《陌樂偈》第40天-不想救人的救生員

http://https://www.facebook.com/ChatToStranger

下午,某牛肉飯專門店內。
我拿著牛肉飯和牛肉汁,站在一位年青男生對面。
「唔該,請問有冇人?」他保持沉默,搖一搖頭。
我坐下來後,馬上打蛇隨棍上說:
「請問⋯⋯可唔可以同你傾下偈?」
他有點愕然,然後點一點頭。 




 
「你今日使唔使返工呀?」
他又搖一搖頭,依然是不發一言。
「你做邊行㗎?」
「救生員。」他終於開口了。
我內心十分高興,又成功解鎖了一個新職業。
 
「你做咗幾耐呀?」
「做咗兩年。」
「係咪要考牌先做得㗎?」




「係,要上堂,考拯溺牌。」
 
「咁你咪好fit 囉?」
「唔係呀,其實我好肥。」
「唔係要keep住練體能?」
「隔幾年要考一次試,考試之前操fit 啲就得。」
 
沒有迫切性的事情,我們就不會去做。
想做到一件事情,記得找個方法迫自己去做。
 




 
「點解會做救生員?」
「因為本身鍾意游水,所以考埋拯溺牌。」
「個牌要點考?」
「有筆試同水試。」
 
「係咪要喺水度試下救人。」
「係,要搵個朋友去考。」
「咁個朋友識唔識游水?」
「通常都搵個識游水。」
「咁佢咪可以靜靜雞幫手囉?」
「都可以咁講,主要係睇下你啲動作啱唔啱。」
 
「你喺邊度做?泳池定沙灘?」
「泳池。」




「你有冇做過沙灘?」
「冇做過,淨係做過泳池,做沙灘要學嘅嘢唔同。」
「你係咪負責坐喺張櫈上面?」
「係。」
 
「救生員其實有咩要做?」
「坐喺張櫈度。」
「睇落好似好得閒咁,其實係唔係?」
「真係幾得閒,冇乜野做。大部分時間都係坐喺張櫈度。剩係開池之前要做少少維修嘅工作。」
「坐喺張櫈嗰陣係咪要好專心,唔可以睇電話?」
「唔畀睇電話。」
 
「有一次,我喺泳池見到個細路囡跳落水,
但係佢唔知啲水好深,之後係咁潑水,
我咁啱係附近,即刻埋去拉返佢上水。




其實如果我唔識游水,係咪唔好亂咁救人?」
「係,識游水同識拯溺係完全唔同。」
 
「你救過人未?」
「好好彩,未救過人 。」
「你想唔想救人?」
「唔想。」
「點解唔想?」
「最好緊係冇人出事啦~」
 
 
「你一個星期要返幾多日?」
「我而家仲讀緊書,所以做緊part time,
不過好多救生員都係返part time,
好多同事係消防員,平時返一日放兩日,




放假咪嚟做下救生員,賺下錢,輕鬆下。」
 
「你畢咗業之後想做咩? 」
「冇諗過。」
「如果任你揀一個職業就可以做到,你會揀咩?」
「我最鍾意游水,細個實係有諗過做運動員嘅,
但係喺香港,做運動員又搵唔到錢,都冇前途。」
「有冇諗過繼續做救生員?」
「冇諗咁多,讀完書先算。」
 
我問過很多年青人,也說不知道自己想做甚麼。
難得有目標的人,又會因為沒有前途而放棄。
能夠堅持下去的,還餘下多少個呢?
 
他吃完飯了,跟我說:「我走先喇,bye bye~」




「多謝你同我傾偈,有緣再見~」
 
他站起來,跟我擦身而過,離開這間餐廳。
我們不知道對方名字,沒有交換電話,就此告別。
我們都是陌路人,就這樣搭了一場陌樂枱。
 
 
 
《實驗環節》
 
來統計一下,有多少人懂得游水?
懂得游水的讀者,請按「O咀」
不懂游水的讀者,請按「喊喊」
 
然後留言,說一下你怎樣學識游水?
或分享一下,自己曾經「浸親」的經歷

實驗結果在此:

https://goo.gl/dLB5EY
 
謝謝你看完整篇文章!

已有 0 人追稿