一個書生既Player故事: 三七五

喺某一晚，我收到溫梓柔既電話，佢話想約我食晚飯，我答應咗。
 
我同江柏琪講：「溫梓柔啱啱打黎約我食飯，Amazing！」
 
江柏琪：「肯定係派帖。」
 
咁多年無聯絡，突然間打電話來，就只有一個原因。

 
「我都覺得係。你一唔一齊去食飯？」


 
「唔啦，舊時阻住你同舊相好傾計。我同佢中學同班都無講過野咁滯。」江柏琪話。
 
「咁你去唔去飲？」
 
「去，幫我攞埋張帖。」
 
「知道。」
 
 


 
我同溫梓柔食飯見面。
 
「Sorry遲咗，等咗好耐？」我一放工就趕過去餐廳會合溫梓柔。
 
溫梓柔變得成熟，打扮斯文，戴住黑框眼鏡，白色恤衫，黑色長褲，好有秘書既感覺。
 
「我今日請咗半日假去買野，都係啱啱到。」溫梓柔話：「你最近點呀？」
 
「過得幾好阿，你呢？結婚啦？」我笑問。


 
「係阿，哈哈。你真係聰明。下個月尾就會係我既婚禮，今次搵你係派帖俾你，希望到時會見到你啦。」
 
許多久未聯絡而又曾經親近過既朋友，再次見面已經係喺大家既婚禮上面，包括我既前度溫梓柔。
 
「一定，留多個位俾江柏琪。」
 
「江柏琪？」
 
「阿，你無我Instagam同Facebook唔知道呢。我同江柏琪拍拖。」
 
「我真係唔知，好驚訝。你地過咗咁多年都仲一齊緊。」
 
「都係大學畢業之後先發生既事。」我話：「你Ig acc名係咩？不如我地交換返。」
 


我將電話遞俾溫梓柔，輸入佢既Account名。
 
「你而家喺邊度做野阿？」
 
「我喺CU畢業之後跟Professor做咗兩年RA，喺某個公司搞既Talk度識咗Boss，佢邀請我過檔，而家喺某品牌公司做緊大秘書。」
 
「你咁細心，一定好清楚波士想要D咩。咁男朋友呢？點識？」
 
「佢係我公司既客人，因為工作關係交換咗電話，傾傾下又發現好投契，約咗幾次就一齊咗。」
 
「佢對你好唔好？」
 
「我願意嫁俾佢，你話呢？」
 
見到溫梓柔幸福滿滿既樣子，我無打算再深究落去。


 
我地整晚就係度話當年：「我記得你有一日Message我話江柏琪俾Zoe欺凌。」
 
「之後發生既野你一定唔知。江柏琪𠝹爛咗Zoe個袋，劃花佢啲Note報仇。最後佢帶住成班人去M記刮江柏琪，要我同肥傑佢地幫佢求情先甩到身。」
 
「乜你地咁癲既。」溫梓柔聽得津津樂道：「我一直都係好乖咁讀書，無經歷過你講咁多姿多彩既野。」
 
「往後精彩既人生，都有你而家既男朋友俾你。當年既我，太唔識諗，Hurt到你好對唔住。」
 
「傻啦。咁耐既事，我已經無晒感覺。」
 
「真係？」
 
「真係太耐太耐。就好似講緊小學同格離位鬧過架咁，回頭睇返好小事。但當時既自己，真係睇到好大件事。」溫梓柔話：「如果唔係同你分手，我都遇唔到而家既男朋友啦！我要多謝你添！」
 


「哈哈，我好差咩。」
 
「你樣樣野都好，就係對我唔夠我男朋友好，無心肝。」我已經準備好不停被溫梓柔攻擊。
 
「被你地閃死啦。」
 
時間都差唔多，我舉手埋單。
 
「車埋你返屋企？」我問。
 
「唔洗啦，我男朋友都喺附近食飯，佢會送我。」
 
我微笑：「咁好啦，再見啦，準人妻。」
 
「拜拜。」


 
 
我將溫梓柔既近況話俾江柏琪知，仲同江柏琪一齊去行珠寶店買金器俾溫梓柔。
 
當作係我一點心意同埋歉意。
 
無心人就只懂得用錢去做彌補，好讓自己心裡好過一點。