【完】好多件令我好後悔嘅事 (20/4/2017修改): 11
我喺宿舍住嘅時候每個星期都要返一次屋企。如果可以最好一世都唔洗返去，但事實係我竟然做唔到。
每個星期屋企都會畀五百蚊我。
所以我先會話唔返去唔得，每個星期我就係過住啲咁樣嘅生活，每日死慳死抵，去到我嘅生活完全全走入貧困交迫嘅狀態後我就會返到屋企。雖然一啲偶然嘅版稅同投稿嘅收入可以維持到我兩三日嘅生計，但捱到第四五日嘅時候結果都係一樣，不得不返去。
我諗家雯佢咁唔鍾意我依一樣嘢，其實佢有佢嘅道理。
卑賤到返到屋企嘅時候我嘢都唔敢講，連放低鎖匙都特別輕力，慢慢咁趟開鐵閘，轉身入去。成間屋有三個人，有我、有阿爸、有阿媽，阿哥家姐已經搬咗出去住。佢哋無明言，但我諗佢哋心裏面應該知道我係因為洗晒錢而返去。
好似以前好多個週末一樣我返到屋企推開屋企嘅大門之後，阿媽會眼尾掃我一眼，然後佢繼續做佢做緊嘅事，有時會洗碗、有時會掃地，佢唔會理我。成個屋企，因為連我自己照鏡都無辦法對住我自己笑，所以成間屋就得返阿爸一個會對住我笑。
我阿爸係一個地盤工人，佢今年六十歲。如果嗰日放假，一返到去就會見到佢挨住張梳化睇電視。
工作關係令到佢晒得好黑。佢頭頂嘅頭髮半禿，黑色頭髮圍咗個地中海出嚟，有少少反光。額頭幾道皺紋一笑嘅時候就好深，佢眼白有啲黃，每次望到佢眼睛都總覺得佢裏面有一點淚，但佢每次都笑。
我阿爸佢會笑住咁問我「讀書辛唔辛苦？」
我會緩慢低沉咁答佢「我唔辛苦。」
我一邊答，一邊走入房，放低我個袋。
阿爸佢叫我「唔好咁夜瞓」。
「唔得啦。」我盡力拉起笑臉，「大學好多嘢做嫁。」
佢一路睇電視，一路懶懶閒咁話：「啲嘢邊做得晒」，佢仲叫我「早啲瞓。」
「嗯。」我點點頭。
嗰時阿媽喺廚房做緊嘢，開大個抽氣扇，油喺鑊上面不停咁彈，佢唔會聽到我哋講緊乜嘢。只係會有啲電視上《城市論壇》嘅阿伯聲。
阿爸佢問我「夠唔夠錢洗？」
我一句都答唔出，我避開佢視線，望住部電視。我哋屋企部電視放喺窗前面，所以我會見到窗外正午白色嘅耀眼陽光，對面兩棟高樓嘅間隙中間有一小格「海」。
「嗯。」我答。
我無膽答佢夠又無膽答佢唔夠。
阿爸佢無再出聲，佢伸手拎咗個腰包到手上。佢腰包上滿佈泥污，全部都係佢工作嘅痕跡，雙手都起晒繭。佢拎個銀包出嚟，喺裏面一次過畀咗幾張五百蚊我。應該有成五千蚊。
「唔洗咁多嫁...」
「唉啊！男仔無兩個錢砸喺袋點得嘅呢？」我阿爸話我：「拎住啦。」
「真係唔洗咁多嫁...」
「快啲啦！陣間你阿媽出到嚟又哦你嫁喇。」
我倆一齊望向廚房，係阿媽嘅背影，以及佢炒餸嘅煙。
阿爸佢話，「我自己仲有得洗啦。」
「真係唔洗咁多...」我望住佢手上一疊厚厚嘅五百蚊講。嗰到我諗有成五千蚊。
「老細出多畀我哋嫁。」佢將錢推到我眼前，「你袋住啦，你洗唔洗都好喇。」
「唔洗喇...」我越推卻越膽怯。
有一刻真係想一手就收咗佢。因為一收起佢，我一連幾個禮拜就可以唔再返嚟，一個月嘅生計總算一下子咁解決咗。
「Err...」當時我對住阿爸，支吾以對。
「咁一半喇。」佢一手喺疊錢到數一數，佢數咗一半出嚟，二千五百蚊，佢交到我手上。佢同我講，「你唔夠再同我講啦。」
而我已經握住咗嗰幾張紙，雖然係紙但好沉重。我懦弱而低微地細聲咁同阿爸講咗一句「多謝」，除此之外我無以為應。
