
 
從此，呢間屋仔就係我同江柏琪既愛巢。
 
每日放工都可以見到江柏琪，攬住佢瞓覺，每朝早起身第一眼就見到佢，可以錫佢。
 
我個腦海佈滿各式各樣既幻想，使我返工既時候都不自覺傻笑。
 


「你做咩傻更更咁喺度笑？」茶水婆婆問我。
 
「見到你，心情靚咪笑。」
 
「阿婆你都撩！」茶水婆婆好開心咁打咗我一下。
 
「姐姐就姐姐啦！」
 
「阿頭，你睇下書生咁既大話都講得出。」
 


「唔係阿，書生份人最誠實。」
 
「哈哈哈。」