阿爸佢仲千呵萬囑我，「你唔夠一定要出聲啊吓。」
我耷低頭，無地自容，我喉嚨勉強壓出一聲「嗯」之後我久久無法講出一句有義嘅話。我捉住嗰幾張五百蚊紙，抬唔起頭，眼淚停到眼眶，一眨眼就要流淚，係一個咁樣嘅邊緣上面。
「你幾時寫下本書啊？」我阿爸搭搭我膊頭。
「出書無用嫁。」我話。
「幾叻仔吖。」我阿爸佢又露出佢一排唔整齊嘅牙，對住我笑。
我阿爸啲牙真係好唔整齊。細個佢好貪玩，撞崩咗隻牙；大個啲又成日唔理啲牙，爛牙又無錢補，所以裏面就慢慢咁爛；我最記得係有一次，嗰時我小學五年班，佢去咗澳門做黑工，地盤做嘢嘅時候有條鋼索斷開咗一邊，直飛向我老豆，佢僅僅避得開，但打斷咗佢一隻牙。嗰次我阿爸差啲死。
我好鍾意佢，但我講唔出，我甚至一件事都幫唔到佢做，我剩係喺佢手上拎咗幾張五百蚊紙，用佢嘅錢上到大學玩咗四年。
「我同我啲工友講我個仔出書啊......」阿爸佢越係講起「佢個仔係作家」，佢就越講得興奮。「佢哋個個都話你叻仔嫁！」佢依舊笑住搭住我膊頭，佢好開心，好自豪咁望住我：「畀心機啦。」
我耷低頭，抺抺眼睛，我搖搖頭，拉起笑容，然後我顎起頭，等阿爸見到我笑：「寫嘢賺唔到錢嫁。」
我阿爸一時間都答不上話。
「依啲玩吓就得。」我勉強地快樂咁笑：「同人哋打下機、打下波咁差唔多嫁咋。」
阿爸佢輕輕「哦...」咗聲，佢諗咗陣，佢都係堅持咁同我講——
「出書好叻吖。」
「靠寫書？」我同老豆講笑咁話：「餓死老婆瘟臭屋啦。」
「緊係啦！」阿媽突然插一把口埋嚟。依個時候，阿媽煮完飯就拎埋啲餸行出客廳，佢一路拎就一路鬧：「係咁叻又唔見衰仔會畀錢屋企！」
「賺唔到好多嫁咋...」我無奈咁答。
「賺唔到又日日掛住做？！」佢鬧我：「你個衰仔去幫人補下習啊！搵份工做下仲好過啦！」
我答唔到佢。
佢鬧得興起，佢就無再理我。佢指住屋企一個櫃，佢指住上面放喺到嘅本書就鬧：「最叻咪買買埋一堆嘢放晒喺屋企囉！」
嗰疊係一疊書，一式一樣幾本叫做《教畜》嘅書。
「唔係買嫁。」我話。
「我理得你吖！」佢話：「成日搞到通屋都係嘢！」佢仲指住疊書：「擺擺晒喺到又唔睇！」
然後我再無答佢。
「一日到黑做埋晒啲唔等洗嘢！」佢一直鬧。
枱面上面放咗三碗飯，兩碟餸，一碟係梅菜蒸肉餅、一碟炒菜。
阿媽眼尾掃一掃我，佢上下打量咗我一番，佢見到我手上面拎住錢。
「一返嚟就剩係識得拎錢！」佢終於都講出口。
阿爸佢叫阿媽「唔好嘈啦」。佢叫我哋「食飯」。
阿媽佢揸住筷子，指住我個頭，一下一下咁篤：「你仲識做啲咩吖你！吓？！」
我一手擋開佢。
「人哋個個讀大學都自己搵錢養自己嫁啦！」佢繼續話：「你喺到寫啲咩話？喺到發埋啲作家夢！寫咗咁耐又唔見你發達？」
「我唔食喇。」我答。
「你咪唔好食囉！」
我入房拎返我個袋，拎走一齊我要拎嘅，我就攞咗條鎖匙打開門......
「食個飯唔洗咁勞氣啦——」阿爸佢話。
「我走喇。」我話。
呯——
閂咗道門，我一個人落樓、一個人行去搭車、一個人搭車。跟住我打咗個電話畀出版社。
「喂。」我話。
電話嘅另一端：「喂？」
「我係羊格啊。」
「係。」
「我想問版稅嗰邊，你哋可唔可以早少少出畀我？」
嗰時我搭緊西鐵，上緊錦上路，望向一大片山、一大片矮樓、藍色嘅天、白色嘅雲。午後陽光照到我背後，喺藍色嘅西鐵地板上照出我嘅一片影。西鐵一路向前行駛，電線杆一枝一枝咁經過。